ଭୁବନେଶ୍ୱର,୨୭।୧୦(ବ୍ୟୁରୋ): ସମାଜରେ କଳାକାର, ଲେଖକଙ୍କ ପ୍ରତି ପୁରସ୍କାର ହେଉଛି ଏକ କୃତଜ୍ଞତା। ଏହା ସୃଜନଶୀଳତା ପ୍ରତି ବିଶ୍ୱାସ ଆଣିବା ସହ ଉକ୍ତ ବ୍ୟକ୍ତିଙ୍କ ପ୍ରତି ଦାବି ଆଣିଥାଏ ଯେ ସେ ଆମର। ଅଦ୍ୱିତୀୟତା କଳା, ସାହିତ୍ୟର ଉପହାର। ସମସ୍ତେ ନିଜ ନିଜ ବିବେକ ଅନୁସାରେ ଲେଖା, କଳାକୃତିକୁ ବୁଝିଥାନ୍ତି ଏବଂ ଏହାକୁ ଭିନ୍ନ ଭିନ୍ନ ଶବ୍ଦ ମାଧ୍ୟମରେ ପ୍ରକାଶ କରିଥାନ୍ତି। ଏ ପର୍ଯ୍ୟନ୍ତ ପାଠକକୁ ପହଞ୍ଚାଇବାରେ କଳାକୃତି ହିଁ ସାହାଯ୍ୟ କରିଥାଏ, ଯାହାଦ୍ୱାରା ବ୍ୟକ୍ତି ମଧ୍ୟରେ ଅଦ୍ୱିତୀୟତା ଜାଗ୍ରତ ହୋଇଥାଏ ବୋଲି ବିଶିଷ୍ଟ ହିନ୍ଦୀ ଲେଖକ ଉଦୟନ ବାଜପେୟୀ କହିଛନ୍ତି। ଇଣ୍ଡିଆନ୍ ମେଟାଲ୍ସ ପବ୍ଲିକ ଚାରିଟେବଲ୍ ଟ୍ରଷ୍ଟ (ଇମ୍ପାକ୍ଟ) ପକ୍ଷରୁ ବୁଧବାର ସ୍ଥାନୀୟ ଏକ ହୋଟେଲରେ ଆୟୋଜିତ ଶାରଳା ପୁରସ୍କାର ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ସେ ଏହା କହିଛନ୍ତି। ଏହି ଅବସରରେ କଥାକାର ଡ.ଗୌରହରି ଦାସଙ୍କୁ ତାଙ୍କ ଗଳ୍ପ ପୁସ୍ତକ ‘ବାଘ ଓ ଅନ୍ୟାନ୍ୟ ଗଳ୍ପ’ ପାଇଁ ଚଳିତବର୍ଷର ୪୩ତମ ‘ଶାରଳା ପୁରସ୍କାର’ ପ୍ରଦାନ କରାଯାଇଛି। ପୁରସ୍କାର ବାବଦକୁ ୫ଲକ୍ଷ ଟଙ୍କାର ଅର୍ଥରାଶି ସହ ଉପଢ଼ୌକନ ଓ ତାମ୍ରଫଳକ ପ୍ରଦାନ କରାଯାଇଥିଲା। ପୁରସ୍କାର ଗ୍ରହଣ କରି ଡ. ଦାସ କହିଛନ୍ତି, ସାହିତ୍ୟ ପାଇଁ ଆଜି ମୋର ପରିଚୟ। ସାହିତ୍ୟ ଯଦି ନ ଥାନ୍ତା ମୋର ଏଭଳି ପରିଚୟ ସୃଷ୍ଟି ହୋଇପାରି ନ ଥାନ୍ତା। ସାହିତ୍ୟ ମୋର କୁରୁକ୍ଷେତ୍ର ଏବଂ ଶବ୍ଦ ମୋର ଶସ୍ତ୍ର। ସାହିତ୍ୟର ଧର୍ମ ଶୋଇପଡ଼ିଥିବା ଦେବତାଙ୍କୁ ନିଦରୁ ଉଠାଇବା। ସମାଜର ରାଜନୈତିକ, ଅର୍ଥନୈତିକ ଓ ସାଂସ୍କୃତିକ ବ୍ୟବସ୍ଥା ଉପରେ ମୋର ହସ୍ତକ୍ଷେପ। ସମସ୍ତେ ଦିନେ ଗପ ପାଲଟିଯିବା। ଏହା ଏକ ଅନିବାର୍ଯ୍ୟ ନିୟତି। ଗାଳ୍ପିକଙ୍କ ପରେ ଗାଳ୍ପିକ ବିଦାୟ ନେଉଥିବେ କିନ୍ତୁ ଗଳ୍ପ, ଶବ୍ଦ ରହିବ। ଶବ୍ଦର ଶେଷ ନାହିଁ, ଶବ୍ଦର ସମାଧି ନାହିଁ ବୋଲି ସେ ପ୍ରକାଶ କରିଛନ୍ତି। ସେହିପରି କଳା କ୍ଷେତ୍ରରେ ଜୀବନବ୍ୟାପୀ ସାଧନାର ଉତ୍କର୍ଷ ପାଇଁ ଇମ୍ଫା ଟ୍ରଷ୍ଟ ପକ୍ଷରୁ ଚିତ୍ରକର ପ୍ରଫୁଲ୍ଲ ମହାନ୍ତି ଏବଂ ଓଡ଼ିଶୀ ସଙ୍ଗୀତ ସାଧକ ଗୁରୁ ଘନଶ୍ୟାମ ପଣ୍ଡାଙ୍କୁ ‘ଇଲା-ବଂଶୀଧର ପଣ୍ଡା କଳା ସମ୍ମାନ’ରେ ସମ୍ମାନିତ କରାଯାଇଛି। ପ୍ରତ୍ୟେକଙ୍କୁ ଦେଢ଼ ଲକ୍ଷ ଟଙ୍କାର ଅର୍ଥରାଶି ପ୍ରଦାନ କରାଯାଇଛି। ଉତ୍ସବରେ ଟ୍ରଷ୍ଟି ପାରମିତା ପଣ୍ଡା ସ୍ବାଗତ ଭାଷଣ ପ୍ରଦାନ କରିଥିଲେ। ଦ୍ୱିତୀୟ ଅଧିବେଶନରେ ବିୟତପ୍ରଜ୍ଞା ତ୍ରିପାଠୀଙ୍କ ସଂଯୋଜନାରେ ଲେଖକ ଦାସ ଏବଂ ମୁଖ୍ୟ ଅତିଥି ବାଜପେୟୀଙ୍କ ମଧ୍ୟରେ ଏକ ଆଲୋଚନା ପର୍ବ ଅନୁଷ୍ଠିତ ହୋଇଥିଲା। ଉତ୍ସବକୁ ବିଜୟ ମଲ୍ଲ ସଂଯୋଜନା କରିଥିଲେ।
