କଣାସ, ୨୩ା୭(ସ୍ବ.ପ୍ର): ଆନ୍ଧ୍ରପ୍ରଦେଶ ଚିତ୍ତୋର ଜିଲା ଅଧୀନ ବଡଗୁଟୁଲିପାଲ୍ଲି ଗ୍ରାମର ପରମେଶ୍ୱରମ୍ଙ୍କ ଦିବ୍ୟାଙ୍ଗ ନାବାଳିକା ଝିଅ ମାର୍ମା ୮ବର୍ଷ ତଳେ ନିଖୋଜ ହୋଇଯାଇଥିଲେ। ତାଙ୍କୁ ପୁରୀ ରେଳ ଷ୍ଟେଶନରୁ ଉଦ୍ଧାର କରାଯାଇ କଣାସ ବାଳାଶ୍ରମରେ ରଖାଯାଇଥିଲା। ତେବେ କେତେଜଣ ସାମାଜିକ କର୍ମୀଙ୍କ ଉଦ୍ୟମ ଯୋଗୁ ମଙ୍ଗଳବାର ସେ ଘରକୁ ଫେରିଯାଇଛନ୍ତି।
ସୂଚନା ଅନୁଯାୟୀ, ୮ବର୍ଷ ତଳେ ମାର୍ମା କୌଣସି କାରଣରୁ ଟ୍ରେନ୍ ଯୋଗେ ପୁରୀ ଚାଲିଆସିଥିଲେ। ସେ ରେଳଷ୍ଟେଶନରେ ଭିକ୍ଷା ମାଗୁଥିବା ଦେଖି ଜିଲା ଶିଶୁ ମଙ୍ଗଳ କମିଟିର କର୍ମକର୍ତ୍ତାମାନେ ତାଙ୍କୁ ଉଦ୍ଧାର କରି କଣାସ ବ୍ଲକ ଦୟାବିହାରସ୍ଥିତ ମୂକ, ବଧିର ଆବାସିକ ବିଦ୍ୟାଳୟରେ ୨୦୧୨ ଜୁଲାଇ ୨୦ରେ ଥଇଥାନ କରାଇଥିଲେ। କର୍ମକର୍ତ୍ତାମାନଙ୍କ ଉତ୍ତମ ସେବା ଓ ଚିକିତ୍ସା ଯୋଗୁ ସେ ନିଜର ବାକ୍ ଓ ଶ୍ରବଣ ଶକ୍ତି ଫେରିପାଇଥିଲେ। ପରେ ତାଙ୍କୁ ଉକ୍ତ ଅନୁଷ୍ଠାନ ଦ୍ୱାରା ପରିଚାଳିତ ଶିଶୁ ଯତ୍ନ ବିଭାଗ (ବାଳାଶ୍ରମ)କୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କ ଘର ଆନ୍ଧ୍ରପ୍ରଦେଶରେ ବୋଲି ଜଣାପଡ଼ିଥିଲା। ଏ ନେଇ ଜିଲା ଶିଶୁ ସୁରକ୍ଷା ଅଧିକାରୀ ମନୋଜ କୁମାର ତ୍ରିପାଠୀ, ଜିଲା ଶିଶୁ କଲ୍ୟାଣ କମିଟି ଅଧ୍ୟକ୍ଷ ମହାବୀର ରୁଦ୍ର ନାରୟଣ ସାହୁ ଏବଂ ପିଓ ଏନ୍ଆଇସି ସ୍ନିଧାରାଣୀ ସାହୁ ଚିତ୍ତୋର ଜିଲା ଶିଶୁ କଲ୍ୟାଣ କମିଟି ଅଧ୍ୟକ୍ଷଙ୍କୁ ଜଣାଇଥିଲେ। ସେମାନେ ମାର୍ମାଙ୍କ ପରିବାର ସମ୍ପର୍କରେ ଅନୁସନ୍ଧାନ କରି ସମସ୍ତ ବିଷୟ ଅବଗତ କରାଇଥିଲେ। ମାର୍ମାଙ୍କ ଭାଇ ଆର୍. ରାଜେନ୍ଦ୍ର ଏବଂ ଏମ୍. ମାନି ଗତ ୨୦ତାରିଖରେ ଉକ୍ତ ଅନୁଷ୍ଠାନରେ ପହଞ୍ଚି ଭଉଣୀକୁ ଦେଖି ଖୁସିରେ କାନ୍ଦି ପକାଇଥିଲେ। ପ୍ରତିଷ୍ଠାନ ଓ ଜିଲା ଶିଶୁ କଲ୍ୟାଣ କମିଟି ସହଯୋଗରେ ସେ ମାର୍ମାଙ୍କୁ ସାଥିରେ ଧରି ଘରକୁ ବାହୁଡ଼ିଥିଲେ।
