ଭାପୁର,୩୦।୭ (ପ୍ରଭାତ ବରାଡ): ଭାପୁର ପଞ୍ଚାୟତ ସମିତିର ୨୦ଗୋଟି ପଞ୍ଚାୟତ ମଧ୍ୟରୁ ପ୍ରାୟ ଚାରି ଗୋଟି ପଞ୍ଚାୟତ ଦେଇ ଓଡ଼ିଶାର ବୃହତ୍ତମ ନଦୀ ମହାନଦୀ ପ୍ରବାହିତ। ସେହି ଚାରି ଗୋଟି ହେଲା ପଥରଚକଡା, କେନ୍ଦୁପଲ୍ଲୀ, ପଦ୍ମାବତୀ ଓ କରବର। ମହାନଦୀରେ ବନ୍ୟାଜଳ ପ୍ରବାହିତ ହେଲେ ପ୍ରଥମେ କରବର ଓ କେନ୍ଦୁପଲ୍ଲୀ ପଞ୍ଚାୟତ ବେଶୀ କ୍ଷତିଗ୍ରସ୍ତ ହେଉଥିବା ବେଳେ ସାମନ୍ୟ ବନ୍ୟା କିମ୍ବା ବର୍ଷା ହେଲେ ଫତେଗଡ ପଞ୍ଚାୟତର ମଣିପୁର ଗାଁ ପ୍ରଥମେ ବାହ୍ୟ ଜଗତରୁ ବିଛିନ୍ନ ହୋଇଥାଏ। ଲଗାଣ ବର୍ଷା ଯୋଗୁ ମଣିପୁର ଗାଁ ଚାରିପଟ ସାତ ଆଠ ଦିନ ହେବ ଚାଷଜମି ବୁଡି ରହିଥିଲା । ଗତକାଲି ମହାନଦୀରେ ବନାଞ୍ଚଳ ଯୋଗୁ ମଣିପୁର ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇ ରାସ୍ତା ଉପରେ ତିନି ଫୁଟ ଉଚ୍ଚର ବନ୍ୟାଜଳ। ଗତକାଲି ଫତେଗଡ ଠାରୁ କାଳିଗିରୀ ଛକଠାରୁ ମଣିପୁର ସାଢେ ଚାରି କିଲୋମିଟର ରାସ୍ତା ଉପରେ ଏକ ଫୁଟ ପାଣି ରହିଥିବା ବେଳେ ବିଳମ୍ବିତ ରାତିରେ ବନ୍ୟାଜଳ ଆସି ରାସ୍ତା ଉପରେ ତିନଗ ଫୁଟ ଉଚ୍ଚର ଜଳ ପ୍ରବାହିତ ହେଇଅଛି। ଚାଷ ଜମିରେ ପାଣିରେ ବୁଡ଼ି ରହିଅଛି। ଗ୍ରାମର ଜନସାଧାରଣ ଅଭିଯୋଗ କରିଛନ୍ତି ଯେ ପାଣି ଘେରରେ ଥିବା ବେଳେ ପ୍ରଶାସନ ତରଫରୁ ଦେଖା ଦର୍ଶନ ନାହିଁ। ଗୋରୁ ଗାଇ ଛେଳି, ମେଣ୍ଢା ଭୋକ ଉପବାସରେ ଅଛନ୍ତି। ପୂର୍ବରୁ ବନ୍ୟାରେ ତିନିକୋଟି ଟଙ୍କାରେ ନିର୍ମିତ ଆରଡ଼ି ରାସ୍ତା ଦବି ଯାଇଥିଲା। ସେଠାରେ ଚିକିଟା ମାଟି ପକା ଯାଇଥିଲା। ଯଦି ପ୍ରଶାସନ ତରଫରୁ ରାସ୍ତାକୁ ପାଞ୍ଚ ଛଅଫୁଟ ଉଚ୍ଚ କରାଯାଆନ୍ତା ତା’ହୋଲେ ଯାତାୟାତ ସ୍ବାଭାବିକ ହୋଇପାରନ୍ତା ବୋଲି ଗ୍ରାମବାସୀ କହିଛନ୍ତି। ଗାଁ ରାସ୍ତା ନିକଟରେ କାଳିଗିରି ନଦୀ ଯାଇଥିବାରୁ ଗହୀର ପାଣି ଓ କାଚେରା ପାଟ ପାଣି ଯୋଗୁ ରାସ୍ତା ନିଚ୍ଚା ଥିବାରୁ ବନ୍ୟା ହେଲା ମାତ୍ରେ ଭାପୁର ବ୍ଲକର ମଣିପୁର ଗାଁ ପ୍ରଥମେ ବାହ୍ୟ ଜଗତରୁ ବିଛିନ୍ନ ହୋଇଥାଏ। ମଣିପୁର ଗ୍ରାମର ଛାତ୍ରୀ ଛାତ୍ରମାନେ ଫତେଗଡ ହାଇସ୍କୁଲକୁ ପାଠପଢିବା ପାଇଁ ଆସିଥାନ୍ତି। ଗ୍ରାମବାସୀ ରାଶନ ସାମଗ୍ରୀ, ଭତ୍ତା ପାଇଁ ଫତେଗଡ ପଞ୍ଚାୟତ କାର୍ଯ୍ୟାଳୟକୁ ଏହି ବାଟ ପାଇଁ ଆସିଥାନ୍ତି। ହେଲେ ରାସ୍ତା ଉପରେ ତିନି ଫୁଟ ଉଚ୍ଚର ବନ୍ୟାଜଳ ଯୋଗୁଁ ଗ୍ରାମବାସୀ ଜଳବନ୍ଦୀ ହୋଇ ରହିଛନ୍ତି।ଜିଲା ପ୍ରଶାସନ ଓ ବ୍ଲକ ପ୍ରଶାସନ ତରଫରୁ ବନ୍ୟା ପାଇଁ ଅନେକ ସଚେତନତା କରିବା ସହିତ ସବୁବେଳେ ସହାଗ ଥିବା କହୁଥିବା ବେଳେ ବାସ୍ତବରେ ତାର ଓଲଟା ଦେଖିବାକୁ ମିଳିଛି ମଣିପୁର ଗ୍ରାମରେ। ମଣିପୁର ଗାଁକୁ ଆଦର୍ଶ ଗ୍ରାମ୍ୟର ମାନ୍ୟତା ପ୍ରଦାନ କରାଯାଇଥିବା ବେଳେ ପ୍ରଶାସନର ଦେଖା ଦର୍ଶନ ନାହିଁ। ତୁରନ୍ତ ଗୋଖାଦ୍ୟ ଯୋଗାଇ ଦେବାପାଇଁ ଓ ଯାତାୟତ ପାଇଁ ଡଙ୍ଗା ଯୋଗାଇ ଦେବାପାଇଁ ଗ୍ରାମବାସୀ ବିନୀତ ଅନୁରୋଧ କରିଛନ୍ତି।
