କୋକସରା,୫।୧୧(ଡି.ଏନ.ଏ.)-ଦଲାଲଙ୍କ ଦ୍ୱାରା ପ୍ରତାରିତ ହୋଇ ଠିକାଦାରଙ୍କ ପାଖରେ ଅଟକ ରହି ନିର୍ଯାତନା ଭୋଗୁଥିବା ୭ ଦାଦନ ଶ୍ରମିକଙ୍କୁ ବୁଧବାର କୋକସରା ପୋଲିସ ଉଦ୍ଧାର କରିଛି । ଏହି ଘଟଣାର ମୁଖ୍ୟ କୁହାଯାଉଥିବା ଦାଦନ ଦଲାଲ କୃଷ୍ଣ ଦୁର୍ଗାଙ୍କୁ ପୋଲିସ ଗିରଫ କରିଛି । ଉଦ୍ଧାର ଶ୍ରମିକଙ୍କ ମଧ୍ୟରେ ବେହେରା ରଏନଗୁଡାର ୨ ଜଣ ଓ ଆମପାଣି ଥାନା ଅଧୀନ ଦାବ୍ରିଗୁଡାର ୫ ଜଣ ଶ୍ରମିକ ରହିଛନ୍ତି । କୋକସରା ପୋଲିସ ସେମାନଙ୍କୁ ମଧ୍ୟପ୍ରଦେଶର ରତଳାମ ଜିଲା ତାଲ ଥାନା ଅଧୀନ କନୱାର ଗ୍ରାମରୁ ଉଦ୍ଧାର କରି ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି ।
ସୂଚନା ଅନୁସାରେ ବେହେରା ରଏନଗୁଡା ଗ୍ରାମର ଭରତ ମାଝି (୩୫) ଓ ଚତୁର ମାଝି(୩୦)ଙ୍କୁ ବିଭିନ୍ନ ପ୍ରଲୋଭନ ଦେଖାଇ ଛତାଗୋଏରା ଗ୍ରାମର ଦାଦନ ଦଲାଲ କୃଷ୍ଣ ଦୁର୍ଗା ଗତ ୧୬ ତାରିଖ ଦିନ ନବରଙ୍ଗପୁର ଜିଲା ଉମରକୋଟରେ କାମ କରିବାକୁ କହି ସାଙ୍ଗରେ ନେଇଥିଲେ ା ହେଲେ ସେହି ୨ ଭାଇଙ୍କୁ ମଧ୍ୟପ୍ରଦେଶର ରତଲାମ ଜିଲା ତାଲ ଥାନା ଅଧୀନ କନୱାର ଗ୍ରାମର ଏକ ବୋରୱାଲ କମ୍ପାନୀର ଠିକାଦାରଙ୍କ ପାଖରେ ୮୦ ହଜାର ଟଙ୍କାରେ ବନ୍ଧକ ପକାଇ ଚାଲି ଆସିଥିଲେ । ପରେ ଭରତ ଓ ଚତୁର ଏ ସଂକ୍ରାନ୍ତରେ ଜାଣିବା ପରେ ପରିବାର ଲୋକଙ୍କୁ କହିଥିଲେ ା ସେମାନଙ୍କ ପରିବାର ପକ୍ଷରୁ ଏ ନେଇ ୨୯ ତାରିଖ ଦିନ କୋକସରା ଥାନାରେ ଲିଖିତ ଅଭିଯୋଗ କରାଯାଇଥିଲା । କୋକସରା ଥାନା ଏଏସଆଇ ଜନ୍ମେଜୟ ବାଗଙ୍କ ନେତୃତ୍ୱରେ ଏକ ପୋଲିସ ଟିମ୍ ମଧ୍ୟପ୍ରଦେଶରେ ପହଞ୍ଚତ୍ ସ୍ଥାନୀୟ ପୋଲିିସ ସହାୟତାରେ ଭରତ ଓ ଚତୁରଙ୍କୁ ଉଦ୍ଧାର କରିବା ସହ ଆମପାଣି ଥାନା ଅଧୀନରେ ଥିବା ଦାବ୍ରିଗୁଡାର ତୋଫାନ ପାତ୍ର (୩୦), ଯୁଧିଷ୍ଠିର ନାଏକ (୨୦), କୁମୁଦ ମାଝି (୨୫), ସତ୍ୟ ନାଏକ (୨୭), ବାଳ କୃଷ୍ଣ ନାଏକ (୨୧) ଙ୍କୁ ମଧ୍ୟ ଉଦ୍ଧାର କରିଥିଲା ା
