ନୂଆଦିଲ୍ଲୀ,୨୪ା୫: ପ୍ୟାରିସରେ ମୁଖ୍ୟାଳୟ ଥିବା ମିଡିଆ ଓ୍ବାଚ୍ଡଗ୍ ରିପୋର୍ଟର୍ସ ଓ୍ବିଦାଉଟ୍ ବର୍ଡର୍ସ ଏବର୍ଷ ୧୮୦ ଦେଶକୁ ନେଇ ପ୍ରସ୍ତୁତ କରିଥିବା ଓ୍ବାଲର୍ଡ ପ୍ରେସ୍ ଫ୍ରିଡମ୍ ଇଣ୍ଡେକ୍ସ ବା ବିଶ୍ୱ ଗଣମାଧ୍ୟମ ସ୍ବାଧୀନତା ସୂଚକାଙ୍କରେ ଭାରତକୁ ୧୬୧ତମ ସ୍ଥାନରେ ରଖିଛି। ସର୍ବବୃହତ୍ ଗଣତନ୍ତ୍ରର ଏହା ହେଉଛି ସର୍ବନିମ୍ନ ପାହ୍ୟା। ଚଳିତ ବର୍ଷ ଜି୨୦ର ଅଧ୍ୟକ୍ଷତା କରୁଥିବା ଭାରତ ପକ୍ଷରୁ ଜମ୍ମୁ-କଶ୍ମୀରରେ ସୋମବାରଠାରୁ ୩ ଦିନିଆ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ଚାଲିଛି। ଏହି ପରିପ୍ରେକ୍ଷୀରେ ଉପତ୍ୟକାରେ ଗଣମାଧ୍ୟମ ଉପରେ ସରକାରୀ କଟକଣା ଏବଂ ଖବରଦାତାମାନଙ୍କ ଗିରଫଦାରିକୁ ଏକ ଅଗ୍ରଣୀ ଓ୍ବାଚ୍ଡଗ୍ ପକ୍ଷରୁ ଦୃଢ଼ନିନ୍ଦା କରାଯାଇଛି। ନ୍ୟୁୟର୍କସ୍ଥିତ କମିଟି ଟୁ ପ୍ରୋଟେକ୍ଟ ଜର୍ନାଲିଷ୍ଟ (ସିପିଜେ) ବେଆଇନ ଭାବେ ଗିରଫ କରାଯାଇଥିବା ୪ ଜଣ କଶ୍ମୀରୀ ଖବରଦାତାଙ୍କୁ ତୁରନ୍ତ ମୁକ୍ତ କରିବା ପାଇଁ ଦାବି କରିଛି।
୨୦୧୯ ଅଗଷ୍ଟ ୫ରେ କେନ୍ଦ୍ର ସରକାର ଜମ୍ମୁ-କଶ୍ମୀରକୁ ସ୍ବତନ୍ତ୍ର ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦କୁ ଉଚ୍ଛେଦ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହିନ୍ଦୁ ଜାତୀୟତାବାଦୀ ସରକାର ଜମ୍ମୁ-କଶ୍ମୀରକୁ କେନ୍ଦ୍ରଶାସିତ ଅଞ୍ଚଳରେ ପରିଣତ କରି ଏହାର ସ୍ବାୟତ୍ତତାକୁ ସୀମିତ କରିବା ସହ ଶାସନକୁ ନୂଆଦିଲ୍ଲୀର ପ୍ରତ୍ୟକ୍ଷ ନିୟନ୍ତ୍ରଣକୁ ନେଇଯାଇଛନ୍ତି। ନୂଆଦିଲ୍ଲୀ ସମ୍ପୃକ୍ତ ଅଞ୍ଚଳରେ କଡ଼ା ଶାସନ ଚଳାଇବା ସହ ବରିଷ୍ଠ ରାଜନେତା, ଆକ୍ଟିଭିଷ୍ଟ, ଖବରଦାତା ଓ ଆଇନଜୀବୀଙ୍କ ସମେତ ଅନେକ ହଜାର ଲୋକଙ୍କୁ ଗିରଫ କରିଛି। ସେବେଠୁ ମୋଦି ସରକାର ବିଭିନ୍ନ ଆଇନ ଓ ନୀତି