ନୂଆଦିଲ୍ଲୀ,୩।୭: ଜରିମାନା ଆଦାୟ କରି ଦିଲ୍ଲୀ ସରକାରଙ୍କ ରାଜସ୍ବ ସଂଗ୍ରହରେ ଟ୍ରାଫିକ ପୋଲିସଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଛି। ଗତ ୧୦ ବର୍ଷ ମଧ୍ୟରେ ଟ୍ରାଫିକ୍ ପୋଲିସ ଦିଲ୍ଲୀ ସରକାରଙ୍କୁ ୭୦୨ କୋଟି ଟଙ୍କା ଜରିମାନା ବାବଦରେ ଲୋକଙ୍କଠାରୁ ଆଦୟ କରି ପ୍ରଦାନ କରିଛନ୍ତି। ସରକାରଙ୍କ ରୋଜଗାରିଆ ପୁଅ ଭାବେ ଦିଲ୍ଳୀ ଟ୍ରାଫିକ ପୋଲିସ ଏବେ ଆଗ ଧାଡ଼ିରେ ରହିଛନ୍ତି। ସୂଚନା ଅଧିକାର ଆଇନ ଅନ୍ତର୍ଗତ ପଚରା ଯାଇଥିବା ଏକ ପ୍ରଶ୍ନର ଉତ୍ତରରେ ଦିଲ୍ଲୀ ସରକାରଙ୍କ ପକ୍ଷରୁ ଏଭଳି ରିପୋର୍ଟ ପ୍ରଦାନ କରାଯାଇଛି। ଆଦାୟ ହୋଇଥିବା ଜରିମାନା ଟଙ୍କା ଦିଲ୍ଲୀ ଟ୍ରାଫିକ୍ ପୋଲିସ ଗତ ୧୦ ବର୍ଷ ମଧ୍ୟରେ ହୋଇଥିବା ଖର୍ଚ୍ଚର ୨୦ ପ୍ରତିଶତ। ପ୍ରତିବର୍ଷ ଦିଲ୍ଲୀ ଟ୍ରାଫିକ୍ ପୋଲିସର ଖର୍ଚ୍ଚ ୩୦୬ରୁ ୫୨୫ କୋଟି ଟଙ୍କା ମଧ୍ୟରେ ହୋଇଥାଏ ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ୨୦୧୯-୨୦ରେ ଏହା ୫୨୬.୭୭ କୋଟି ଥିଲା। ଦିଲ୍ଲୀ ଟ୍ରାଫିକ୍ ପୋଲିସର ପିଆଇଓ ମନ୍ଦୀପ୍ ସିଂ ରନ୍ଧଓ୍ବାଙ୍କ ଅନୁସାରେ ୨୦୧୮-୧୯ରେ ଟ୍ରାଫିକ୍ ପୋଲିସ ଫାଇନ୍ ମାଧ୍ୟମରେ ୧୨୧.୫ କୋଟି ଟଙ୍କା ଆଦାୟ କରିଥିଲେ। ଯାହାକି ସର୍ବାଧିକ। ୨୦୧୭-୧୮ରେ ଜରିମାନା ବାବଦରେ ମୋଟ ୧୦୨.୨ କୋଟି ଟଙ୍କା ଆଦାୟ କରାଯାଇଥିବା ସେ କହିଛନ୍ତି। ୨୦୧୮-୧୯ରେ ଟ୍ରାଫିକ୍ ପୋଲିସ ନିଜ ଦରମାର ୨୮ ପ୍ରତିଶତ ଜରିମାନାରୁ ଆଦାୟ କରିଥିବା ଏହି ରିପୋର୍ଟରୁ ଜଣାପଡ଼ିଛି।
