ଯାଜପୁର ଅଫିସ,୧୨।୪: ବିଭିନ୍ନ ପର୍ଯ୍ୟଟନସ୍ଥଳୀକୁ ସଂଯୋଗ କରୁଥିବା କୁଆଖିଆଠାରୁ ଭାୟା ଯାଜପୁର, ଆରଡି ସାତଭାୟା ୨୦ନଂ.ଜାତୀୟ ରାଜପଥ(ଏନ୍ଏଚ୍)ପ୍ରକଳ୍ପ ଫଳକରେ ସୀମିତ ରହିଛି। ଏଥିପାଇଁ ପ୍ରାୟ ୪୦୦ ଏକର ଜମି ଏନ୍ଏଚ୍ଏଆଇକୁ ଏଯାଏ ହସ୍ତାନ୍ତର ହୋଇ ନ ଥିବାରୁ କାମ ଆରମ୍ଭ ହୋଇ ପାରିନାହିଁ। ଏହି ମର୍ମରେ ଉତ୍ତରାଞ୍ଚଳ ଜାତୀୟ ରାଜପଥ ସର୍କଲର ଚିଫ୍ କନଷ୍ଟ୍ରକ୍ସନ ଇଞ୍ଜିନିୟର କାର୍ଯ୍ୟାଳୟ ପକ୍ଷରୁ ଅଧ ଏକର ସରକାରୀ ଜମି ଏବଂ ଏକ ସରକାରୀ ଗୃହ ଯୋଗାଇ ଦେବାକୁ ଯାଜପୁର ଜିଲାପାଳଙ୍କୁ ଅନୁରୋଧ କରାଯାଇଛି।
ଧନଜୀବନର ସୁରକ୍ଷା ଏବଂ ନିରାପଦ ଗମନାଗମନ ପାଇଁ କେନ୍ଦ୍ର ସରକାରଙ୍କ ଜାତୀୟ ପ୍ରାଧିକରଣ ବିଭାଗ ପକ୍ଷରୁ ଯାଜପୁର ଜିଲା ଦେଇ ଏକ ନୂତନ ଜାତୀୟ ରାଜପଥର ପରିକଳ୍ପନା କରାଯାଇଛି। ଏହା ଯାଜପୁର ଜିଲାର କୁଆଖିଆ ଛକଠାରୁ ମଙ୍ଗଳପୁର ପର୍ଯ୍ୟନ୍ତ ୪ ଓ ୨ ଲେନ୍ ବିଶିଷ୍ଟ ରାଜପଥ ନିର୍ମାଣ କରାଯିବ। ୨୦୧୫ ସେପ୍ଟେମ୍ବର ୧୭ରେ ୨୦ ନଂ. ଜାତୀୟ ରାଜପଥ ସଂକ୍ରାନ୍ତରେ ବିଜ୍ଞପ୍ତି ପ୍ରକାଶ ପାଇଥିଲା ା ଜିଲାର କୁଆଖିଆଠାରୁ ସମୁଦାୟ ୧୩୯ କିମି ବିଶିଷ୍ଟ ଏହି ପ୍ରକଳ୍ପର ଡିଟେଲ ପ୍ରୋଜେକ୍ସ ରିପୋର୍ଟ (ଡିପିଆର) ପ୍ରସ୍ତୁତ ପାଇଁ ଇଗିସ(ଇଆଇଜିଆଇଏସ୍) ଇଣ୍ଡିଆ କନ୍ସଲଟିଂ ଇଞ୍ଜିନିୟର୍ସ ପ୍ରାଇଭେଟ ଲିଃକୁ ଦାୟିତ୍ୱ ଦିଆଯାଇଥିଲା ା କେବଳ ଡିପିଆର ପ୍ରସ୍ତୁତି ପାଇଁ ୪ କୋଟି ୬୮ ଲକ୍ଷ ୮୩ ହଜାର ୨୨୮ ଟଙ୍କା ଖର୍ଚ୍ଚ କରିବାକୁ ସ୍ଥିର ହୋଇଥିଲା ା ୨୦ନଂ. ଏନ୍ଏଚ୍ କୁଆଖିଆ-ସାତଭାୟା ସେକ୍ସନ ପ୍ରକଳ୍ପର ଡିପିଆର କାର୍ଯ୍ୟ ଇତିମଧ୍ୟରେ ଶେଷ ହୋଇ ଜମି ଅଧିଗ୍ରହଣ ପ୍ରକ୍ରିୟା ଚାଲିଥିବା ସୂଚନା ମିଳିଛି। ଏପରି କି ୩୧ା୩ା୨୦୨୨ରେ ଏହି ପ୍ରକଳ୍ପକୁ ମଞ୍ଜୁରୀ ମିଳିଥିବାବେଳେ ୬୩୬.୧୦ କୋଟି ଟଙ୍କା ବ୍ୟୟ ଅଟକଳ ପ୍ରସ୍ତୁତ ହୋଇଛି। ଏହାସହ ଟେଣ୍ଡର ପ୍ରକ୍ରିୟା ମଧ୍ୟ ସମ୍ପନ୍ନ ହୋଇଥିବାବେଳେ ପ୍ରାୟ ୪୦୦ ଏକର ଜମି ଅଧିଗ୍ରହଣ ଶେଷ ହୋଇ ପାରି ନ ଥିବାରୁ ପ୍ରକଳ୍ପ କାମ ଆରମ୍ଭ ହୋଇ ପାରିନାହିଁ ବୋଲି ଏନ୍ଏନ୍ର ଚିଫ କନଷ୍ଟ୍ରକ୍ସନ ଇଞ୍ଜିନିୟର କାର୍ଯ୍ୟାଳୟରୁ ଜଣାପଡିଛି।
