ପୁରୀ ଅଫିସ,୪।୧୧: ପୁରୀ ଜିଲାପାଳଙ୍କ କାର୍ଯ୍ୟାଳୟ ପରିସରସ୍ଥ ଲିଫ୍ଟରେ ବୁଧବାର ୮ଜଣ ଆଇନଜୀବୀ ପ୍ରାୟ ୨୦ ମିନିଟ ଫସିରହିଥିଲେ। ଏହି ସମୟରେ ସେମାନେ ଅଣନିଃଶ୍ୱାସୀ ଅନୁଭବ କରିଥିଲେ। ଏ ନେଇ ଜଣାପଡ଼ିବା ପରେ ଲିଫ୍ଟ ଚାବି ଖୋଲାଯାଇ ସେମାନଙ୍କୁ ଉଦ୍ଧାର କରାଯାଇଥିଲା। ହଠାତ୍ ଲିଫ୍ଟ ଅଚଳ ହୋଇପଡ଼ିବାରୁ ଏଭଳି ସ୍ଥିତି ଉପୁଜିଥିଲା।
ସୂଚନା ଅନୁଯାୟୀ, ଶ୍ରୀମନ୍ଦିର ଚାରିଦ୍ୱାରରେ ପୁରୀ ବାସିନ୍ଦାଙ୍କୁ ପ୍ରବେଶ ଅନୁମତି ଦେବା ଦାବି ନେଇ ପୁରୀ ଆଇନଜୀବୀ ସଂଘର ଏକ ପ୍ରତିନିଧି ଦଳ ଦାବିପତ୍ର ଦେବା ପାଇଁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ଦାବିପତ୍ର ପ୍ରଦାନ ପରେ ସେମାନେ ଲିଫ୍ଟ ଯୋଗେ ଫେରୁଥିଲେ। ଏହି ସମୟରେ ହଠାତ୍ ଲିଫ୍ଟ ଅଚଳ ହୋଇଯାଇଥିଲା। ଫଳରେ ସେମାନେ ଫସି ରହିଥିଲେ। ସେମାନଙ୍କୁ ଉଦ୍ଧାର କରିବା ଲାଗି କୌଣସି କର୍ମଚାରୀଙ୍କ ଦେଖା ନ ଥିଲା। ଏପରି କି ଟେକ୍ନିକାଲ ଇଞ୍ଜିନିୟର ଲିଫ୍ଟ ଖୋଲିବାକୁ ପ୍ରଥମେ ଉଦ୍ୟମ କରି ନ ଥିଲେ ବୋଲି ଆଇନଜୀବୀମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ଅନ୍ୟ ଆଇନଜୀବୀମାନେ ଜାଣିବାକୁ ପାଇ ସେଠାରେ ପହଞ୍ଚି ଉଦ୍ଧାର ଲାଗି ପ୍ରୟାସ କରିଥିଲେ। ପ୍ରାୟ ୨୦ମିନିଟ୍ ପରେ ଲିଫ୍ଟ ଚାବି ଖୋଲାଯାଇ ଆଇନଜୀବୀମାନଙ୍କୁ ଉଦ୍ଧାର କରାଯାଇଥିଲା। ନିମ୍ନମାନର ଲିଫ୍ଟ ପାଇଁ ଏଭଳି ଘଟଣା ଘଟିଲା ବୋଲି ସେମାନେ କହିଛନ୍ତି। ଏ ସମ୍ପର୍କରେ ଉପଜିଲାପାଳ ଭବତାରଣ ସାହୁ କହିଛନ୍ତି, ଧାର୍ଯ୍ୟ କ୍ଷମତାଠାରୁ ଅଧିକ ବ୍ୟକ୍ତି ଏକସଙ୍ଗେ ଲିଫ୍ଟରେ ଯିବା କାରଣରୁ ଏଭଳି ସ୍ଥିତି ଉୁପୁଜିଥିଲା। ଉଦ୍ଧାର ହୋଇଥିବା ଆଇନଜୀବୀମାନେ ସୁରକ୍ଷିତ ଓ ସୁସ୍ଥ ଥିଲେ। ଯେଭଳି ଏପରି ଅଘଟଣ ଭବିଷ୍ୟତରେ ନ ଘଟିବ ସେଥିପାଇଁ ପ୍ରଶାସନ ପକ୍ଷରୁ ପଦକ୍ଷେପ ନିଆଯିବ ବୋଲି ସାହୁ କହିଛନ୍ତି। ଏନେଇ ଅଧିକାରୀମାନଙ୍କ ସହ ଆଲୋଚନା କରାଯିବ ବୋଲି ସେ କହିଛନ୍ତି।
