ଲୋଇସିଂହା,୧୯।୫: ବଲାଙ୍ଗୀର ଜିଲା ଲୋଇସିଂହା ଥାନା ଅନ୍ତର୍ଗତ ଲୋଇସିଂହା-ପଦ୍ମପୁର ରାସ୍ତାର କରକଚିଆ ଛକ ନିକଟରେ ଶୁକ୍ରବାର ମଧ୍ୟାହ୍ନରେ ଏକ ବୋଲେରୋ (ଓଡ଼ି୦୩ଜେ୮୯୫୮) ଧକ୍କାରେ ୩ଜଣଙ୍କର ମୃତ୍ୟୁ ଘଟିଛି। ମୃତକମାନେ ହେଲେ ସଦାଇପାଲି ଗ୍ରାମର ତୁଳସୀ ରାମ ପଟେଲ, କୁସଙ୍ଗ ଗ୍ରାମର ସୁରଞ୍ଜନ ପଟେଲ ଓ ରୋତ୍ ଗ୍ରାମର ରାଜେଶ ପଟେଲ ବୋଲି ଜଣାପଡିଛି।
ପୋଲିସ ସୂଚନା ଅନୁଯାୟୀ, ସଂପୃକ୍ତ ୩ଜଣ ବ୍ୟକ୍ତି ରୋତରୁ ଏକ ବାଇକ୍ ଯୋଗେ କରକଚିଆ ଛକ ପଟକୁ ଆସୁଥିଲେ। ସେହି ସମୟରେ ସାମ୍ନା ପଟରୁ ଯାଉଥିବା ବୋଲେରୋ ସହ ବାଇକ୍ ମୁହାମୁହିଁ ଧକ୍କା ହୋଇଥିଲା । ୩ ବାଇକ୍ ଆରୋହୀ ତଳେ ପଡିଯାଇଥିଲେ। ଦୁର୍ଘଟଣା ହେବା ପରେ ଘଟଣାସ୍ଥଳରୁ ବୋଲେରୋ ଫେରାର ହୋଇଯାଇଥିଲା।
ଖବର ପାଇଁ ସ୍ଥାନୀୟ ତ୍ରିବେଣୀ ସ୍ବୟଂ ସହାୟକ ଗୋଷ୍ଠୀ ସ୍ବେଚ୍ଛାସେବୀ ଯୁବକ ଏବଂ ବିଦ୍ୟୁତ ବିଭାଗର ଡିସି ସ୍କାଡ୍ର କର୍ମଚାରୀ ଆହତଙ୍କୁ ଉଦ୍ଧାର କରି ଲୋଇସିଂହା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ହେଲେ ଡାକ୍ତର ୩ ଜଣଙ୍କୁ ମୃତ ଘୋଷଣା କରିଥିଲେ। ମୃତଦେହ ବ୍ୟବଚ୍ଛେଦ ପାଇଁ ବଲାଙ୍ଗୀର ଭୀମଭୋଇ ମେଡିକାଲ ଏଣ୍ଡ କଲେଜକୁ ପଠାଇବା ପାଇଁ ଆମ୍ବୁଲାନ୍ସ ମିଳୁ ନ ଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି।