ଏହି ରାସ୍ତାଦେଇ ଦୈନିକ ହଜାର ହଜାର ଗାଡି ଯାତାୟତ କରୁଛି ା ବିଶେଷକରି ୧୬ନଂ. ଜାତୀୟ ରାଜପଥକୁ ସଂଯୋଗ କରୁଥିବା ଏହି ରାସ୍ତା ବିରଜାକ୍ଷେତ୍ର, ଆରଡି, ଚାନ୍ଦବାହାଲି ଓ ରାଜକନିକାକୁ ଛୁଇଁବ ା ଉକ୍ତ ରାସ୍ତା ସମ୍ପୂର୍ଣ୍ଣ ହେଲେ ବିରଜାମନ୍ଦିର ସହ ଅନ୍ୟାନ୍ୟ ପର୍ଯ୍ୟଟନସ୍ଥଳୀକୁ ଯାତାୟତ ସହଜ ହୋଇ ପାରିବ । କିନ୍ତୁ ଏଯାଏ ଜମି ଅଧିଗ୍ରହଣ ସହ ଅନ୍ୟାନ୍ୟ କାର୍ଯ୍ୟ ଆଗେଇ ପାରୁ ନ ଥିବାରୁ ନିର୍ଦ୍ଧାରିତ ସମୟରେ ରାସ୍ତା ସମ୍ପୂର୍ଣ୍ଣ ହେବା ନେଇ ସଂଶୟ ପ୍ରକାଶ ପାଇଛି ା ଏହାବାଦ୍ ଏହି ରାସ୍ତା ଅତି ସଂକୀର୍ଣ୍ଣ ହୋଇଥିବାରୁ ବର୍ତ୍ତମାନ ପ୍ରାୟ ଦୁର୍ଘଟଣା ଘଟି ଧନଜୀବନ ହାନୀ ହେଉଛି। ତଥାପି ସମ୍ପୃକ୍ତ ଅଧିକାରୀମାନେ ଏନ୍ଏଚ୍ ନିର୍ମାଣରେ ତପତ୍ରତା ପ୍ରକାଶ କରୁ ନ ଥିବା ମନେ ହେଉଛି। ଏହାସହ କୁଆଖିଆ, ଯାଜପୁର ଓ ଆରଡି ଅଞ୍ଚଳରେ ନୂତନ ବାଇପାସ୍ ନିର୍ମାଣ ହେବା ପାଇଁ ୨୦୧୭ ଅଗଷ୍ଟରେ ଜିଲାପାଳଙ୍କ ଅଧ୍ୟକ୍ଷତାରେ ନିଷ୍ପତ୍ତି ହୋଇଥିଲା। ଏହି ବୈଠକକୁ ଇତିମଧ୍ୟରେ ୬ ବର୍ଷ ପୁରିବାକୁ ଯାଇଥିଲେ ହେଁ କୌଣସି ଅଗ୍ରଗତି ନ ହେବା ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେବେ କାର୍ଯ୍ୟାଳୟ ଏବଂ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ପାଇଁ ଯାଜପୁର ଟାଉନରେ ଉତ୍ତରାଞ୍ଚଳ ଏନଏଚ୍ର ଦୁଇଟି ସେକ୍ସନ କାର୍ଯ୍ୟାଳୟ ରହିବ। ଏଥିପାଇଁ ଅଧ ଏକର ସରକାରୀ ଜମି ସହ ଗୃହର ଆବଶ୍ୟକତା ରହିଛି। ତେଣୁ ଉପରୋକ୍ତ ଭାବେ ଜମି ଏବଂ ସରକାରୀ ଗୃହ ଯୋଗାଇ ଦେବାକୁ ଏନ୍ଏଚ୍ ପକ୍ଷରୁ ଜିଲାପାଳଙ୍କୁ ଅନୁରୋଧ କରାଯାଇଛି।
