ନୂଆଦିଲ୍ଲୀ,୧୦।୮: ଜଳବାୟୁ ପରିବର୍ତ୍ତନର ପ୍ରଭାବ ଯୋଗୁ ରାତି ବେଳା ତାପମାତ୍ରା ବୃଦ୍ଧି ପାଉଛି। ଫଳରେ ସ୍ବାଭାବିକ ନିଦ୍ରାରେ ବ୍ୟାଘାତ ଘଟୁଛି। ରାତି ତାପମାତ୍ରା ବୃଦ୍ଧି ଯୋଗୁ ଭବିଷ୍ୟତରେ ଲୋକଙ୍କ ମୃତ୍ୟୁ ଆଶଙ୍କା ୬ ଗୁଣ ବଢ଼ାଇପାରେ ବୋଲି ଏକ ନୂତନ ଅଧ୍ୟୟନରେ ସତର୍କ କରିଦିଆଯାଇଛି।
ଲାନସେଟ୍ ପ୍ଲାନେଟାରୀ ହେଲ୍ଥ ନାମକ ପୁସ୍ତକରେ ପ୍ରକାଶିତ ଅଧ୍ୟୟନ ଅନୁଯାୟୀ ଯେତେବେଳେ ଆପଣ ନିଦ୍ରା ଯାଆନ୍ତି, ସେତେବେଳେ ଆପଣଙ୍କ ଶରୀର ଓ ମାଂସପେଶୀର ମରାମତି ହୋଇଥାଏ ଓ ଏହା ସେଗୁଡ଼ିକର ବୃଦ୍ଧିରେ ସହାୟକ ହୁଏ। ନିଦ୍ରା ସମୟରେ ଆପଣଙ୍କ ଶରୀର ପ୍ରୋଟିନ୍ ପ୍ରସ୍ତୁତ କରେ ଓ ଏହା କୋଷଗୁଡ଼ିକର ନିର୍ମାଣ ଓ ମରାମତିରେ ସାହାଯ୍ୟ କରିଥାଏ। ତେବେ ଜଳବାୟୁ ପରିବର୍ତ୍ତନ ଯୋଗୁ ରାତ୍ର ସମୟର ତାପମାତ୍ରା ବଢ଼ିବା ଉଦ୍ବେଗର କାରଣ ହୋଇଛି। ଆଗାମୀ ବର୍ଷଗୁଡ଼ିକରେ ରାତି ଅତ୍ୟଧିକ ଉତ୍ତପ୍ତ ହେବାକୁ ଯାଉଛି। ଏହାର ପରିଣାମରେ ସାରା ବିଶ୍ୱରେ ମାନବ ମୃତ୍ୟୁ ହାର ଚଳିତ ଶତାବ୍ଦୀ ଶେଷ ବେଳକୁ ୬୦ ପ୍ରତିଶତ ବଢ଼ିବା ପୂର୍ବାନୁମାନ କରାଯାଇଛି। ଚାଇନା, ଦକ୍ଷିଣ କୋରିଆ, ଜାପାନ, ଜର୍ମାନୀ ଏବଂ ଆମେରିକାର ବୈଜ୍ଞାନିକମାନେ ଗବେଷଣାରୁ ଏହା ଜାଣିବାକୁ ପାଇଛନ୍ତି।
ରାତି ତାପମାତ୍ରା ବୃଦ୍ଧି ଯୋଗୁ କମ୍ ନିଦ ଶରୀରର ରୋଗ ପ୍ରତିରୋଧ ଶକ୍ତିକୁ ନଷ୍ଟ କରିଦେଇପାରେ। ଏଥିସହିତ ହୃଦ୍ରୋଗ, ଦୀର୍ଘମିଆଦୀ ରୋଗ, ପ୍ରଦାହ, ମାନସିକ ସ୍ବାସ୍ଥ୍ୟାବସ୍ଥା ଉପରେ ଅଧିକ ବିପଦ ଦେଖାଦେବ ବୋଲି ଅଧ୍ୟୟନରେ କୁହାଯାଇଛି। ରାତି ଉତ୍ତାପ ବଢ଼ୁଥିବା ନେଇ ସତର୍କ କରାଗଲେ ମଧ୍ୟ ଏହାକୁ କ୍ରମାଗତ ଭାବେ ଅଣଦେଖା କରାଯାଉଥିବା ଅଧ୍ୟୟନର ଅନ୍ୟତମ ଲେଖକ ତଥା ଉତ୍ତର କାରୋଲିନା ୟୁନିଭର୍ସିଟିର ଜଳବାୟୁ ବୈଜ୍ଞାନିକ ୟୁକିଆଙ୍ଗ ଝାଙ୍ଗ୍ କହିଛନ୍ତି।
ଆକଳନ ଅନୁଯାୟୀ ୨୦୯୦ ସୁଦ୍ଧା ରାତି ତାପମାତ୍ରା ପାଖାପାଖି ୨ ଗୁଣ ହୋଇଯିବ। ପୂର୍ବ ଏସିଆର ୨୮ଟି ସହରରେ ଏହି ସମୟରେ ରାତି ତାପମାତ୍ରା ୨୦.୪ରୁ ବୃଦ୍ଧି ପାଇ ୩୯.୭ ଡିଗ୍ରୀ ସେଲ୍ସିୟସରେ ପହଞ୍ଚତ୍ବ ବୋଲି ଆକଳନ କରାଯାଇଛି। ଏଥିଯୋଗୁ ବିଭିନ୍ନ ରୋଗ ମଧ୍ୟ ଦେଖାଦେବ। ଜଳବାୟୁ ପରିବର୍ତ୍ତନ ଓ ମୃତ୍ୟୁ ହାର ଉପରେ ଏହାର ପ୍ରଭାବ ନେଇ ହୋଇଥିବା ପ୍ରଥମ ଅଧ୍ୟୟନରେ ଏହା କୁହାଯାଇଛି।
