ଜଗତ୍ସିଂହପୁର ଅଫିସ, ୧ା୪: ଜଗତ୍ସିଂହପୁର ଜିଲାରେ ଚଳିତବର୍ଷ ପାଖାପାଖି ୪୦ ହଜାର ହେକ୍ଟର ଜମିରେ ହୋଇଥିବା ମୁଗଚାଷ ମଧ୍ୟରୁ ଅଧିକାଂଶ ବହୁମାତ୍ରାରେ ପ୍ରଭାବିତ ହୋଇଛି। କାଳବୈଶାଖୀ ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଛି। ଯେଉଁ କିଛି ଜମିରେ ମୁଗ ଭଲ ସ୍ଥିତିରେ ଅଛି ଆଉ କିଛିଦିନ ବର୍ଷା ହେଲେ ତାହା ମଧ୍ୟ କ୍ଷତି ହୋଇଯିବ। ଏନେଇ ଚାଷୀକୁଳ ମୁଣ୍ଡରେ ହାତଦେଇ ବସିଛନ୍ତି।
ଜିଲା ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ଜିଲାରେ ପାଖାପାଖି ୪୦ ହଜାର ହେକ୍ଟର ଜମିରେ ମୁଗ ଚାଷ କରାଯାଇଥିଲା। ଏବେ ଅମଳ ସମୟ। ଅମଳ ହୋଇଥିଲେ ୨ ଲକ୍ଷ କୁଇଣ୍ଟାଲ ମୁଗ ହୋଇଥାନ୍ତା। କିନ୍ତୁ ଖରାପ ପାଣିପାଗ ତଥା ବର୍ଷା ଯୋଗୁ ଏହି ଫସଲ ଗୁରୁତର ପ୍ରଭାବିତ ହୋଇଛି। କିଛି ଅଞ୍ଚଳରେ ବିଲରେ ପାଣି ଯୋଗୁ ମୁଗ ଅମଳ ସମ୍ଭବ ହେଉନି। ଏପରି କି ଅନେକ ସ୍ଥାନରେ ମୁଗ ଗଜା ହୋଇଯାଇଥିବା ଲକ୍ଷ୍ୟ କରାଯାଉଛି।
ଏ ସମ୍ପର୍କରେ ନାଉଗାଁ ବ୍ଲକ ଗଳଧାରୀ ପଞ୍ଚାୟତ ଅନ୍ତର୍ଗତ ଏରଡ଼ା ଗ୍ରାମର ସରୋଜ କୁମାର ନାୟକ, ଅନ୍ତର୍ଯାମୀ ବିଶ୍ୱାଳ, ସନ୍ତୋଷ କୁମାର ରାଉତ, ସଞ୍ଜୟ କୁମାର ବିଶ୍ୱାଳ ପ୍ରମୁଖ କହିଛନ୍ତି, ସେମାନେ ଏବର୍ଷ ଅଧିକ ମୁଗ ଚାଷ କରିଛନ୍ତି। ଧାନକଟାରେ ବିଳମ୍ବ ଯୋଗୁ ମୁଗଚାଷରେ ବିଳମ୍ବ ହୋଇଥିଲା। ଏବେ ଏରଡ଼ା, ଗଳଧାରୀ ସମେତ ବିଭିନ୍ନ ମୌଜାରେ ମୁଗ ଫୁଲ ଧରିଛି। ବର୍ଷା ଯୋଗୁ ଫୁଲ ଝଡ଼ିଯିବା ସହ ରୋଗ ହେବାର ଯଥେଷ୍ଟ ସମ୍ଭାବନା ରହିଛି। ଏଥିସହ ବିଲରେ ପାଣି ଜମିଯାଇଥିବାରୁ ଏହା ନ ଶୁଖିଲେ ବିପଦ ସୃଷ୍ଟି କରିପାରେ। ଆଉ କିଛିଦିନ ବର୍ଷା ଲାଗିରହିଲେ ପରିସ୍ଥିତି ଅଧିକ ବିଗିଡ଼ିଯିବ। କେବଳ ଫୁଲ ଧରିଥିବା ମୁଗ ନୁହେଁ, ଅମଳ ହେବାକୁ ଥିବା ମୁଗ ମଧ୍ୟ ପ୍ରଭାବିତ ହୋଇଛି। ଜିଲାର ସହସ୍ରାଧିକ ଏକର ଜମିରେ ଏଭଳି ସ୍ଥିତି ଉପୁଜିଥିବାରୁ ଚାଷୀ ନିରାଶ ହୋଇ ହାତଟେକି ବସିଛନ୍ତି ।
