ଉମରକୋଟ, ୫।୧୨(ସ୍ବ.ପ୍ର.):ରାଜ୍ୟ ସରକାରଙ୍କ ମେକ୍ ଇନ୍ ଓଡ଼ିଶା କନ୍କ୍ଲେଭରେ ଉମରକୋଟର ଜଣେ ଛାତ୍ର କମ ଖର୍ଚ୍ଚରେ ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗ କରି କୃଷି ଉପଯୋଗୀ ଡ୍ରୋନ ନିର୍ମାଣ କରି ନବରଙ୍ଗପୁର ଜିଲା ତଥା ଉମରକୋଟ ସହର ପାଇଁ ଗୌରବ ଆଣିଛନ୍ତି। ମେକ୍ ଇନ ଓଡ଼ିଶା କନ୍କ୍ଲେଭରେ ତାଙ୍କୁ ପୁରସ୍କୃତ କରାଯାଇଛି। ଛାତ୍ର ଜଣଙ୍କ ହେଲେ ନବରଙ୍ଗପୁର ଜିଲା ଉମରକୋଟ ଗୁଲିପାଟଣା ସାହିର ରବୀନ୍ଦ୍ର କୁମାର ସାହୁ ଓ ସୁଜାତାଙ୍କ ପୁଅ ଶୁଭାଶିଷ। ସେ ଏବେ ପାରଳାଖେମୁଣ୍ଡି ସେଞ୍ଚୁରିଆନ ବିଶ୍ୱବିଦ୍ୟାଳୟରେ କୃଷି ବିଜ୍ଞାନ ବିଭାଗର ବି.ଟେକ୍ ଛାତ୍ର । କିଛି ଦିନ ତଳେ ଏକ ଛୋଟ ଜାହାଜ ନିର୍ମାଣ କରି ଚର୍ଚ୍ଚାକୁ ଆସିଥିଲେ ଶୁଭାଶିଷ।
ପିଲାଦିନରୁ ଶୁଭାଶିଷ ଜଣେ ମେଧାବୀ ଛାତ୍ର ଥିଲେ। ସବୁବେଳେ କିଛି ନୂଆ ତିଆରି କରିବା ତାଙ୍କର ଏକ ନିଶା। ସମ୍ପ୍ରତି କୃଷି କାର୍ଯ୍ୟରେ ନିୟୋଜିତ ଏକ ଡ୍ରୋନ ତିଆରି କରି ସମଗ୍ର ଓଡ଼ିଶାରେ ସେ ଚହଳ ସୃଷ୍ଟି କରିଛନ୍ତି। ଶୁଭାଶିଷଙ୍କ କହିବାନୁସାରେ ବର୍ତ୍ତମାନ ବଜାରରେ ମିଳୁଥିବା କୃଷି ଡ୍ରୋନର ମୂଲ୍ୟ ପ୍ରାୟ ୧୨ ଲକ୍ଷ ଟଙ୍କା। ତାହାକୁ ଉଡ଼ାଇବା ପାଇଁ କୁଶଳି ଶ୍ରମିକ ଆବଶ୍ୟକ। ଉକ୍ତ ଡ୍ରୋନ ଏକକାଳୀନ ମାତ୍ର ୧୫ ହେକ୍ଟର ଜମିରେ କୀଟନାଶକ ଔଷଧ ସିଞ୍ଚନ କରିବ ଓ ବର୍ଷା ଓ ପବନ ହେଲେ ଏହା ଉଡ଼ିପାରେନି। କିନ୍ତୁ ତାଙ୍କ ଦ୍ୱାରା ନିର୍ମିତ ଡ୍ରୋନ୍ର ମୂଲ୍ୟ ୪ଲକ୍ଷ ଟଙ୍କା। ଚାଷ ଜମିରେ ଯେଉଁଠି ପୋକ ଲାଗିଥିବ କିମ୍ବା ଫସଲ ଖରାପ ହୋଇଥିବ କ୍ୟାମେରା ସାହାଯ୍ୟରେ ତୁରନ୍ତ ତାହାର ଲୋକେଶନ ସହ ଚାଷୀଙ୍କୁ ଜଣେଇବାର କ୍ଷମତା ରଖିଛି। ବର୍ଷା ପବନ ହେଲେ ମଧ୍ୟ ତାହା କାର୍ଯ୍ୟକ୍ଷମ ହେବା ସହ ଏକକାଳିନ ୨୫ ହେକ୍ଟର ଜମିରେ ଔଷଧ ସ୍ପ୍ରେ କରିପାରିବ। ଏପରିକି ୧୦ କିଲୋ ଓଜନ ପର୍ଯ୍ୟନ୍ତ କୀଟନାଶକ ଔଷଧ ଧରି ଏହି ଡ୍ରୋନ ଦୀର୍ଘ ସମୟ ଧରି ଉଡିପାରିବ। ଏହାକୁ ଚଳାଇବା ପାଇଁ କୌଣସି କୁଶଳୀ ଶ୍ରମିକଙ୍କ ଆବଶ୍ୟକତା ନାହିଁ। ଓଡିଶା ଷ୍ଟାର୍ଟ ଅପ୍ କାର୍ଯ୍ୟକ୍ରମରେ ରାଜ୍ୟରୁ ୧୩୦୦ଟି ପ୍ରକଳ୍ପ ମନୋନୀତ ହୋଇଥିଲା। ବିଶେଷଜ୍ଞଙ୍କ ସମ୍ମୁଖରେ ପ୍ରଦର୍ଶିତ ହେବା ପରେ ୩୦୦ ପ୍ରକଳ୍ପ ଦ୍ୱିତୀୟ ପର୍ଯ୍ୟାୟକୁ ମନୋନୀତ ହୋଇଥିଲା। ପରେ ୨୬ ନଭେମ୍ବର ଅନ୍ଲାଇନ୍ ମୋଡରେ ୩୦୦ ଉଦ୍ୟୋଗୀ ନିଜ ପ୍ରକଳ୍ପ ପିଡିଏଫ୍ରେ ଅନ୍ଲାଇନ ମୋଡରେ ପ୍ରଦାନ କରିଥିଲେ। ବିଶେଷଜ୍ଞମାନେ ସେଥିରୁ ୨୨ ପ୍ରକଳ୍ପ ମନୋନୀତ କରିଥିଲେ। ଉକ୍ତ ଉଦ୍ୟୋଗୀମାନେ ନିଜ ପ୍ରକଳ୍ପ ବିଶେଷଜ୍ଞଙ୍କ ଆଗରେ ଉପସ୍ଥାପନ କରିଥିଲେ। ସେଥିମଧ୍ୟରୁ ମନେନୀତ ହୋଇଥିବା ୧୦ଟି ପ୍ରକଳ୍ପ ମଧ୍ୟରୁ ଶୁଭାଶିଷଙ୍କ ଡ୍ରୋନ୍ ସ୍ଥାନ ପାଇଛି। ଏହି ପ୍ରକଳ୍ପ ପାଇଁ ମେକ୍ ଇନ ଓଡ଼ିଶା କନ୍କ୍ଲେଭରେ ଶୁଭାଶିଷ ମୁଖ୍ୟମନ୍ତ୍ରୀଙ୍କଠାରୁ ପୁରସ୍କୃତ ହୋଇଛନ୍ତି। ପୁରସ୍କାର ଅର୍ଥ ରାଶି ସ୍ବରୂପ ୧ ଲକ୍ଷ ଟଙ୍କା, ପ୍ରମାଣ ପତ୍ର ଓ ଉପଢ଼ୌକନ ମିଳିଛି। ବିଶ୍ୱବିଦ୍ୟାଳୟ ପ୍ରଫେସର ଡକ୍ଟର ଶେଖର କୁମାର ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ସଫଳତା ପାଇଥିବା ଶୁଭାଶିଷ କହିଛନ୍ତି। ବର୍ତ୍ତମାନ ଏହି ଡିଜାଇନ୍କୁ ପ୍ରଡକ୍ଟରେ ନିର୍ମାଣ ହେବା ପରେ ପେଟେଣ୍ଟ କରିବେ ଶୁଭାଶିଷ। ତେବେ ଡିଜାଇନ୍କୁ ସେ ବିକ୍ରି ନ କରି ନିଜେ ଏକ ବ୍ରାଣ୍ଡ୍ କରି ଏହି ଡ୍ରୋନକୁ ବଜାରରେ ଉପଲବ୍ଧ କରିବେ ବୋଲି ଶୁଭାଶିଷ ସୂଚନା ଦେଇଛନ୍ତି। ବର୍ତ୍ତମାନ ରାଜ୍ୟ ସରକାର ଶୁଭାଶିଷଙ୍କୁ ହବରେ ଏକ ଅଫିସ ଗୃହ ଦେବେ। ଯେଉଁଥିରେ କି ଏହି ଡ୍ରେନର ବିକାଶ ପାଇଁ ଆର୍ଥିକ ଆଉ ବିଶେଷଜ୍ଞଙ୍କ ସହାୟତା ମଧ୍ୟ ରାଜ୍ୟ ସରକାରଙ୍କ ପକ୍ଷରୁ ମିଳିଯିବ ବୋଲି ଶୁଭାଶିଷ କହିଛନ୍ତି।
