ବ୍ରହ୍ମପୁର ଅଫିସ, ୨୧।୩: ଅବକାରୀ ଗୁଇନ୍ଦା ପୋଲିସ ମଙ୍ଗଳବାର ଜାତୀୟ ରାଜପଥ ଗୋପାଳପୁର ଜଙ୍କସନରୁ ଏକ ଯାତ୍ରୀବାହୀ ବସ୍ରୁ ପୃଥକ ଭାବେ ୭୦କେଜି ଗଞ୍ଜେଇ ଜବତ କରିଛି। ଏଥିସହ ଦୁଇଜଣଙ୍କୁ ଗିରଫ କରିଥିବା ଜଣାପଡିଛି। ଅଭିଯୁକ୍ତମାନେ ହେଲେ ମଧ୍ୟପ୍ରଦେଶ ଆଦିତ୍ୟପୁରମର ପୂର୍ବତନ ସାମରିକ କର୍ମଚାରୀ ଗୋପାଳ ସିଂ(୨୯) ଓ କନ୍ଧମାଳ ଜିଲା ବ୍ରମହଣି ଗାଁର ଗଗନ ନାୟକ (୨୭)। ଅବକାରୀ ଟିମ୍ ଗୋପାଳଙ୍କ ଦୁଇଟି ଟ୍ରଲି ବ୍ୟାଗ ଓ ଗୋଟିଏ ଏୟାର ବ୍ୟାଗରୁ ୭୦କେଜି ଗଞ୍ଜେଇ ଜବତ କରିଥିବା ବେଳେ ଗଗନ ଧରିଥିବା ଏକ ଏୟାର ବ୍ୟାଗରୁ ୧୦ କେଜି ଗଞ୍ଜେଇ ଜବତ କରିଛି। ଗୋପାଳଙ୍କୁ ମାମଲା ନଂ ୧୦୪୦/୨୨-୨୩ ରେ ଗିରଫ କରାଯାଇଛି। ସେହିପରି ଗଗନ ଙ୍କୁ ୧୦୪୧/୨୨-୨୩ ରେ ଗିରଫ କରାଯାଇଛି ବୋଲି ଅବକାରୀ ଗୁଇନ୍ଦା ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତ ସୂଚନା ଦେଇଛନ୍ତି। ଜେରା ବେଳେ ଗୋପାଳ ଗୋପାଳପୁରରେ ରହି ଏହି ଗଞ୍ଜେଇ କାରବାର କରୁଥିବା ଜଣାପଡିଛି। ସେ ଉକ୍ତ ଗଞ୍ଜେଇ ମଧ୍ୟପ୍ରଦେଶ ଚାଲାଣ କରିଥାନ୍ତେ। ସେହିପରି ଗଗନ ଉକ୍ତ ଗଞ୍ଜେଇ ଭୁବନେଶ୍ୱର ନେଇ ଯାଉଥିଲେ ବୋଲି ଅବକାରୀ ଟିମ୍ ଜାଣିବାକୁ ପାଇଛି। ଘଟଣାରୁ ପ୍ରକାଶ ଯେ, ବ୍ରହ୍ମପୁରରୁ ଏକ ଯାତ୍ରୀବାହୀ ବସ୍ରେ ଗଞ୍ଜେଇ ଚାଲାଣ ହେଉଥିବା ନେଇ ଅବକାରୀ ଟିମ୍କୁ ଖବର ମିଳିଥିଲା। ଏହାକୁ ଆଧାର କରି ଏକ ଟିମ୍ ଗୋପାଳପୁର ଜଙ୍କସନରେ ମଙ୍ଗଳବାର ଯାନବାହନ ଯାଞ୍ଚ କରିଥିଲା। ଭୁବନେଶ୍ୱର ଅଭିମୁଖେ ଯାଉଥିବା ଏକ ଘରୋଇ ବସ୍ ଯାଞ୍ଚ ବେଳେ ଦୁଇ ଜଣ ଯାତ୍ରୀଙ୍କ ଠାରୁ ଉକ୍ତ ଗଞ୍ଜେଇ ଜବତ ହୋଇଛି। ଅଭିଯୁକ୍ତ ଦ୍ୱୟଙ୍କୁ ବୁଧବାର କୋର୍ଟ ଚାଲାଣ କରାଯିବ ବୋଲି ଅବକାରୀ ପୋଲିସ କହିଛି। ଯାଞ୍ଚ ବେଳେ ଉକ୍ତ ଟିମ୍ରେ ଅବକାରୀ ଗୁଇନ୍ଦା ଇନ୍ସପେକ୍ଟର ହ୍ରଦୟ ଚନ୍ଦ୍ର ସାମନ୍ତ, ଏଏସ୍ଆଇ ସୁରେନ୍ଦ୍ର ପ୍ରଧାନ, ବ୍ରଜ ବିହାରୀ ନାୟକ, କନେଷ୍ଟେବଲ କପିଳାସ ଭତ୍ରା , କୁମୁଦ ପ୍ରଧାନ, ସନ୍ତୋଷ ନାୟକ ସୁବ୍ରତ ବେହେରା , ସୁଭମ ସ୍ବାଇଁ , ଭଗବାନ ହେମ୍ରମ ପ୍ରମୁଖ ସାମିଲ ଥିଲେ।
