କୁଜଙ୍ଗ,୨୩।୩(ଡି.ଏନ୍.ଏ.): ୧୦ରୁ ୧୯ ବର୍ଷ ବାଳିକାମାନଙ୍କ ସ୍ବଚ୍ଛତା ଓ ପରିଚ୍ଛନ୍ନତା ଉପରେ ଗୁରୁତ୍ୱ ଦେବା ନିମନ୍ତେ ଜେଏସ୍ଡବ୍ଲ୍ୟୁ କମ୍ପାନୀ ପକ୍ଷରୁ ବିଭିନ୍ନ ବିଦ୍ୟାଳୟରେ ମଙ୍ଗଳବାର ସାନିଟାରୀ ନାପ୍କିନ୍ ଭେଣ୍ଡିଂ ମେଶିନ୍ ପ୍ରଦାନ କରାଯାଇଛି। କମ୍ପାନୀ ପକ୍ଷରୁ ପ୍ରସ୍ତାବିତ ପ୍ରକଳ୍ପ ଅଞ୍ଚଳର ନୂଆଗାଁସ୍ଥିତ କୁଞ୍ଜବିହାରୀ ଉଚ୍ଚ ବିଦ୍ୟାଳୟ ଓ ଗଡ଼କୁଜଙ୍ଗସ୍ଥିତ ଉନ୍ନୀତ ସରକାରୀ ଉଚ୍ଚ ବିଦ୍ୟାଳୟ ସମେତ ପାରାଦୀପ ସହରାଞ୍ଚଳରେ ଥିବା କେନ୍ଦ୍ରୀୟ ବିଦ୍ୟାଳୟ ଓ ଏନ୍ଏସି ବାଳିକା ବିଦ୍ୟାଳୟକୁ ଏହି ମେଶିନ ପ୍ରଦାନ କରାଯାଇଛି। ଏହି ୪ ବିଦ୍ୟାଳୟରେ ୫୦୦ରୁ ଊର୍ଦ୍ଧ୍ୱ ବାଳିକା ଅଧ୍ୟୟନରତ ଅଛନ୍ତି। ଏସବୁ ବିଦ୍ୟାଳୟର ଜଣେ ଲେଖାଏଁ ଶିକ୍ଷୟିତ୍ରୀଙ୍କୁ ସାନିଟାରୀ ନାପ୍କିନ୍ ଭେଣ୍ଡିଂ ମେଶିନ୍ ଦାୟିତ୍ୱ ଦିଆଯାଇଛି। ଏହି ମେଶିନ୍ ବିଦ୍ୟାଳୟକୁ ଆସିବା ପରେ କିଶୋରୀମାନେ ସେମାନଙ୍କ ସ୍ବାସ୍ଥ୍ୟ ପ୍ରତି ଯତ୍ନବାନ ହୋଇପାରିବେ ବୋଲି ଶିକ୍ଷୟିତ୍ରୀ, ଶିକ୍ଷକମାନେ କହିଛନ୍ତି।
