ଢେଙ୍କାନାଳ ଅଫିସ,୯।୨: ମହାବିରୋଡ଼ ଗ୍ରାମ୍ୟ ବ୍ୟାଙ୍କ ସମେତ ପରଜଙ୍ଗ ଥାନା ଅଞ୍ଚଳରୁ ୩ଟି ଲୁଟ୍ ଘଟଣାର ଗୁରୁବାର ପର୍ଦ୍ଦାଫାସ କରିଛି ଢେଙ୍କାନାଳ ପୋଲିସ। ଜିଲା ପୋଲିସ କାର୍ଯ୍ୟାଳୟଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଉତ୍ତର- କେନ୍ଦ୍ରାଞ୍ଚଳ ଡିଆଇଜି ବ୍ରିଜେଶ ରାୟ ୩ଟି ଲୁଟ୍ ଘଟଣା ସମ୍ପର୍କରେ ସୂଚନା ଦେଇ ଘଟଣାର ପର୍ଦ୍ଦାଫାଶ କରିଛନ୍ତି। ଡିିଆଇଜି କହିଛନ୍ତି, ଗତ ୩ ତାରିଖ ଅପରାହ୍ନରେ କିଛି ଦୁର୍ବୃତ୍ତ ମହାବିରୋଡ ଗ୍ରାମ୍ୟ ବ୍ୟାଙ୍କ ଶାଖାରୁ ୯ କେଜିର ସୁନା ଗହଣା, ନଗଦ ଛଅ ଲକ୍ଷ ଟଙ୍କା ଲୁଟି ନେଇଥିଲେ । ସେହିପରି ଗତ ଜାନୁୟାରୀ ୯ ଏବଂ ଅକ୍ଟୋବର ୭ ତାରିଖରେ ପରଜଙ୍ଗ ଥାନା ଅଞ୍ଚଳରୁ ୨ଟି ଟଙ୍କା ଲୁଟ୍ ହୋଇଥିଲା । ଏହି ୩ଟି ଘଟଣା ର ତଦନ୍ତ ପାଇଁ ଜିଲା ପୋଲିସ ପକ୍ଷରୁ ୫ଟି ଟିମ୍ରେ ୫୦ ଜଣ ଅଧିକାରୀ ଓ କର୍ମଚାରୀଙ୍କୁ ନେଇ ବିଭିନ୍ନ ଜାଗାରେ ଚଢାଉ ଜାରି ରହିଥିଲା । ତେବେ ଗୁରୁବାର ପୋଲିସ ୬ କେଜି ୧୨୦ ଗ୍ରାମ ସୁନା ଓ ୪ ଲକ୍ଷ ୩୨ ହଜାର ନଗଦ ଟଙ୍କା ଜବତ କରିଛି। ଏହି ଘଟଣାରେ ଅନୁଗୋଳ, ଢ଼େଙ୍କାନାଳ ଓ ମୟୂରଭଞ୍ଜ ଜିଲାର ୯ ଜଣ ଡକାୟତଙ୍କୁ ପୋଲିସ ଗିରଫ କରିଥିବା ଜଣାପଡିଛ। ସେମାନଙ୍କଠାରୁ ୪ଟି ବାଇକ୍, ୩ଟି ଦେଶୀ ପିସ୍ତଲ, ୧୧ ଟି ଜିବନ୍ତ ଗୁଳି, ୩ଟି କଟୁରି ଓ ଭୁଜାଲି, ଗୋଟିଏ ପନଚିଙ୍ଗ ମେଶିନ୍ ଓ ୨୬ ଟି ମୋବାଇଲ ଜବତ ହୋଇଛ। ଘଟଣାର ତଦନ୍ତ ଜାରି ରହିଛ। ଆବଶ୍ୟକ ପଡିଲେ ଗିରଫ ଅଭିଯୁକ୍ତମାନଙ୍କୁ ରିମାଣ୍ଡରେ ନିଆଯିବ ବୋଲି ଡିଆଇଜି କହିଛନ୍ତି। ଏସ୍ପିଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ କାମାକ୍ଷାନଗର ଏସଡିପିଓଙ୍କ ନେତୃତ୍ୟରେ ଡକାୟତଙ୍କୁ ଧରିବା ପାଇଁ ଚଢ଼ାଉ ହୋଇଥିଲା। ଏଥିରେ ଅନୁଗୋଳ ଜିଲା ବଅଁରପାଳ ଥାନା ଓ ବିକ୍ରମପୁର ଥାନା ପୋଲିସ ମଧ୍ୟ ସହାୟତା କରିଥିଲେ। ସେହିପରି ଜାନୁୟାରୀ ୮ ତାରିଖରେ ସଦର ଥାନା ଅଞ୍ଚଳରୁ ୨୦ ଗ୍ରାମ ବ୍ରାଉନ ସୁଗାର ଜବତ ଘଟଣାରେ ଜଣେ ନାବାଳକଙ୍କ ସମେତ ୨ ଜଣ ଧରାପଡ଼ିଛନ୍ତି। ସେମାନଙ୍କ ଠାରୁ ପୋଲିସ ଗୋଟିଏ ପିସ୍ତଲ, ଗୋଟିଏ ଲାଇଟର ଗନ, ଓ ଗୋଟିଏ ବାଇକ୍ ଜବତ କରାଯାଇଛି । ଏହି ଘଟଣାରେ ଗିରଫ ଅଭିଯୁକ୍ତ କୁନା ପ୍ରଧାନଙ୍କ ନାମରେ ଢେଙ୍କାନାଳ ଓ ଅନୁଗୋଳ ଜିଲ୍ଲାର ବିଭିନ୍ନ ଥାନାରେ ୩୨ ଟି ଅପରାଧୀକ ମାମଲା ରହିଛି ବୋଲି ଡିିଆଇଜି ସୂଚନା ଦେଇଛନ୍ତି । ଏହି ଖବରଦାତା ସମ୍ମିଳନୀରେ ଏସ୍ପି ଜ୍ଞାନ ରଞ୍ଜନ ମହାପାତ୍ର ଉପସ୍ଥିତ ଥିଲେ।
