ଗୁଆହାଟି,୨୩।୪: ଲୋକ ସଭା ନିର୍ବାଚନର ତୃତୀୟ ପର୍ଯ୍ୟାୟ ମତଦାନ ମଙ୍ଗଳବାର ଅନୁଷ୍ଠିତ ହୋଇଛି। ଏଥିରେ ପ୍ରତ୍ୟେକ ନାଗରିକ ସେମାନଙ୍କ ଭୋଟଦାନ ଅଧିକାରକୁ ସାବ୍ୟସ୍ତ କରିବା ପାଇଁ କୁହାଯାଉଛି। ଏବେ ଏଥିରୁ ବାଦ୍ ଯାଇ ନାହାଁନ୍ତି ଆସାମର ଜଣେ କର୍କଟ ପୀଡିତ ବ୍ୟକ୍ତି। ବସିର ଅଲି(୬୮) ନାମକ ଏହି ବ୍ୟକ୍ତି କର୍କଟରେ ପୀଡିତ। ଡାକ୍ତର ତାଙ୍କୁ ବିଶ୍ରାମ ନେବା ପାଇଁ ପରାମର୍ଶ ଦେଇଛନ୍ତି। ଏହାପରେ ବି ସେ ନାକରେ ନଳୀ ଲାଗିଥିବା ଅବସ୍ଥାରେ ମତଦାନ କେନ୍ଦ୍ରକୁ ଯାଇ ଭୋଟ ଦେଇ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ବାସିରଙ୍କ ସହ ତାଙ୍କର ଜଣେ ପିଲାଦିନର ସାଥୀ ମୁକୁତ ଚୌଧୁରୀ ତାଙ୍କୁ ଭୋଟ ଗ୍ରହଣ କେନ୍ଦ୍ରକୁ ନେବାରେ ସାହାଯ୍ୟ କରିଥିଲେ। ସେ କୁହନ୍ତି ବାସିର ଏବେ କର୍କଟର ଶେଷ ପର୍ଯ୍ୟାୟରେ। ହୁଏତ ସେ ଆମ ପାଖରେ ଖୁବ୍ କମ୍ ସମୟର ଅତିଥି। ହେଲେ ବି ତାଙ୍କ ଦୃଢ ମନୋବଳ ପାଇଁ ସେ ଆଜି ନିଜର ନାଗରିକ ଅଧିକାର ସାବ୍ୟସ୍ତ କରିଛନ୍ତି। ସୂଚନାଯୋଗ୍ୟ, ତୃତୀୟ ପର୍ଯ୍ୟାୟ ନିର୍ବାଚନରେ ଆସାମର ପ୍ରାୟ ୭୪ ଲକ୍ଷ ଭୋଟର ୫୪ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି।
