ବ୍ରହ୍ମପୁର ଅଫିସ,୧୧ା୩: ଅବକାରୀ କମିଶନର ଆଶିଷ ସିଂ ଓ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶ କ୍ରମେ ବ୍ରହ୍ମପୁର ଅବକାରୀ ଗୋଇନ୍ଦା ଟିମ୍ ଶୁକ୍ରବାର ପୃଥକ ୩ଟି ସ୍ଥାନରୁ ୪ କୁଇଣ୍ଟାଲ ୩୨ କେଜି ଗଞ୍ଜେଇ ସହ ଏକ ଟ୍ରକ ଜବତ କରିଥିବା ଅବକାରୀ ଉପ ଆୟୁକ୍ତ ରାଜେନ୍ଦ୍ର ଭତ୍ରା ଏହି ସୂଚନା ଦେଇଛନ୍ତି।
ବ୍ରହ୍ମପୁର ଦେଇ ଗଞ୍ଜେଇ ଚାଲାଣ ହେଉଥିବା ଖବର ମିଳିବା ପରେ ଅବକାରୀ ଉପ ଆୟୁକ୍ତ ଭତ୍ରାଙ୍କ ତତ୍ତ୍ୱାବଧାନରେ ୧୦ ଜଣିଆ ଟିମ୍ ୩ଟି ଦଳରେ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ। ଗୋଟିଏ ଦଳ ଭୋର୍ରେ ବ୍ରହ୍ମପୁର ରେଳଷ୍ଟେଶନ ସମ୍ମୁଖରେ ଜଣେ ଯୁବକଙ୍କୁ ଅଟକାଇ ତାଙ୍କ ବ୍ୟାଗ ଯାଞ୍ଚ କରିଥିଲେ। ସମ୍ପୃକ୍ତ ଯୁବକ କନ୍ଧମାଳ ଜିଲା ବାଲିଗୁଡା ଅଞ୍ଚଳର ଜଳେଶ୍ୱର ମାଲିକଙ୍କ ବ୍ୟାଗରୁ ୧୫ କେଜି ଗଞ୍ଜେଇ ମିଳିଥିଲା।
ସେହିପରି ଅନ୍ୟ ଏକ ଦଳ ରେଳଷ୍ଟେଶନ ରାସ୍ତା ନେହେରୁ ପାର୍କ ନିକଟରୁ କନ୍ଧମାଳ ବାଲିଗୁଡା ଅଞ୍ଚଳର ଯଜ୍ଞରାଜ ମାଲିକଙ୍କୁ ଧରି ତାଙ୍କ ବ୍ୟାଗ ଯାଞ୍ଚ କରିବାରୁ ୧୭ କେଜି ଗଞ୍ଜେଇ ମିଳିଥିଲା। ଉଭୟଙ୍କୁ ଜେରା ବେଳେ ସେମାନେ କନ୍ଧମାଳରୁ ଗଞ୍ଜେଇ ଆଣି ଟ୍ରେନରେ ସୁରଟ ଚାଲାଣ କରିବାକୁ ରେଳଷ୍ଟେଶନ ଯାଉଥିଲେ ବୋଲି ସ୍ବୀକାର କରିଛନ୍ତି।
ସେହିପରି ଅନ୍ୟ ଏକ ଦଳ ଫାଷ୍ଟଗେଟ ଡୁଡୁମା କଲୋନୀ ନିକଟରେ ବ୍ଲକିଂ କରିଥିଲା। ବ୍ରହ୍ମପୁର ସହରକୁ ପ୍ରବେଶ କରୁଥିବା ଏକ ଟ୍ରକ (ନଂ ୟୁପି ୨୫ ଡିଟି ୪୮୯୭)କୁ ଅଟକାଇ ଯାଞ୍ଚ କରିଥିଲା। ଉକ୍ତ ଟ୍ରକରେ ୪୦୦ କେଜି ଗଞ୍ଜେଇ ଥିବା ଜଣାପଡିଥିଲା। ଟ୍ରକରୁ ଦୁଇ ଜଣଙ୍କୁ ଅବକାରୀ ପୋଲିସ କାବୁ କରିଥିଲା। ସେମାନେ ହେଲେ ଉତ୍ତପ୍ରଦେଶ ରାଇବରେଲିର ରାମ ଦାସ ଓ ଭୁପିନ୍ଦର ସିଂ। ଉଭୟେ ଗଜପତି ଜିଲାରୁ ଗଞ୍ଜେଇ ଆଣି ବ୍ରହ୍ମପୁର ଦେଇ ଉତ୍ତରପ୍ରଦେଶ ଚାଲାଣ କରିଥାନ୍ତେ ବୋଲି ଜେରା ବେଳେ ଜଣାପଡିଛି। ଏହି ୩ ଘଟଣାରେ ପୃଥକ ୩ ମାମଲା (ନଂ. ୫୬୧, ୫୬୨ ଓ ୫୬୩/୨୧-୨୨) ରୁଜୁ କରାଯାଇ ୪ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଚଢ଼ାଉରେ ଅବକାରୀ ଗୁଇନ୍ଦା ଉପ ଅଧୀକ୍ଷକ କୁବେର ସେଠୀ, ଇନ୍ସପେକ୍ଟର ଗୀତାଞ୍ଜଳି ସାହୁ, ଏଏସଆଇ ବ୍ରଜ ବିହାରୀ ନାୟକ ଓ ଅନ୍ୟ ଅଧିକାରୀମାନେ ସାମିଲ ଥିଲେ।
