ନରସିଂହପୁର,୨୫ା୫(ସ୍ବ.ପ୍ର.): ନରସିଂହପୁର ସଦର ମହକୁମାରେ ଥିବା ସର୍ବପୁରାତନ ଅନନ୍ତ ନାରାୟଣ ଉଚ୍ଚ ବିଦ୍ୟାଳୟ ୫-ଟି ରୂପାନ୍ତରିତ କରାଯାଇଛି। ସାମାନ୍ୟ ବର୍ଷାରେ ସ୍କୁଲର ସମ୍ମୁଖ ଭାଗ ୩୦ ମିଟର ଲମ୍ବା ପାଚେରି ବୁଧବାର ଭୁଶୁଡ଼ି ପଡ଼ିଛି। ଦୀର୍ଘବର୍ଷର ପୁରୁଣା ପାଚେରିରେ ଠିକାଦାର ରଙ୍ଗ ବୋଳି ଥିବାରୁ ଏଭଳି ଅଭାବନୀୟ ଘଟଣା ଘଟିଛି। ୨ ବର୍ଷ ମଧ୍ୟରେ ଏହି ସ୍କୁଲ ୫-ଟି ରୂପାନ୍ତରିତ ହୋଇ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟନ ହେବାର କିଛି ମାସ ପରେ ପ୍ରଥମେ ଅଳ୍ପ ପାଚେରି ଭୁଶୁଡ଼ି ପଡ଼ିଥିଲା। ବର୍ଷାଦିନେ ଛାତରୁ ପାଣି ଗଳି କମ୍ପ୍ୟୁଟର ସମେତ ବହୁ ଜିନିଷ, ନଥିପତ୍ର ନଷ୍ଟ ହେବା ସହ ଛାତ୍ରୀଛାତ୍ରମାନେ ବାରଣ୍ଡାରେ ବସି ପାଠ ପଢ଼ିବା ଘଟଣା ଦେଖିବାକୁ ମିଳିଥିଲା। ବିଦ୍ୟାଳୟଟିର କାମ ନିମ୍ନମାନର କରାଯାଇଥିବା ଚର୍ଚ୍ଚା ସାଧାରଣରୁ ଲିଭି ନ ଥିବା ବେଳେ ଏବେ ରଙ୍ଗ ବୋଳା ପୁରୁଣା ପାଚେରି ଭୁଶୁଡ଼ି ପଡ଼ିବା ଚର୍ଚ୍ଚାର ବିଷୟ ପାଲଟିଛି। ପାଚେରି ଭୁଶୁଡ଼ିବା ସମ୍ପର୍କରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ଥାନୀୟ ବିଡିଓ ନୀଳମାଧବ ସୁନା ପ୍ରତିକ୍ରିୟାରେ କହିଛନ୍ତି।
