ହରାରେ, ୬।୧: ଉତ୍ତର ଜିମ୍ବାଓ୍ବେର ମେଶୋନାଲେଣ୍ଡ ପଶ୍ଚିମ ପ୍ରଦେଶର ‘କରିବା ଗ୍ରାମୀଣ’ ଜିଲାଲ ୭ ବର୍ଷୀୟ ବାଳକ ଟିନୋଟେଡା ପୁଡୁଙ୍କ କାହାଣୀ ସାରା ବିଶ୍ୱର ଦୃଷ୍ଟି ଆକର୍ଷଣ କରିଛି। ସେ ୫ ଦିନ ସିଂହ ଅଭୟାରଣ୍ୟ ମଧ୍ୟରେ ଭୟଙ୍କର ବନ୍ୟଜନ୍ତୁଙ୍କ ସହ ବିତାଇ ଜୀବିତ ଉଦ୍ଧାର ହୋଇଛନ୍ତି। ଏହାକୁ ସମସ୍ତେ ଚମତ୍କାର କହୁଛନ୍ତି।
ଗତ ମାସ ୩୦ ତାରିଖରେ ସ୍ଥାନୀୟ ନ୍ୟାମିନ୍ୟାମି ସମୁଦାୟର ପୁଡୁ ରାସ୍ତା ଭୁଲି ନିଜ ଘରଠାରୁ ୨୩ କି.ମି. ଦୂର ସିଂହ ସଂରକ୍ଷଣ ପାଇଁ ପ୍ରସିଦ୍ଧ ମାତୁସାଦୋନା ଜାତୀୟ ପାର୍କକୁ ଚାଲିଯାଇଥିଲେ। ଏହାପରେ ପରିବାର ଲୋକେ ଏବଂ ଗ୍ରାମବାସୀ ପୁଡୁଙ୍କୁ ଖୋଜିବାକୁ ବହୁ ପ୍ରୟାସ କରିଥିଲେ ମଧ୍ୟ ବିଫଳ ହୋଇଥିଲେ। ତେବେ ନିଖୋଜ ହେବାର ୫ ଦିନ ପରେ ଶନିବାର ମାତୁସାଦୋନା ଜାତୀୟ ପାର୍କର ରେଞ୍ଜରମାନେ ପୁଡୁଙ୍କୁ ଜୀବିତ ଉଦ୍ଧାର କରିଥିଲେ। ଉଦ୍ଧାର ହେବା ପରେ ପୁଡୁ କହିଛନ୍ତି, ତାଙ୍କ ଘର ମରୁଡ଼ି ପ୍ରଭାବିତ ଅଞ୍ଚଳରେ ହୋଇଥିବାରୁ ମାଟି ଖୋଳି ପାଣି କିପରି ପିଆଯାଏ, ଏହା ସେ ଜାଣିଥିଲେ। ଏପରିକି ଏଥିପାଇଁ କେଉଁ ଭୂମି ଉପଯୁକ୍ତ ତାହା ମଧ୍ୟ ତାଙ୍କୁ ଶିକ୍ଷା ଦିଆଯାଇଥିବା ପୁଡୁ କହିଛନ୍ତି। ସେ ଜଙ୍ଗଲ ମଧ୍ୟରେ ବାଡ଼ି ସାହାଯ୍ୟରେ ମାଟି ଖୋଳି ବାହାରୁଥିବା ପାଣିକୁ ପିଇ ବଞ୍ଚି ରହୁଥିଲେ। ପୁଡ଼ୁ ଆହୁରି କହିଛନ୍ତି, ସେ ଜଙ୍ଗଲ ମଧ୍ୟରେ ବିଭିନ୍ନ ଫଳ ଖାଉଥିଲେ। ସେହିପରି ସେ ଉଚ୍ଚ ପଥର ମଧ୍ୟରେ ଲୁଚି କରି ଶୋଉଥିଲେ, ଯାହାଫଳରେ ସିଂହ ଏବଂ ଅନ୍ୟାନ୍ୟ ହିଂସ୍ର ବନ୍ୟଜନ୍ତୁମାନେ ତାଙ୍କ ନିକଟକୁ ପହଞ୍ଚି ପାରିବେ ନାହିଁ। ଏହିପରି ଭାବେ ସେ ବନ୍ୟଜନ୍ତୁଙ୍କଠାରୁ ନିଜକୁ ରକ୍ଷା କରି ଜଙ୍ଗଲ ମଧ୍ୟରେ ତିଷ୍ଠି ପାରିଥିଲେ ବୋଲି ପୁଡୁ କହିଛନ୍ତି।
