ଚେନ୍ନାଇ,୨୯।୧୧ : ଶ୍ରୀଲଙ୍କା ନୌସେନା ୨୪ ଜଣ ଭାରତୀୟ ଧୀବରଙ୍କୁ ଗିରଫ କରିଛି ଏବଂ ସେମାନେ ବ୍ୟବହାର କରୁଥିବା ପାଞ୍ଚଟି ଡଙ୍ଗାକୁ ଜବତ କରିଛି। ମଙ୍ଗଳବାର ଏକ ସରକାରୀ ବିବୃତ୍ତିରେ ଏହି ସୂଚନା ଦିଆଯାଇଛି। ଉତ୍ତର ଜାଫନା ଉପଦ୍ୱୀପରେ କରେନଗର ଉପକୂଳରେ ନୌସେନା ଏବଂ ଶ୍ରୀଲଙ୍କା କୋଷ୍ଟଗାର୍ଡଙ୍କ ମିଳିତ ଅପରେଶନରେ ସୋମବାର ସନ୍ଧ୍ୟାରେ ଭାରତୀୟ ସାମୁଦ୍ରିକ ସୀମା ବାହାରେ ମାଛ ଧରୁଥିବା ଅଭିଯୋଗରେ ସମ୍ପୃକ୍ତ ଧୀବରଙ୍କୁ ଗିରଫ କରାଯାଇଥିଲା। ପରେ ସେମାନଙ୍କୁ କାଙ୍କେସଥୁରାଇ ବନ୍ଦରକୁ ଅଣାଯାଇ ପରବର୍ତ୍ତୀ କାର୍ଯ୍ୟାନୁଷ୍ଠାନ ପାଇଁ ମତ୍ସ୍ୟ ନିରୀକ୍ଷାଣଳାୟଙ୍କୁ ହସ୍ତାନ୍ତର କରାଯାଇଥିଲା ବୋଲି ଶ୍ରୀଲଙ୍କା ନୌସେନା କହିଛି।
ଚଳିତ ବର୍ଷ ବର୍ତ୍ତମାନ ସୁଦ୍ଧା ମୋଟ ୨୫୨ ଭାରତୀୟ ଧୀବରଙ୍କୁ ଗିରଫ କରାଯାଇଛିବୋଲି ଶ୍ରୀଲଙ୍କା ନୌସେନା ପକ୍ଷରୁ କୁହାଯାଇଛି। ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଏସମ୍ପର୍କରେ କେନ୍ଦ୍ରକୁ ସୂଚନା ଦେଇ ଚିଠି ଲେଖିଛନ୍ତି। ଧୀବର ଏବଂ ସେମାନଙ୍କ ଡଙ୍ଗାର ନିରାପଦ ମୁକ୍ତି ପାଇଁ ଦାବି କରିଛନ୍ତି। ଷ୍ଟାଲିନ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କରଙ୍କୁ ଚିଠି ଲେଖି କହିଛନ୍ତି ଯେ ଶ୍ରୀଲଙ୍କା ନୌସେନା ଦ୍ୱାରା ବାରମ୍ବାର ଗିରଫ ହେବା ଯୋଗୁ ତାମିଲନାଡୁର ଧୀବରଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ଏହା ଦ୍ୱାରା ସେମାନଙ୍କ ଆର୍ଥିକ ସ୍ଥିତି ବିପର୍ଯ୍ୟସ୍ତ ହୋଇପଡ଼ିଥିବା ସେ ଚିଠିରେ ଉଲ୍ଲେଖ କରିଛନ୍ତି।
