ଜଗତ୍ସିଂହପୁର ଅଫିସ, ୧୫।୧୨: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ଜଗତ୍ସିଂହପୁର ଜିଲାରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ)ରେ ସ୍ମାର୍ଟ ହେଲ୍ଥ କାର୍ଡ ବଣ୍ଟନ ଅବସରରେ ୭୯୪ କୋଟି ଟଙ୍କାରେ ୩୬୨ଟି ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ ଓ ଉଦ୍ଘାଟନ କରିଛନ୍ତି। ଜିଲାପାଳଙ୍କ କାର୍ଯ୍ୟାଳୟ ପରିସର ପଡିଆରେ ଆୟୋଜିତ କାର୍ଯ୍ୟକ୍ରମରେ ଆଭାସୀ ମାଧ୍ୟମରେ ମୁଖ୍ୟମନ୍ତ୍ରୀ ୧୪୮ଟି ପ୍ରକଳ୍ପ (ବ୍ୟୟ ବରାଦ ୫୧.୬୭ କୋଟି ଟଙ୍କା) ଉଦ୍ଘାଟନ କରିଥିଲେ । ସେଥିମଧ୍ୟରୁ ବିଦ୍ୟୁତ ଶକ୍ତି ଯୋଗାଣ କ୍ଷେତ୍ରରେ ୫ଟି ପ୍ରକଳ୍ପ ପାଇଁ ୩୪.୮୬ କୋଟି ଟଙ୍କା ରହିଛି। ସେହିପରି ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ଯୋଜନାରେ ୧୦୬ଟି ପ୍ରକଳ୍ପ ପାଇଁ ୫.୫୯ କୋଟି, ସାଧାରଣ ସୁବିଧା ଭିତ୍ତିଭୂମି ବିକାଶ, ଶିକ୍ଷା ବିକାଶ, ବଜାର ସୁବିଧା, ଆବାସିକ ସୁବିଧା ବିକାଶ, ରାସ୍ତା ଏବଂ ପାନୀୟ ଜଳ ଯୋଗାଣ ବାବଦରେ ୩୭ଟି ପ୍ରକଳ୍ପ ପାଇଁ ୧୧.୨୨ ଲକ୍ଷ ଟଙ୍କା ବ୍ୟୟ ବରାଦ କରାଯାଇଛି । ଅନୁରୂପ ଭାବେ ୨୧୪ଟି ପ୍ରକଳ୍ପ (୭୪୨.୪୫ କୋଟି ଟଙ୍କା ବ୍ୟୟ ଅଟକଳ)ର ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ସେଗୁଡିକ ମଧ୍ୟରୁ ପାନୀୟ ଜଳ ଯୋଗାଣ, ଜଳସେଚନ ଓ ବନ୍ୟାଜଳ ନିୟନ୍ତ୍ରଣ ବାବଦରେ ୧୨୭ଟି ପ୍ରକଳ୍ପ ପାଇଁ ୬୪୨.୭୦ କୋଟି ଟଙ୍କା ବ୍ୟୟ ଅଟକଳ କରାଯାଇଛି । ରାସ୍ତା ଓ ସେତୁ ବାବଦରେ ୩୧ଟି ପ୍ରକଳ୍ପ ନିମନ୍ତେ ୫୯.୮୩ କୋଟି, ଶିକ୍ଷା ଭିତ୍ତିଭୂମି ବିକାଶ ବାବଦରେ ୩ଟି ପ୍ରକଳ୍ପ ପାଇଁ ୧୮.୨୧ କୋଟି, ସାଧାରଣ ସୁବିଧା ଭିତ୍ତିଭୂମି ବିକାଶ, ବଜାର ସୁବିଧା ଓ କ୍ରୀଡା ଭିତ୍ତିଭୂମି ବିକାଶ ବାବଦରେ ୫୩ଟି ପ୍ରକଳ୍ପ ପାଇଁ ୨୧.୭୧ ଲକ୍ଷ ଟଙ୍କା ବ୍ୟୟ ବରାଦ କରାଯାଇଛି।