ଜିମ୍ବାଓ୍ବେର ସାଂସଦ ମୁତ୍ସା ମୁରୋମ୍ବେଦଜୀ ରବିବାର ପୁଡୁଙ୍କ କାହାଣୀକୁ ସୋସିଆଲ ମିଡିଆରେ ଶେୟାର କରିଛନ୍ତି,
ଜଙ୍ଗଲରେ ସିଂହ ଯାହା ଭାଇରାଲ ହେବାରେ ଲାଗିଛି। ମୁତ୍ସା ଏକ୍ସ’ରେ ପୁଡୁଙ୍କ ଏକ ଫଟୋ ପୋଷ୍ଟ କରି ଲେଖିଛନ୍ତି, ଏହା ନିଶ୍ଚିତ ଭାବେ ଏକ ଚମତ୍କାର ଘଟଣା। ଉତ୍ତର ଜିମ୍ବାଓ୍ବେର ‘କରିବା ଗ୍ରାମୀଣ’ ହେଉଛି ଏପରି ଏକ ଅଞ୍ଚଳ ଯେଉଁଠାରେ ଗୋଟିଏ ଭୁଲ୍ ମୋଡ଼ ମଣିଷକୁ ବିପଜ୍ଜନକ ମାତୁସାଦୋନା ସିଂହ ଅଭୟାରଣ୍ୟକୁ ନେଇପାରେ। ପୁଡୁ ସହ ମଧ୍ୟ ଠିକ୍ ଏପରି ହୋଇଥିଲା ଏବଂ ସେ ରାସ୍ତା ଭୁଲି ମାତୁସାଦୋନା ଜାତୀୟ ପାର୍କକୁ ଚାଲିଯାଇଥିଲେ। ଘଟଣାକୁ ନେଇ ଜିମ୍ବାଓ୍ବେ ‘ପାର୍କ୍ସ ଆଣ୍ଡ୍ ଓ୍ବାଇଲ୍ଡଲାଇଫ୍ ମ୍ୟାନେଜମେଣ୍ଟ ଅଥରିଟି’ କହିଛନ୍ତି, ପୁଡୁ ପାର୍କ ମଧ୍ୟରେ ପ୍ରବେଶ କରିବା ପରେ ପ୍ରାୟ ୫୦ କି.ମି. ଚାଲି ଚାଲି ଅଭୟାରଣ୍ୟର ଅପହଞ୍ଚ ଅଞ୍ଚଳରେ ପହଞ୍ଚି ଯାଇଥିଲେ। ଏହି ସମୟରେ ବର୍ଷା ମଧ୍ୟ ହୋଇଥିଲା, ଫଳରେ ପୁଡୁଙ୍କର ପାଦ ଚିହ୍ନ ଲିଭିଯାଇଥିଲା। ତେଣୁ ତାଙ୍କୁ ଖୋଜିବା ବନ ଅଧିକାରୀମାନଙ୍କ ପାଇଁ କାଠିକର ପାଠ ହୋଇପଡ଼ିଥିଲା। ପୁଡୁଙ୍କୁ ଉଦ୍ଧାର କରାଯିବା ପରେ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ଅବସ୍ଥା ସ୍ଥିର ଥିବା ଡାକ୍ତର କହିଛନ୍ତି। ଡାକ୍ତର ପୁଡୁଙ୍କ ମାନସିକ ସ୍ଥିତିକୁ ମଧ୍ୟ ପରୀକ୍ଷା କରୁଛନ୍ତି। ତେବେ ପୁଡୁଙ୍କ ସାହସିକତାକୁ ବିଶ୍ୱବ୍ୟାପୀ ପ୍ରଶଂସାର ସୁଅ ଛୁଟିଛି।
