ଭୁବନେଶ୍ୱର,୪।୩ (ବ୍ୟୁରୋ): ଗୁରୁବାର ଭୁବନେଶ୍ୱରରୁ ପୁନେ ଯାଉଥିବା ଏୟାର ଏସିଆ ବିମାନରେ ପକ୍ଷୀ ମାଡ ହେବା ପରେ ବିମାନ ବନ୍ଦର କର୍ତ୍ତୃପକ୍ଷ ଏବଂ ବିଏମ୍ସି ଘଟଣାକୁ ଗୁରୁତର ସହ ନେଇଛନ୍ତି। ରେଡ୍ ଜୋନ୍ରେ ଥିବା ଜାଗମରା ଅଞ୍ଚଳରୁ ଶୁକ୍ରବାର ବିଏମ୍ସି ଓ ବିଡିଏ ପକ୍ଷରୁ ରାସ୍ତା କଡ଼ରେ ଥିବା ଆମିଷ ଦୋକାନକୁ ହଟା ଯାଇଛି। ଏହି କ୍ରମରେ ପ୍ରାୟ ୫୦ଟି ମାଚ୍ଛ ଓ ଚିକେନ୍ ଦୋକାନକୁ ହଟା ଯାଇଛି। ସମ୍ପୃକ୍ତ ଅଞ୍ଚଳ ବିମାନ ବନ୍ଦର ନିକଟରେ ରହିଛି। ସେଠାରେ ଆମିଷ ଦୋକାନ ଥିବାରୁ ଆମିଷ ଗନ୍ଧରେ କାଉ ଏବଂ ଅନ୍ୟାନ୍ୟ ପକ୍ଷୀମାନେ ସେଠାକୁ ଆସୁଛନ୍ତି। ଫଳରେ ଏଭଳି ଏକ ଘଟଣା ଘଟିଛି। ତେଣୁ ଘଟଣାକୁ ଗୁରୁତର ସହ ନେଇ ବିଏମ୍ସି ଓ ବିଡିଏ ପକ୍ଷରୁ ଉଚ୍ଛେଦ କରାଯାଇଛି। ଆଗକୁ ସମ୍ପୃକ୍ତ ଅଞ୍ଚଳରେ ଥିବା ଫାଷ୍ଟଫୁଡ୍ ଦୋକାନକୁ ମଧ୍ୟ ହଟାଯିବ ବୋଲି ସୂଚନା ଦିଆଯାଇଛି। ଏଥିରେ ୩ଟି ଏନ୍ଫୋର୍ସମେଣ୍ଟ ସ୍କ୍ବାର୍ଡ ସାମିଲ ହୋଇଥିଲେ। ଏନେଇ ବିଏମ୍ସି ଅତିରିକ୍ତି କମିଶନର ବିନୟ କୁମାର ଦାଶ କହିଛନ୍ତି, ବିମାନ ବନ୍ଦର ଅଞ୍ଚଳରେ ଆମିଷ ଏବଂ ଖାଦ୍ୟାପେୟ ଦୋକାନ ନ କରିବା ପାଇଁ ଲୋକଙ୍କୁ ସଚେତନ କରାଯାଉଛି। ଆବଶ୍ୟକ ହେଲେ ଏନ୍ଫୋର୍ସମେଣ୍ଟ ମଧ୍ୟ କରାଯାଉଛି। ତେବେ ଏଥିରେ ଲୋକମାନେ ମଧ୍ୟ ସହଯୋଗ କରିବା ଆବଶ୍ୟକ ବୋଲି ସେ କହିଛନ୍ତି।
