ଜୟପୁର,୧୮ା୭: ରାଜସ୍ଥାନରେ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ସମେତ କଂଗ୍ରେସର ୧୯ ବିଦ୍ରୋହୀ ବିଧାୟକଙ୍କୁ ୪ ଦିନିଆ ଆଶ୍ୱସ୍ତି ମିଳିଛି। ବିଧାନସଭା ବାଚସ୍ପତି ସେମାନଙ୍କୁ ଅଯୋଗ୍ୟ ଘୋଷଣା କରିବା ସକାଶେ ପଠାଇଥିବା ନୋଟିସର ଜବାବ ଶୁକ୍ରବାର ସୁଦ୍ଧା ଦାଖଲ ପାଇଁ ଧାର୍ଯ୍ୟ କରିଥିବାବେଳେ ରାଜସ୍ଥାନ ହାଇକୋର୍ଟ ଏସମ୍ପର୍କିତ ଶୁଣାଣିକୁ ଆସନ୍ତା ସପ୍ତାହ ପର୍ଯ୍ୟନ୍ତ ଘୁଞ୍ଚାଇ ଦେଇଛନ୍ତି।
ବିଦ୍ରୋହୀ ବିଧାୟକମାନଙ୍କ ପକ୍ଷରୁ ଦାଏର ପିଟିଶନର ଶୁଣାଣି କରି ଦୁଇଜଣିଆ ଡିଭିଜନ ବେଞ୍ଚ୍ ଶୁକ୍ରବାର ସନ୍ଧ୍ୟାରେ ବାଚସ୍ପତି ସି.ପି. ଜୋଷୀଙ୍କ ନୋଟିସକୁ ସ୍ଥଗିତ ରଖିଛନ୍ତି। ଉକ୍ତ ଆବେଦନର ଶୁଣାଣି ସୋମବାର ପୂର୍ବାହ୍ନ ୧୦ଟାରେ ହେବ। ମଙ୍ଗଳବାର ୨୧ ତାରିଖ ସନ୍ଧ୍ୟା ୫ଟା ୩୦ ପର୍ଯ୍ୟନ୍ତ ବାଚସ୍ପତି ଏହା ଉପରେ କୌଣସି କାର୍ଯ୍ୟାନୁଷ୍ଠାନ ନେଇପାରିବେ ନାହିଁ ବୋଲି ମୁଖ୍ୟ ବିଚାରପତି ଇନ୍ଦ୍ରଜିତ ମହାନ୍ତି ଓ ଜଷ୍ଟିସ୍ ପ୍ରକାଶ ଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି। ପାଇଲଟ ଓ ଅନ୍ୟ ୧୮ ଅସନ୍ତୁଷ୍ଟ ବିଧାୟକଙ୍କ ପକ୍ଷରୁ ବରିଷ୍ଠ ଆଇନଜୀବୀ ହରିଶ ସାଲ୍ଭେ ଏବଂ ମୁକୁଲ ରୋହତଗୀ ଭିଡିଓ କନ୍ଫରେନ୍ସ ଜରିଆରେ ମାମଲା ପରିଚାଳନା କରିଥିବାବେଳେ ବାଚସ୍ପତିଙ୍କ ସପକ୍ଷରେ ବରିଷ୍ଠ ଆଇନଜୀବୀ ଅଭିଷେକ ମନୁ ସିଂଘଭି ଯୁକ୍ତି ବାଢ଼ିଥିଲେ। ସାଲ୍ଭେ କହିଥିଲେ, ବିଧାନସଭା ଅଧିବେଶନ ଚାଲୁ ନ ଥିବାବେଳେ ଗୃହ ବାହାରେ ହୁଇପ୍ଙ୍କ ନିର୍ଦ୍ଦେଶର ଉଲ୍ଲଂଘନ ସମ୍ବିଧାନର ଦଶମ ପରିଚ୍ଛେଦ ଅନୁସାରେ ଦଳବଦଳ ଆଇନ ପରିସରରେ ଆସୁନାହିଁ। ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ଏକଚ୍ଛତ୍ରବାଦୀ କାର୍ଯ୍ୟକଳାପ ସମ୍ପର୍କରେ ଅସହମତି ପ୍ରକାଶ କରିବା ଆଭ୍ୟନ୍ତରୀଣ ମାମଲା। ଏଥିରେ କିଛି ଦୋଷ ନାହିଁ। ଅଯୋଗ୍ୟତା ନୋଟିସ ‘ଅଭିବ୍ୟକ୍ତିର ସ୍ବାଧୀନତା’ ଏବଂ ଆଭ୍ୟନ୍ତରୀଣ ଆଲୋଚନାକୁ ରୋକିବା ପାଇଁ ଏକ ପ୍ରୟାସ। ସାଲ୍ଭେ ଆହୁରି କହିଥିଲେ, ଆବେଦନକାରୀମାନେ ମୁଖ୍ୟମନ୍ତ୍ରୀଙ୍କ ଏକଚ୍ଛତ୍ରବାଦ ବିରୋଧରେ କଂଗ୍ରେସ ହାଇକମାଣ୍ଡଙ୍କୁ ଅବଗତ କରାଇପାରିବେ। ଏହା ଦଳବଦଳର ପର୍ଯ୍ୟାୟଭୁକ୍ତ ନୁହେଁ। ହୋଟେଲରେ ବୈଠକ ପାଇଁ ହୁଇପ୍ ଲାଗୁ ହୋଇପାରିବ ନାହିଁ। ହୁଇପ୍ କେବଳ ବିଧାନସଭା ଅଧିବେଶନ ବେଳେ ହିଁ ଜାରି କରାଯାଇ ପାରିବ। ରୋହତଗୀ ମଧ୍ୟ ସାଲ୍ଭେଙ୍କ ଯୁକ୍ତିକୁ ଦୋହରାଇଥିଲେ। ବରିଷ୍ଠ ଆଇନଜୀବୀ ତଥା କଂଗ୍ରେସ ନେତା ସିଂଘଭି କହିଥିଲେ, ବାଚସ୍ପତିଙ୍କ ନୋଟିସକୁ ଚ୍ୟାଲେଞ୍ଜ କରି ଦାଏର କରାଯାଇଥିବା ପିଟିଶନ ‘ପ୍ରିମାଚ୍ୟୁର’। ବିଧାନସଭା ଅଧ୍ୟକ୍ଷ ନିଜ ପକ୍ଷ ରଖିପାରିବେ। ତାଙ୍କ ଦ୍ୱାରା ଜାରି କରାଯାଇଥିବା ନୋଟିସ ଉପରେ ଅଦାଲତ ହସ୍ତକ୍ଷେପ କରିପାରିବେ ନାହିଁ।
ପ୍ରକାଶ ଯେ, ସଚିନଙ୍କ ସମେତ ୧୯ ବିଧାୟକ କଂଗ୍ରେସ ବିଧାୟକ ଦଳ ବୈଠକରେ ଦୁଇଥର ଅନୁପସ୍ଥିତ ରହିବା କାରଣରୁ ସେମାନଙ୍କୁ ଅଯୋଗ୍ୟ ଘୋଷଣା କରାଯାଉ ବୋଲି ସରକାରୀ ଦଳ ମୁଖ୍ୟ ସଚେତକ ମହେଶ ଜୋଷୀ ବାଚସ୍ପତିଙ୍କୁ ପତ୍ର ଲେଖି ଅନୁରୋଧ କରିଥିଲେ। ବାଚସ୍ପତି ସମ୍ବିଧାନର ଦଶମ ପରିଚ୍ଛେଦ ପାରା ୨ (୧) (ଏ) ଅନୁସାରେ ବିଧାନସଭାରେ ସେମାନଙ୍କ ଯୋଗ୍ୟତା କାହିଁକି ରଦ୍ଦ କରାଯିବ ନାହିଁ ସେନେଇ ଶୁକ୍ରବାର ସୁଦ୍ଧା ଜବାବ ଦାଖଲ କରିବାକୁ ୧୯ ଜଣଙ୍କୁ ନୋଟିସ ଦେଇଥିଲେ। ପାଇଲଟ ଗୋଷ୍ଠୀ ଏହାକୁ ହାଇକୋର୍ଟରେ ଚ୍ୟାଲେଞ୍ଜ କରି ରାଜସ୍ଥାନ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ବିଦ୍ରୋହୀ ବିଧାୟକମାନେ ପିଟିଶନରେ ଉଲ୍ଲେଖ କରିଛନ୍ତି ଯେ ସେମାନେ କଂଗ୍ରେସ ଟିକେଟରେ ନିର୍ବାଚନ ଜିତିଥିବାରୁ ଦଳ ପ୍ରତି ସେମାନଙ୍କ ନିଷ୍ଠା ଓ ଆନୁଗତ୍ୟ ରହିଛି। ସେମାନେ କଂଗ୍ରେସ ଛାଡ଼ି ଦଳବଦଳ କରିବାକୁ ଚାହୁଁନାହାନ୍ତି। ଗୁରୁବାର ଜଷ୍ଟିସ୍ ସତୀଶ କୁମାର ଶର୍ମାଙ୍କ ଖଣ୍ଡପୀଠ ଏହି ମାମଲାକୁ ଡିଭିଜନ ବେଞ୍ଚ ପାଖକୁ ଶୁଣାଣି ପାଇଁ ପଠାଇ ଦେଇଥିଲେ।
