ବ୍ରହ୍ମପୁର ଅଫିସ,୧୩।୬: ଅତିରିକ୍ତ ଜିଲା ଜଜ୍(ଏଡିଜେ)-୧ ସଂଘମିତ୍ରା ଶର୍ମା ସୋମବାର ଏକ ଡକାୟତି ଉଦ୍ୟମ ମାମଲାର ଶୁଣାଣି କରିଥିଲେ। ପ୍ରମାଣ ଅଭାବରୁ ୪ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ସେମାନେ ହେଲେ ବ୍ରହ୍ମପୁର ଟାଉନ ଥାନା ଅଧୀନ ବିଜିପୁର ବଡ଼ସାହିର ସୁକାନ୍ତ ମହାରଣା (୪୭), ନରସିଂହ ସେଠୀ (୩୭), ବୈଦ୍ୟନାଥପୁର ଥାନା ଅଧୀନ ଗୋଇଲୁଣ୍ଡିର କୁମୁଦ ଚନ୍ଦ୍ର ପାଣିଗ୍ରାହୀ (୪୫) ଓ ଚିନାରୀ ଓରଫ ଦୁର୍ଯ୍ୟୋଧନ ରେଡ୍ଡୀ (୪୫)।
ସୂଚନା ମୁତାବକ, ୨୦୧୦ ଡିସେମ୍ବର ୩୦ ତାରିଖରେ ପାଟପୁର ଥାନା ଅଞ୍ଚଳରେ ଏକ ପରିତ୍ୟକ୍ତ ଘରେ କେତେଜଣ ଅସାମାଜିକ ଯୁବକ ଏକତ୍ରିତ ହୋଇଥିବା ପୋଲିସ ଖବର ପାଇ ସେଠାରେ ଚଢ଼ାଉ କରିଥିଲା। ଦୁର୍ବୃତ୍ତମାନେ ଡକାୟତି ପାଇଁ ଯୋଜନା କରୁଥିବା ପୋଲିସ ଜେରା ବେଳେ ଜାଣିବାକୁ ପାଇଥିଲା। ଏନେଇ ପୋଲିସ ଏକ ମାମଲା (ନଂ.୧୦୦/୧୦) ରୁଜୁ କରି ଅଭିଯୁକ୍ତଙ୍କୁ ଗିରଫକରି କୋର୍ଟ ଚାଲାଣ କରିଥିଲା। ତତ୍କାଳୀନ ଥାନା ଅଧିକାରୀ କୃଷ୍ଣଚନ୍ଦ୍ର ସେଠୀ କୋର୍ଟରେ ଚାର୍ଜଶିଟ ଦାଖଲ କରିଥିଲେ। ପରେ ଅଭିଯୁକ୍ତମାନେ ଜାମିନ ପାଇଥିଲେ। ସୋମବାର ଏହି ମାମଲାର ବିଚାର ବେଳେ ଉପରୋକ୍ତ ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇଥିଲା। ୧୨ ଜଣ ସାକ୍ଷୀ ଓ ଚାର୍ଜଶିଟ ଆଧାରରେ ପ୍ରମାଣ ଅଭାବରୁ ଏଡିଜେ ଉକ୍ତ ୪ ଅଭିଯୁକ୍ତଙ୍କୁ ନିର୍ଦ୍ଦୋଷ ସାବ୍ୟସ୍ତ କରିଛନ୍ତି। ସରକାରଙ୍କ ପକ୍ଷରୁ ଏପିପି ଜ୍ଞାନେନ୍ଦ୍ରନାଥ ଜେନା ଓ ମୁଦୁଲାଙ୍କ ପକ୍ଷରୁ ପ୍ରଭାକର ସାବତ, ଡି.ପ୍ରସାଦ ପାତ୍ର, ରଘୁନାଥ ପ୍ରସାଦ ପାଣିଗ୍ରାହୀ ଓ ଗୋପାଳ ପଣ୍ଡା ମକଦ୍ଦମା ପରିଚାଳନା କରିଥିଲେ।
