ପଟ୍ଟାମୁଣ୍ଡାଇ,୧୧।୧(ଡି.ଏନ.ଏ.): ପଟ୍ଟାମୁଣ୍ଡାଇ ଗ୍ରାମ ଉନ୍ନୟନ ବିଭାଗ ପକ୍ଷରୁ ମାଳିବସା ଠାରୁ ମିଜାଉଁଣୀ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ୫ କିମି ରାସ୍ତା ନିର୍ମାଣ ଚାଲିଛି। ଜଳସମ୍ପଦ ବିଭାଗ ୨ନଂ. କେନାଲ ବାମ ପାଶର୍ବ ଦେଇ ଏହି ରାସ୍ତା କାମ ଆରମ୍ଭ ହୋଇଛି। ଠିକାଦାର ବେଆଇନ ଭାବେ କେନାଲ ଭିତରୁ ଓ ପାର୍ଶ୍ୱରୁ ପ୍ରାୟ ୩ ଫୁଟ ମାଟି ଜେସିବିରେ ଉଠାଇ ରାସ୍ତା ଉଚ୍ଚା ଓ ଚଉଡା କରୁଛନ୍ତି। ଫଳରେ ଚାଷ ଜମିକୁ ପାଣି ମାଡିବା ବନ୍ଦ ହେବ ବୋଲି ଅଭିଯୋଗ ହୋଇଛି।
୨ନମ୍ବର କେନାଲ ଦ୍ବାରା ଜଳସେଚିତ ହେଉଥିବା ଜିଗରଣ, ବାଇପଦା, ମିଜାଉଁଣୀ, ବଡପଡା, କାଠିଆପଡା, ସାହୁପଡା ଓ ତିଗିରିଆ ଗ୍ରାମର ୫ ଶହ ଏକର ଜମି ଶୁଖିଲା ପଡିବ ବୋଲି ଚାଷୀମାନେ ଅଭିଯୋଗ କରିଛନ୍ତି। ଏନେଇ ପଟ୍ଟାମୁଣ୍ଡାଇ ଜଳସମ୍ପଦ ବିଭାଗ ସହକାରୀ ଯନ୍ତ୍ରୀ ଶକ୍ତିପ୍ରସାଦ ଦାଶ, ଅଳଭା ୧ନମ୍ବର କନିଷ୍ଠ ଯନ୍ତ୍ରୀ ସୁନୀଲ ନାୟକଙ୍କୁ ଚାଷୀମାନେ ଜଣାଇଛନ୍ତି। ଅନ୍ୟପକ୍ଷେ କେନାଲ ଭିତର ଓ ପାର୍ଶ୍ୱରୁ ମାଟି ନ ଉଠାଇବା ପାଇଁ ଜଳସମ୍ପଦ ବିଭାଗ ପଟ୍ଟାମୁଣ୍ଡାଇ ପକ୍ଷରୁ ୪୩୧ ଚିଠି ନମ୍ବର ୨୪ା୧୧ା୨୦୨୦ରେ ପଟ୍ଟାମୁଣ୍ଡାଇ ଆର୍ଡି ଏସ୍ଡିଓ ଓ କେନ୍ଦ୍ରାପଡା ଡିଭିଜନ ନିର୍ବାହୀଯନ୍ତ୍ରୀଙ୍କୁ ଅବଗତ କରାଯାଇଥିଲା। ହେଲେ ଜଳସମ୍ପଦ ବିଭାଗ ଚିଠିକୁ ବେଖାତିର କରି ଠିକାଦାର ଓ ଆର୍ଡି ଯନ୍ତ୍ରୀମାନେ କେନାଲରୁ ବେଆଇନ ଭାବେ ମାଟି ଉଠାଇ ଚାଲିଛନ୍ତି। ଏହାଦ୍ୱାରା ଜଳସେଚନ ବ୍ୟବସ୍ଥାରେ ବାଧା ସୃଷ୍ଟି ହୋଇଛି। ଫଳରେ ଗରିବ ଚାଷୀମାନେ ମୁଣ୍ଡରେ ହାତଦେଇ ବସିଛନ୍ତି। ଏ ସଂକ୍ରାନ୍ତରେ ସ୍ଥାନୀୟ ୫ ପଞ୍ଚାୟତର ଚାଷୀ ଦେବେନ୍ଦ୍ର ପ୍ରଧାନ, ସୁରେନ୍ଦ୍ର ପ୍ରଧାନ, ତପନ ଲେଙ୍କା, ମନୋଜ ଦାସ, ପ୍ରଦୀପ କର, ରମେଶ ପଣ୍ଡା, କଳାକର ପଣ୍ଡା, ମନୀଷା ରାଉତ, ସସ୍ମିତା ସାହୁ, ଗୋପୀନାଥ ଦାଶ, କୈଳାସ ମହାନ୍ତି, କ୍ଷୀରୋଦ ଦାସ, ପ୍ରଶାନ୍ତ ପଣ୍ଡା, ଚନ୍ଦ୍ରଭାନୁ ସାମଲଙ୍କ ସମେତ ଶତାଧିକ ଚାଷୀ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ, ଜଳସମ୍ପଦ ସଚିବ, କେନ୍ଦ୍ରାପଡା ଜିଲାପାଳଙ୍କୁ ଚିଠି ମାଧ୍ୟମରେ ଅବଗତ କରିଛନ୍ତି।
ପଟ୍ଟାମୁଣ୍ଡାଇ ଜଳସମ୍ପଦ ବିଭାଗ ମୁଖ୍ୟ କେନାଲ ସହିତ ୮ ଶାଖା କେନାଲ ଓ ସମସ୍ତ ଉପକେନାଲର ନବୀକରଣ ଓ ଉନ୍ନତି ପାଇଁ ୨୦୧୭-୧୮ ଆର୍ଥିକ ବର୍ଷରେ ଏସିଆ ଡେଭଲପ୍ମେଣ୍ଟ ବ୍ୟାଙ୍କ(ଏଡିବି) ଅନୁଦାନ ଅର୍ଥ ୧୦୦ କୋଟିରୁ ଅଧିକ ଟଙ୍କା ବ୍ୟୟ କରାଯାଇଥିଲା। ଜଗତପୁର ମହାନଦୀ ବ୍ୟାରେଜରୁ ପାଣି ଛଡାଗଲେ ଚାଷଜମି ଜଳସେଚିତ କରିବା ଲକ୍ଷ୍ୟ ଥିଲା। ମାତ୍ର ବହୁ କୋଟି ଟଙ୍କା ବ୍ୟୟ କରାଯାଇ ନବୀକରଣ ହୋଇଥିବା କେନାଲରେ ଏବେ ଶେଷ ମୁଣ୍ଡ ପର୍ଯ୍ୟନ୍ତ ପାଣି ଯିବ ନାହିଁ ବୋଲି ଚାଷୀମାନେ କହିଛନ୍ତି। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଚାଷୀମାନେ ଅନୁରୋଧ କରିଛନ୍ତି।