ଏ ସମ୍ପର୍କରେ ସ୍ଥାନୀୟ କେତେଜଣ କୃଷିବିତ୍ କହିଛନ୍ତି, ପାଖାପାଖି ୪/୫ ବର୍ଷ ହେବ ପାଣିପାଗରେ ବଡ଼ଧରଣର ପରିବର୍ତ୍ତନ ଆସିଛି। ଧାନ ଅମଳ ସମୟରେ ବର୍ଷା ହେଉଥିବାରୁ ଆଦର୍ରତା ବଢ଼ିଯାଉଛି। ତେଣୁ ଅମଳ ଡେରି ହୋଇଯାଉଛି। ଜମି ପାଗ ହେଲାପରେ ମୁଗ ବୁଣାଯାଉଛି। ମୁଗ ଅମଳବେଳକୁ କାଳବୈଶାଖୀ ଦାଉ ସାଧୁଛି। କେବଳ ଏତିକି ନୁହେଁ, ତା’ଭିତରେ ଅର୍ଥାତ୍ ଯେଉଁ ସମୟରେ ମୁଗଗଛକୁ ଉଷ୍ମତା ଦରକାର ସେତେବେଳେ ମଧ୍ୟ ବର୍ଷା ହୋଇଯାଉଛି। ଚଳିତବର୍ଷ ବର୍ଷା ହେବାରୁ ଏହି ଫସଲ ଗୁରୁତର ଭାବେ ପ୍ରଭାବିତ ହୋଇଛି। ଏପରି ସ୍ଥିତିରେ ଲୋକେ ନଭେମ୍ବର ସୁଦ୍ଧା ଯେପରି ଧାନ ଅମଳ ହୋଇପାରିବ ସେଭଳି ଅର୍ଥାତ୍ କମ୍ଦିନିଆ ଧାନ ଚାଷ କରିବା କଥା। ତାହାହେଲେ ମୁଗ ବିହନ ଠିକ୍ ସମୟରେ ବୁଣାଯାଇପାରନ୍ତା ଏବଂ କ୍ଷତି ହେବାର ସମ୍ଭାବନା କମିଯାଆନ୍ତା ବୋଲି ଚିନ୍ତା କରାଯାଉଛି । ଏ ସମ୍ପର୍କରେ ଭାରପ୍ରାପ୍ତ ଜିଲା କୃଷି ଅଧିକାରୀ ନବକିଶୋର ମହାପାତ୍ର କହିଛନ୍ତି, ସେ ୨ ଦିନ ହେଲା କାର୍ଯ୍ୟରେ ଯୋଗ ଦେଇଛନ୍ତି। ଏହା ଭିତରେ ଯାହା ସୂଚନା ଅଛି ଜିଲାରେ ଡାଲିଜାତୀୟ ଫସଲ ଯଥା ମୁଗ, ବିରି, ଶୁଣ୍ଠି, ହରଡ଼ ଆଦି ପାଖାପାଖି ୬୦ ହଜାର ହେକ୍ଟର ଚାଷ ହୋଇଛି। କିନ୍ତୁ ଏବେ ମୁଗଚାଷ ବିଶେଷ ପ୍ରଭାବିତ ହୋଇଛି। ବିଶେଷକରି ବର୍ଷାପାଣି ନ କମିଲେ ଗଛ ପଚିଯିବାର ଆଶଙ୍କା ରହିଛି। ଜାନୁୟାରୀ ଶେଷରୁ ଫେବୃୟାରୀ ମଧ୍ୟରେ ମୁଗ ଫୁଲ ଧରିବା କଥା। କିନ୍ତୁ ଅନେକ ସ୍ଥାନରେ ବିଳମ୍ବ ହୋଇଛି। ମୋଟାମୋଟି କହିବାକୁ ଗଲେ ଅମଳ ହେବାକୁ ଥିବା ଏବଂ ଫୁଲ ଧରୁଥିବା ମୁଗ ଫସଲ କ୍ଷତିହେବା ଆଶଙ୍କା କରାଯାଉଛି। ଯେଉଁମାନଙ୍କର ଫୁଲ ଧରି ନ ଥିବ ସେମାନଙ୍କ ପାଇଁ ବର୍ଷା ଅନୁକୂଳ ହେବ। ତଥାପି କ୍ଷୟକ୍ଷତି ସମ୍ପର୍କରେ ଜିଲାର ସମସ୍ତ ବ୍ଲକରୁ ତଥ୍ୟ ମଗାଯାଇଛି। ରିପୋର୍ଟ ଆସିଲା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ମହାପାତ୍ର କହିଛନ୍ତି ।