ପ୍ରଣୟନ କରିଛନ୍ତି। ସ୍ଥାନୀୟ ଲୋକେ ସେମାନଙ୍କ ଅଧିକାରଗୁଡ଼ିକୁ ନୂ୍ୟନକରି ଜୀବିକାରୁ ଉଚ୍ଛେଦ କରିବା ପାଇଁ ଏସବୁ ଉଦ୍ଦିଷ୍ଟ ବୋଲି ଅଭିଯୋଗ ଆଣୁଛନ୍ତି। କଶ୍ମୀରୀ ଖବରଦାତାମାନେ କୁହନ୍ତି, ୨୦୧୯ରୁ ସେମାନେ ଆତଙ୍କିତ ଅବସ୍ଥାରେ ଅଛନ୍ତି। ଅନେକ ଖବରଦାତାଙ୍କ ଘରେ ଚଢ଼ାଉ କରାଯାଉଛି। ସେମାନଙ୍କୁ ପୋଲିସ ଜେରା ପାଇଁ ଡାକୁଛି। ପର୍ଯ୍ୟବେକ୍ଷକମାନେ ଏହି ପଦକ୍ଷେପକୁ ଜମ୍ମୁ-କଶ୍ମୀରରେ ବାସ୍ତବଧର୍ମୀ ରିପୋର୍ଟିଂକୁ ନୀରବ କରିଦେବା ପାଇଁ ଭାରତର ଉଦ୍ୟମ ବୋଲି ଅଭିହିତ କରିଛନ୍ତି। ୩୭୦ ଉଚ୍ଛେଦ ପରଠୁ ଉପତ୍ୟକାରେ ଜି୨୦ ଭଳି ବଡ଼ ଧରଣର କୂଟନୈତିକ ସମ୍ମିଳନୀ ଆୟୋଜିତ ହୋଇ ନ ଥିଲା। ବିବାଦୀୟ ଭୂଖଣ୍ଡ ଜମ୍ମୁ-କଶ୍ମୀରରେ ବାରମ୍ବାର ମାନବାଧିକାର ଉଲ୍ଲଂଘନ ହେଉଥିବା ଅଭିଯୋଗ ଆଣି ଅନ୍ତର୍ଜାତୀୟ ମଞ୍ଚଗୁଡ଼ିକରେ ପାକିସ୍ତାନ, ଚାଇନା, ତୁର୍କୀ, ସାଉଦି ଆରବ, ଇଜିପ୍ଟ ଭଳି ଦେଶ ସ୍ବର ଉତ୍ତୋଳନ କରି ଜି୨୦କୁ ବର୍ଜନ କରିଥିବାବେଳେ ଏଠାରେ ସବୁକିଛି ଠିକ୍ ଚାଲିଛି ବୋଲି ବିଶ୍ୱକୁ ଦେଖାଇବାକୁ ଭାରତ ଉଦ୍ୟମ କରିଛି। ଜି୨୦ ଟୁରିଜମ୍ ବୈଠକରେ ୬୦ ଦେଶର ପ୍ରତିନିଧି ଯୋଗଦେଇଛନ୍ତି। ତେଣୁ ଏହା ଉପରେ ସାରା ବିଶ୍ୱର ନଜର ରହିଛି। ଏହି ଅବସରରେ ସୋମବାର ସିପିଜେ ପକ୍ଷରୁ ଏକ ବିବୃତି ଜାରି କରାଯାଇଛି। ଏଥିରେ ଉଲ୍ଲେଖ କରାଯାଇଛି ଯେ, ବିବାଦୀୟ କ୍ଷେତ୍ର କଶ୍ମୀରକୁ ସ୍ବାଭାବିକ ସ୍ଥିତି ଫେରିଆସିଛି ବୋଲି ଭାରତ ଦର୍ଶାଇବାକୁ ଉଦ୍ୟମ କରୁଥିଲା ହେଲେ ଏଠାରେ ଗଣମାଧ୍ୟମର ସ୍ବାଧୀନତା ବିପନ୍ନ ହୋଇଛି। ଭାରତ ସରକାର ମିଡିଆ ଉପରେ ବର୍ବର କଟକଣା ଶେଷ କରି ତୁରନ୍ତ ୪ ଖବରଦାତାଙ୍କୁ ମୁକ୍ତ କରନ୍ତୁ ବୋଲି ସିପିଜେ ପକ୍ଷରୁ ଟୁଇଟ୍ କରାଯାଇଛି। ସେହି ସାମ୍ବାଦିକମାନେ ହେଲେ ଆସିଫ୍ ସୁଲତାନ, ଫହାଦ୍ ଶାହ, ସଜାଦ ଗୁଲ ଓ ଇରଫାନ୍ ମେହରାଜ ସୁଲତାନ। କଶ୍ମୀର ନେରେଟର ମାଗାଜିନରେ ରିପୋର୍ଟିଂ କରୁଥିବା ସୁଲତାନଙ୍କୁ ୨୦୧୮ରେ ବେଆଇନ କାର୍ଯ୍ୟକଳାପ ନିବାରଣ ଆଇନ (ୟୁଏପିଏ) ବଳରେ ଗିରଫ କରାଯାଇଥିଲା। ତାଙ୍କ ବିରୋଧରେ ହତ୍ୟା, ହତ୍ୟା ଉଦ୍ୟମ ଓ ଆତଙ୍କବାଦୀଙ୍କୁ ଆଶ୍ରୟ ଦେବା ଭଳି ଅଭିଯୋଗ ରହିଛି। କିନ୍ତୁ ତାଙ୍କ ପରିବାର ଏହାକୁ ଖଣ୍ଡନ କରିଛି। ସୁଲତାନଙ୍କୁ ତାଙ୍କ ରିପୋର୍ଟିଂ ପାଇଁ ଟାର୍ଗେଟ କରାଯାଇଥିବା ପରିବାର ଲୋକେ କହିଛନ୍ତି। ସେହିପରି କଶ୍ମୀର ଓ୍ବାଲା ଓ୍ବେବ୍ସାଇଟ୍ ସମ୍ପାଦକ ଫହାଦ୍ଙ୍କୁ ଗତବର୍ଷ ଫେବୃୟାରୀରେ ଆତଙ୍କବାଦ ନିରୋଧୀ ଆଇନ ୟୁଏପିଏ ବଳରେ ଗିରଫ କରାଯାଇଥିଲା। ତାଙ୍କ ଆଲେଖ୍ୟଗୁଡ଼ିକରେ ଆତଙ୍କବାଦକୁ ମହିମାମଣ୍ଡନ କରାଯାଇଥିବା ପୋଲିସ କହିଥିଲା। ଫହାଦ୍ଙ୍କ ମାଗାଜିନରେ କାର୍ଯ୍ୟରତ ସଜାଦଙ୍କୁ ଗତବର୍ଷ ଜାନୁୟାରୀରେ ଦେଶର ଏକମାତ୍ର ମୁସଲମାନ ବହୁଳ ଅଞ୍ଚଳରେ ଭାରତୀୟ ଶାସନ ବିରୋଧରେ ମିଥ୍ୟା ପ୍ରଚାର ବିସ୍ତାର ଅଭିଯୋଗରେ ଗିରଫ କରାଯାଇଥିଲା। ତାଙ୍କ ବିରୋଧରେ ସାଧାରଣ ସୁରକ୍ଷା ଆଇନ ବଳରେ ମାମଲା ରୁଜୁ ହୋଇଛି। ଏହି ଆଇନ ବଳରେ ଗିରଫ ବ୍ୟକ୍ତିଙ୍କୁ ବର୍ଷେ କିମ୍ବା ତଦୂର୍ଦ୍ଧ୍ୱ ଅବଧି ପର୍ଯ୍ୟନ୍ତ ବିନା ଜାମିନରେ ଜେଲରେ ରଖାଯାଇପାରିବ। ଅନୁରୂପ ଭାବେ ସ୍ଥାନୀୟ ମାନବାଧିକାର ଗୋଷ୍ଠୀ ଜମ୍ମୁ ଓ କଶ୍ମୀର କୋଆଲିଶନ୍ ଅଫ୍ ସିଭିଲ୍ ସୋସାଇଟିରେ ପୂର୍ବରୁ ଜଣେ ଗବେଷକ ଭାବେ କାର୍ଯ୍ୟରତ ମେହରାଜଙ୍କୁ ୨ ମାସ ତଳେ ଆତଙ୍କବାଦୀଙ୍କ ସହ ସମ୍ପର୍କ ରଖିବା ଅଭିଯୋଗରେ ଗିରଫ କରାଯାଇଥିଲା। ଉପରୋକ୍ତ ୪ ଖବରଦାତାଙ୍କୁ ଅନ୍ୟ ରାଜ୍ୟର ଜେଲଗୁଡ଼ିକୁ ପଠାଇଦିଆଯାଇଛି। ଫଳରେ ପରିବାର ଲେକେ ସେମାନଙ୍କୁ ଭେଟିପାରୁ ନାହାନ୍ତି।
ସୌଜନ୍ୟ: ଅଲ୍ ଜଜିରା
