ଜୟପୁର,୧୭ା୧: ୩ଜଣ ସାଙ୍ଗ ଏକ କାର ନେଇ କୋରାପୁଟ ଜିଲା ଲମତାପୁଟ ଅଞ୍ଚଳକୁ ପିକ୍ନିକ୍ କରିବାକୁ ଯାଇଥିଲେ। ଫେରିବା ବେଳେ ଦୁର୍ଘଟଣାର ସମ୍ମୁଖୀନ ହୋଇଛନ୍ତି। କାରଟି ଭାରସାମ୍ୟ ହରାଇ ଶହେ ଫୁଟ ତଳକୁ କୋଲାବ କେନାଲ ଭିତରେ ଖସିପଡିଥିଲା। ଫଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨ଜଣ ଆହତ ହୋଇଛନ୍ତି। ମୃତକ ହେଲେ ଗଦାଧର ସାହୁ। ସେ ଜୟପୁରରେ ଏକ ମୋବାଇଲ କମ୍ପାନୀରେ କାର୍ଯ୍ୟ କରୁଥିଲେ। ତାଙ୍କ ଘର ଭୁବନେଶ୍ୱରରେ ବୋଲି ଜଣାପଡିଛି। ଆହତ ୨ଜଣ ଜୟପୁର ଅଞ୍ଚଳର।
ମିଳିଥିବା ସୂଚନା ମୁତାବକ, ରବିବାର ଗଦାଧର, ପ୍ରଫୁଲ୍ଲ ମଲ୍ଲିକ ଓ ତାଙ୍କର ଜଣେ ସହଯୋଗୀ ଲମତାପୁଟ ଅଞ୍ଚଳକୁ ଏକ କାର(ନଂ.ଓଡି୧୦ଇ-୮୩୭୯) ଯୋଗେ ପିକ୍ନିକ୍ କରିବାକୁ ଯାଇଥିଲେ। ଅପରାହ୍ନରେ ସେମାନେ ଜୟପୁର ଫେରୁଥିଲେ। ସେତିକିବେଳେ ପୁରୁଣାଗଡ଼ ଦେଇ ଯାଇଥିବା କୋଲାବ କେନାଲ ନିକଟରେ ଏକ ସ୍କୁଟିକୁ ସାଇଡ ଦେବା ବେଳେ କାରଟି ଭାରସାମ୍ୟ ହରାଇ ଶହେ ଫୁଟ ତଳକୁ ଖସି ପଡିଥିଲା। ଫଳରେ କାରଟି ସମ୍ପୂର୍ଣ୍ଣ ପାଣିରେ ବୁଡି ଯାଇଥିଲା। ଖବରପାଇ ଓଡ୍ରାଫ ଟିମ୍, ଦମକଳ କର୍ମଚାରୀ ଓ ଜୟପୁର ଟାଉନ ଥାନା ପୋଲିସ ପହଞ୍ଚି ଖୋଜାଖୋଜି ପରେ ପ୍ରଥମେ ପ୍ରଫୁଲ୍ଲ ଓ ତାଙ୍କ ସହଯୋଗୀଙ୍କୁ ଉଦ୍ଧାର କରିଥିଲେ। ପରେ ଗଦାଧରଙ୍କୁ ଉଦ୍ଧାର କରିଥିଲେ। ସେତିକିବେଳକୁ ତାଙ୍କର ମୃତ୍ୟୁ ହୋଇସାରିଥିଲା। ସ୍ଥାନୀୟ ଏସ୍ଡିପିଓ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଥିଲେ। ପ୍ରଫୁଲ୍ଲ ଓ ତାଙ୍କ ସହଯୋଗୀଙ୍କୁ ଚିକିତ୍ସା ଲାଗି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ପୋଲିସ ଘଟଣାର ତଦନ୍ତ ଜାରି ରହିଥିବା ଏସ୍ଡିପିଓ ସୂଚନା ଦେଇଛନ୍ତି।
