ଚଣ୍ଡିଗଡ଼,୨୧ା୭: ପଞ୍ଜାବ ଗାୟକ ସିଦ୍ଧୁ ମୂସଓ୍ବୋଲାଙ୍କ ହତ୍ୟା ଅଭିଯୁକ୍ତ ତଥା ୨ ଶୁଟର ବୁଧବାର ପୋଲିସ ଏନ୍କାଉଣ୍ଟରରେ ନିହତ ହୋଇଛନ୍ତି। ମୃତ ଗ୍ୟାଙ୍ଗଷ୍ଟର ହେଲେ ଜଗ୍ରୂପ ସିଂ ରୂପା ଏବଂ ମନ୍ପ୍ରୀତ ମନୁ ଓରଫ ମନ୍ନୁ କୁସା। ଭାରତ-ପାକିସ୍ତାନ ସୀମାରୁ ୧୦ କିଲୋମିଟର ଦୂର ହୁସିଆରପୁରରେ ୫ ଘଣ୍ଟା ଧରି ପୋଲିସ ଏନ୍କାଉଣ୍ଟର କରିଥିଲା। କ୍ରସ୍ ଫାୟାରିଂରେ ଏକ ନ୍ୟୁଜ୍ ଚ୍ୟାନେଲର ଜଣେ କ୍ୟାମେରାମ୍ୟାନ୍ଙ୍କ ଗୋଡ଼ରେ ଗୁଳି ବାଜିଛି। ଆଉ ୩ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି। ଗ୍ୟାଙ୍ଗଷ୍ଟରଙ୍କ ନିକଟରୁ ଏକ ଏକେ-୪୭ ରାଇଫଲ, ପିସ୍ତଲ, ବିପୁଳ ସଂଖ୍ୟାରେ ବୁଲେଟ ଏବଂ ଏକ ବ୍ୟାଗ୍ ମିଳିଛି।
ମେ’ ୨୯ରେ କଂଗ୍ରେସ ନେତା ମୂସଓ୍ବୋଲାଙ୍କୁ ଗୁଳି କରି ହତ୍ୟା କରାଯିବା ପରଠାରୁ ଏଥିରେ ସମ୍ପୃକ୍ତ ୩ ଶୁଟର ଫେରାର ଥିଲେ। ଓ୍ବାଣ୍ଟେଡ୍ ତାଲିକାରେ ଥିବା ଏହି ୩ ଜଣଙ୍କୁ ଧରିବାକୁ ପୋଲିସ ଉଦ୍ୟମ ଜାରି ରଖିଥିଲା। ଜଗ୍ରୂପ ଏବଂ ମନ୍ପ୍ରୀତ ଡ୍ରଗ୍ସ ପାଇଁ ପଞ୍ଜାବ ଫେରିଥିବା ସୂଚନା ମିଳିବା ପରେ ଉଭୟଙ୍କୁ ଧରିବା ପାଇଁ ପୋଲିସ ଯୋଜନା କରିଥିଲା। ସେମାନେ ଏକ ଫାର୍ମ ହାଉସ୍ରେ ଲୁଚି ରହିଥିବାବେଳେ ପୋଲିସ ସେଠାରେ ପହଞ୍ଚି ଚାରିପଟୁ ଘେରାଉ କରିଥିଲା। ଏହି ସମୟରେ ଅଭିଯୁକ୍ତମାନେ ମଧ୍ୟ ପୋଲିସ ଉପରକୁ ଗୁଳିଚାଳନା କରିଥିଲେ। ୫ ଘଣ୍ଟାର ଅପରେଶନ ପରେ ଅପରାହ୍ନରେ ଏନ୍କାଉଣ୍ଟରରେ ଉଭୟଙ୍କ ମୃତ୍ୟୁ ଘଟିଥିଲା। ୨ ମୃତକ ମୁଖ୍ୟ ଅଭିଯୁକ୍ତ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ର ସଦସ୍ୟ ଥିଲେ। ଅନ୍ୟ ଜଣେ ଶୁଟର ଦୀପକ ମୁଣ୍ଡି ଏବେ ମଧ୍ୟ ଫେରାର ଅଛନ୍ତି। ଅଦ୍ୟାବଧି ୮ ଶୁଟରଙ୍କୁ ଗିରଫ କରାଯାଇଛି। ଉକ୍ତ ଅଞ୍ଚଳକୁ ଘେରାଉ କରାଯିବା ସହ ଲୋକଙ୍କୁ ବାହାରକୁ ନ ଆସିବାକୁ କୁହାଯାଇଛି। ଆଣ୍ଟାଇ-ଗ୍ୟାଙ୍ଗଷ୍ଟର ଟାକ୍ସ ଫୋର୍ସ ଏହି ଏନ୍କାଉଣ୍ଟର କରିଛି। ଡିଜିପି ଗୌରବ ଯାଦବ ଘଟଣାସ୍ଥଳରେ ଉପସ୍ଥିତ ଥିଲେ। କାନଡାରୁ ସତିନ୍ଦରଜିତ୍ ସିଂ ଓରଫ୍ ଗୋଲ୍ଡି ବ୍ରାର୍ ଏବଂ ତିହାର ଜେଲରେ ଥିବା ଲରେନ୍ସ ବିଷ୍ଣୋଇ ମୂସଓ୍ବୋଲାଙ୍କ ହତ୍ୟାକାଣ୍ଡର ଯୋଜନା କରିଥିବାବେଳେ ଏହି ଘଟଣାରେ ପଞ୍ଜାବ ସମେତ ଦିଲ୍ଲୀ ଏବଂ ମୁମ୍ବାଇ ପୋଲିସ ମଧ୍ୟ ତଦନ୍ତ କରୁଛନ୍ତି।
