ଠାକୁରମୁଣ୍ଡା,୨୧ା୪(ଡି.ଏନ.ଏ.)- ମୟୂରଭଞ୍ଜ ଜିଲା ଠାକୁରମୁଣ୍ଡା ବ୍ଲକ ଚମ୍ପାଝର ପଞ୍ଚାୟତ ଡଙ୍ଗାଡ଼ିହା ଗ୍ରାମ ଘୁଟୁ ସାହିରେ ୩ ଅନାଥ ଭଉଣୀ ଭାଇ ଅସହାୟ ଭାବେ ଜୀବନ ଅତିବାହିତ କରୁଛନ୍ତି। ୨ ବର୍ଷ ପୂର୍ବେ ସେମାନଙ୍କ ବାପା ଡବ ଶିରକାଙ୍କ ମୃତ୍ୟୁ ହୋଇଥିଲା ବେଳେ ମାନସିକ ବିକୃତି ଘଟିଥିବା ମା’ ବେଲ ଶିରକା ୨ ମାସ ତଳେ ଆରପାରିକୁ ଚାଲି ଯାଇଛନ୍ତି। ମା’ ବାପାଙ୍କ ମୃତ୍ୟୁ ପରେ ୩ ନାବାଳକ ବେସାହାରା ହୋଇ ପଡ଼ିଛନ୍ତି। ତାଙ୍କ ବଡ଼ଭାଇ ନାଏକା ଶିରକା(୧୮) ଘରୁ କେଉଁଆଡ଼େ ଚାଲିଯାଇଥିବା ବେଳେ ତାଙ୍କର କୌଣସି ଖୋଜ ଖବର ମିଳୁନାହିଁ। ଅନ୍ୟ ୨ ଭାଇ ଦଲ ଶିିରକା (୧୬) ଓ ସୁକଲାଲ (୧୫)ଙ୍କ ସହିତ ଭଉଣୀ ଚାନ୍ଦୁରୀ(୧୨) ପଡ଼ୋଶୀଙ୍କ ସହାୟତାରେ ଜୀବନ କାଟୁଛନ୍ତି।
୨୦୧୬-୧୭ ଆର୍ଥିକ ବର୍ଷରେ ବାପା ଡବ ଶିରକା ବଞ୍ଚିଥିବା ଅବସ୍ଥାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘରଟିଏ ପାଇଥିଲେ। ଘରକାମ ସରିଥିବା ବେଳେ ସେଥିରେ କବାଟ ଝରକା ନ ଲାଗି ଫାଇନାଲ୍ ବିଲ ଉଠି ଯାଇଛି। ସେହି ଘରେ ୩ ଭଉଣୀଭାଇ ଦୟନୀୟ ଅବସ୍ଥାରେ ରହୁଛନ୍ତି। ତାଙ୍କ ଘରକୁ ଲାଗି ଜଙ୍ଗଲ ଥିବାରୁ ରାତି ସମୟରେ ହିଂସ୍ର ଜନ୍ତୁଙ୍କ ଭୟ ରହୁଛି। ମା’ଙ୍କ ନାମରେ ଥିବା ଖାଉଟି କାର୍ଡରେ ମିଳୁଥିବା ଚାଉଳ ଆଣି ଯେନତେନ ପ୍ରକାରେ ଚଳିଯାଉଛନ୍ତି। ଆବଶ୍ୟକ ସମୟରେ ସାହି ପଡ଼ିଶା ସେମାନଙ୍କୁ ସାହାଯ୍ୟ ସହଯୋଗ ଯୋଗାଇ ଦେଉଛନ୍ତି। ଦୀର୍ଘ ଦିନ ଧରି ନିରୁଦ୍ଦିଷ୍ଟ ଥିବା ସେମାନଙ୍କ ବଡ଼ଭାଇର ସନ୍ଧାନ ସହ ୩ ଅନାଥ ନାବାଳକଙ୍କୁ ପ୍ରଶାସନ ସହାୟତା ଯୋଗାଇଦେବାକୁ ଗ୍ରାମବାସୀ ଦାବି କରିଛନ୍ତି।
