ଖରିଫ୍‌ ଧାନ ବିକ୍ରି ପାଇଁ ୬୪,୨୯୮ ଚାଷୀ ପଞ୍ଜୀକୃତ
1:23 pmAugust 28, 2022August 28, 2022 / 09

ବାରିପଦା ଅଫିସ,୨୮।୮: ଖରିଫ ଋତୁରେ ଉପତ୍ାଦିତ ହେବାକୁ ଥିବା ଧାନ ସରକାରୀ ମଣ୍ଡିରେ ବିକ୍ରି ନିମନ୍ତେ ମୟୂରଭଞ୍ଜ ଜିଲାରେ ଚାଷୀମାନେ ନାମ ପଞ୍ଜୀକରଣ କରିଛନ୍ତି। ପଞ୍ଜୀକରଣ ପାଇଁ ରବିବାର ଶେଷ ସୁଯୋଗ ଥିବାବେଳେ ଶନିବାର ସୁଦ୍ଧା ଜିଲାରେ ମୋଟ ୬୪ ହଜାର ୨୯୮ ଜଣ ଚାଷୀ ନିଜର ନାମ ପଞ୍ଜୀକୃତ କରିଛନ୍ତି। ଜିଲାର ୫୨ ସମବାୟ ସମିତି ପକ୍ଷରୁ ପ୍ରାୟତଃ ଆଶୟୀ ସମସ୍ତ ଚାଷୀଙ୍କ ନାମ ପଞ୍ଜୀକରଣ ପ୍ରକ୍ରିୟା ସମ୍ପୂର୍ଣ୍ଣ କରାଯାଇଛି। ଉତ୍ପାଦିତ ଧାନ ବିକ୍ରି ଆଶାୟୀ ଚାଷୀ, ସମବାୟ ସମିତି ଏହାର ସୁଯୋଗ ନେବାକୁ ଡିଆର୍‌ସିଏସ୍‌ କହିଛନ୍ତି।
ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ଚଳିତ ଖରିଫ ଫସଲ ଖସଡ଼ା ୪,୩୭,୦୦୦ ହେକ୍ଟର ହୋଇଥିବା ବେଳେ ଧାନ ଚାଷ ପାଇଁ ୨,୮୩,୦୦୦ ହେକ୍ଟର ରହିଛି। ୩ ଲକ୍ଷ ୭୫ ହଜାରରୁ ଊର୍ଦ୍ଧ୍ୱ ଚାଷୀ ଧାନ ଚାଷ କରୁଥିଲେ ହେଁ ବଳକା ବା ବିକ୍ରି ଯୋଗ୍ୟ ଧାନକୁ ଚାଷୀ ବିକ୍ରି କରିଥାଏ। ସରକାରଙ୍କ ପକ୍ଷରୁ ଜିଲା ଯୋଗାଣ ବିଭାଗ ତତ୍ତ୍ୱାବଧାନରେ ଜିଲାର ୫୨ ଲାମ୍ପ୍ସ ଅଧୀନରେ ୧୦୦ଟି କେନ୍ଦ୍ର (ମଣ୍ଡି)ରେ ଚାଷୀଙ୍କଠାରୁ ଡିସେମ୍ବର ମାସ ମଧ୍ୟଭାଗରୁ ଧାନକିଣା ଆରମ୍ଭ ହୋଇଥାଏ। ଚଳିତଥର ସମ୍ପୂର୍ଣ୍ଣ ନୂତନ ପଦ୍ଧତିରେ ଚାଷୀଙ୍କ ନାମ ପଞ୍ଜୀକରଣ କରାଯାଇଛି। ପଞ୍ଜୀକରଣ ସମୟରେ ଚାଷୀ ଧାନ ବିକ୍ରି କରିବାର ମାସ ଓ ପକ୍ଷ ଉଲ୍ଲେଖ କରାଯାଇଛି। ସେହିପରି ମଣ୍ଡିର ନାମ, ନିଜର ଜଳସେଚନ ଉତ୍ସ ଥିଲେ ତା’ର ବିଦ୍ୟୁତ୍‌ ବିଲ୍‌ର ନକଲ ଓ ଉପଭୋକ୍ତା ନମ୍ବର ଦେବାକୁ ପଡ଼ିଛି। ପଞ୍ଜୀକରଣ ସହ ଆଧାର କାର୍ଡ, ବ୍ୟାଙ୍କ ପାସ୍‌ବୁକ୍‌ ଓ ଚାଷଜମି ବିବରଣୀର ନକଲ ଦେଇଛନ୍ତି। ଏନେଇ ସମବାୟ ସମିତିରେ ଏକ ହେଲ୍ପ ଡେସ୍କ ଚାଷୀଙ୍କୁ ସହାୟତା କରିଥିବାରୁ ଗତବର୍ଷ ତୁଳନାରେ ଚଳିତବର୍ଷ ଅଧିକ ଚାଷୀ ପଞ୍ଜୀକରଣ କରିଛନ୍ତି। ୫୨ ଲାମ୍ପ୍ସ ମଧ୍ୟରୁ ଶୁକୃଳିରେ ସର୍ବାଧିକ ୩୧୨୧ ଚାଷୀ ନାମ ପଞ୍ଜୀକୃତ କରିଥିବା ବେଳେ ବୈଶିଙ୍ଗାରେ ୨୭୨୯ ଓ ଯଶିପୁରରେ ୨୨୨୮ ଜଣ ପଞ୍ଜୀକରଣ କରିଥିବାରୁ ଦ୍ୱିତୀୟ ଏବଂ ତୃତୀୟ ସର୍ବାଧିକ ସ୍ଥାନରେ ରହିଛି। ବାଙ୍କିଶୋଳ ଲାମ୍ପ୍ସରେ ମାତ୍ର ୧୬୭ ଚାଷୀ ପଞ୍ଜୀକରଣ କରିଥିବା ଯୋଗୁ ଜିଲାର ସର୍ବନିମ୍ନ ସ୍ଥାନରେ ଅଛି।