ଯାଜପୁର ଅଫିସ,୨୯ା୧୧: ସୁକିନ୍ଦା ଖଣି ଅଞ୍ଚଳରେ କେତେକ ସଂଗଠନ ଏବଂ ଲୋଡିଂ ଠିକାଦାରଙ୍କ ଦ୍ୱାରା ଶ୍ରମିକମାନେ ଶୋଷଣର ଶିକାର ହୋଇଛନ୍ତି। କରୋନା ସମୟରେ ଦୁର୍ଦ୍ଦିନରେ କାଳାତିପାତ କରୁଥିବା ଶ୍ରମିକଙ୍କ ସହାୟତା ପାଇଁ ସରକାର ଯୋଗାଇଥିବା ଶ୍ରମିକ କଲ୍ୟାଣ ପାଣ୍ଠିରୁ ପ୍ରାୟ ୨୩ କୋଟି ଟଙ୍କା ହଡ଼ପ କରାଯାଇଛି। ସେହିପରି ଲୋଡିଂ ଠିକାଦାର ଶ୍ରମିକମାନଙ୍କ ପାଉଣାରୁ ସିଂହଭାଗ କାଟି ବର୍ଷକୁ ପ୍ରାୟ ୪୬ କୋଟି ଟଙ୍କା ହରିଲୁଟ୍ କରିଛନ୍ତି। ଏନେଇ କେତେଜଣ ଶ୍ରମିକ ସ୍ବର ଉତ୍ତୋଳନ କରିବାରୁ ସେମାନଙ୍କୁ ନିଯୁକ୍ତିରୁ ଛଟେଇ କରାଯିବା ସହ ହତ୍ୟା ଧମକ ଦିଆଯାଇଛି। ଏହିମର୍ମରେ ଈଶ୍ୱର ଘଡେଇ, ବୀର ଦାସ, ପ୍ରହ୍ଲାଦ ଓଝା, କାନ୍ଦୁରୁ ଦେହୁରୀ, ଗୌରା ମଲିକ, ଅରୁଣ ଓଝା ପ୍ରମୁଖ ଶ୍ରମିକମାନେ ରବିବାର ରାତିରେ କାଳିଆପାଣି ଥାନାର ଦ୍ୱାରସ୍ଥ ହୋଇ ନ୍ୟାୟ ପାଇଁ ଆକୁଳ ନିବେଦନ କରିଛନ୍ତି।
ସ୍ବାର୍ଥ ଏବଂ ପାରିପାର୍ଶ୍ୱିକ ଉନ୍ନୟନ ନାମରେ ବିଭିନ୍ନ ସଂଗଠନଗୁଡିକ ଗଢ଼ିଉଠିଛି। କିନ୍ତୁ ସୁକିନ୍ଦା କ୍ରୋମାଇଟ ଖଣି ଅଞ୍ଚଳରେ ଏହାର ଓଲଟା ଚିତ୍ର ଦେଖିବାକୁ ମିଳିଛି। ଖଣି ସଂସ୍ଥାଗୁଡିକ ୟୁନିୟନକୁ ହାତ କରିି ପ୍ରଭାବିତ ଅଞ୍ଚଳବାସୀ ତଥା କ୍ଷତିଗ୍ରସ୍ତ ଶ୍ରମିକ ପରିବାରଙ୍କ ସମସ୍ୟାଠାରୁ ଦୂରେଇ ଯାଇଛନ୍ତି। ଫଳରେ ପ୍ରଭାବିତ ଅଞ୍ଚଳର ରାସ୍ତା, ପାନୀୟ ଜଳ, ସ୍ବାସ୍ଥ୍ୟ, ଶିକ୍ଷା ଭଳି ଅନେକ ମୌଳିକ ସମସ୍ୟା ଅସମାହିତ ହୋଇରହିଛି। ଅଞ୍ଚଳବାସୀଙ୍କ ପାଇଁ ଉଦ୍ଦିଷ୍ଟ ଲାଭଧନ ତଥା ସିଏସ୍ଆର୍ ପାଣ୍ଠିରେ ମୁଷ୍ଟିମେୟ ରାଜନେତା ଏବଂ ୟୁନିୟନ କର୍ମକର୍ତ୍ତାଙ୍କ ସମ୍ପତ୍ତି ବୃଦ୍ଧି ହୋଇଛି। ପ୍ରକୃତ ହିତାଧିକାରୀ ସବୁ ସୁବିଧାରୁ ବଞ୍ଚତ୍ତ ରହି ଦୟନୀୟ ଜୀବନ ଜିଉଛନ୍ତି। ଏହିକ୍ରମରେ ବିପଦପୂର୍ଣ୍ଣ ଖଣିରେ କାର୍ଯ୍ୟ କରୁଥିବା ଶ୍ରମିକଙ୍କ ପାଇଁ ଉଦ୍ଦିଷ୍ଟ ବିପୁଳ ଅର୍ଥକୁ ଲୁଟ କରିବାକୁ ନେଇ ଏବେ ଖଣି ଅଞ୍ଚଳରେ ବିବାଦ ଲାଗି ରହିଛି। କାଳିଆପାଣି କ୍ରୋମାଇଟ ଖଣି ଅଞ୍ଚଳରେ ୩୫୦୦ରୁ ଊର୍ଦ୍ଧ୍ୱ ଶ୍ରମିକ କାର୍ଯ୍ୟ କରୁଛନ୍ତି। ନିଜର ହକ୍ ପ୍ରାପ୍ୟ ନ ପାଇ ଶ୍ରମିକମାନଙ୍କୁ ନିୟୋଜିତ କରିଥିବା ଠିକାସଂସ୍ଥାମାନେ ଠକି ଆସୁଛନ୍ତି। କାଳିଆପାଣି ଥାନାରେ ଶ୍ରମିକମାନଙ୍କ ଦ୍ୱାରା ହୋଇଥିବା ଅଭିଯୋଗ ଅନୁସାରେ ମହାମାରୀ କରୋନା ସମୟରେ କାମ ବନ୍ଦ ହୋଇଥିଲା। ସେତେବେଳେ ମେଶିନ ସହାୟତାରେ କେତେକ କାର୍ଯ୍ୟ ସମ୍ପନ୍ନ କରାଯାଇଥିଲା। ଫଳରେ ଶ୍ରମିକମାନେ କୌଣସି କାମ ନ ପାଇ ଆର୍ଥିକ ଅନଟନରେ କାଳାତିପାତ କରିଥିଲେ। ତେବେ ପ୍ରତ୍ୟେକ ଶ୍ରମିକଙ୍କୁ ଟନ ପିଛା ୩୫ ଟଙ୍କା ହିସାବରେ ଶ୍ରମିକ କଲ୍ୟାଣ ପାଣ୍ଠି ପ୍ରଦାନ କରାଯାଇଥିଲା, ଯାହାକି ପ୍ରାୟ ୨୩ କୋଟି ଟଙ୍କା ହେବ ବୋଲି ଶ୍ରମିକମାନେ ଦର୍ଶାଇଛନ୍ତି।
ଅର୍ଥ ପାଇବାକୁ ଶ୍ରମିକମାନେ କରୋନା ସମୟରେ ଖଣି ସଂଘ ଅଫିସକୁ ଯାଇ ବୁଝିଥିଲେ। ତେବେ ସଂଘ କର୍ତ୍ତୃପକ୍ଷ କୌଣସି ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ। ଏହାପରେ ଶ୍ରମିକମାନେ ବର୍ଷକ ତଳେ ସଂଘର ସାଧାରଣ ସମ୍ପାଦକଙ୍କୁ ଭେଟି ପଚାରିବାରୁ ଟଙ୍କା ଆସିଛି, ଖୁବ୍ଶୀଘ୍ର ତୁମମାନଙ୍କୁ ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ହେଲେ ଦିନ ବିତିଗଲା, କିନ୍ତୁ କଲ୍ୟାଣ ପାଣ୍ଠି ଟଙ୍କା ସେମାନେ ପାଇଲେ ନାହିଁ। ପୁଣି ସଂଘ କର୍ତ୍ତୃପକ୍ଷଙ୍କୁ ଭେଟି ପଚାରିବାରୁ କେତେଜଣ ଶ୍ରମିକ ନେତାଙ୍କ ନାମ କହି ସେମାନଙ୍କୁ ସମସ୍ତ ଅର୍ଥ ପ୍ରଦାନ କରାଯାଇଛି ବୋଲି କହିଥିଲେ। ସେହି ଶ୍ରମିକ ନେତାମାନଙ୍କ ପାଖକୁ ଯାଇ ଶ୍ରମିକ କଲ୍ୟାଣ ପାଣ୍ଠି ପ୍ରଦାନ କରିବାକୁ ଦାବି କରିବାରୁ ଓଲଟା ଧମକ ଦିଆଯାଇଥିଲା। କିଛି ଦିନ ପରେ ସେମାନଙ୍କୁ କାମରୁ ଛଟେଇ କରାଯାଇଥିଲା। ଏବେ ସେହି ଶ୍ରମିକମାନଙ୍କ ହାତରେ କୌଣସି କାମ ନାହିଁ। ପରିବାରବର୍ଗ ଭୋକ ଉପାସରେ କାଳାତିପାତ କରୁଛନ୍ତି। ସବୁଆଡୁ ନିରାଶ ହୋଇ ସେମାନେ ନ୍ୟାୟ ପାଇଁ ଥାନାର ଦ୍ୱାରସ୍ଥ ହୋଇଛନ୍ତି। ଉକ୍ତ କଲ୍ୟାଣ ପାଣ୍ଠି ହଡପ ଉପରେ ସେମାନେ ଇଡି ତଦନ୍ତ ଦାବି କରିଛନ୍ତି। ଅନ୍ୟ ଏକ ଅଭିଯୋଗ ଅନୁଯାୟୀ ଦୈନିକ ୧୨୦୦ ଟ୍ରକରେ ପ୍ରାୟ ୧୫ ହଜାର ଟନ କ୍ରୋମାଇଟ୍ ଲୋଡ ହୋଇଥାଏ। ଏଥିରେ ଲୋଡିଂ ଠିକାଦାର ଗାଡ଼ି ପିଛା ୧୮୭୫ ଟଙ୍କା କମ୍ପାନୀ ଓ ଟ୍ରାନ୍ସପୋର୍ଟର ପାଖରୁ ପାଇଥାଏ। ହେଲେ ଶ୍ରମିକମାନଙ୍କୁ ୬୦୦ ଟଙ୍କା ଦିଆଯାଉଛି। ଏ ବାବଦକୁ ମାସିକ ପ୍ରାୟ ୨୫ ଦିନ ଖଣି କାର୍ଯ୍ୟ ଚାଲୁଥିବାବେଳେ ଲୋଡିଂ ଠିକାଦାର ଦିନକୁ ୧୫ ଲକ୍ଷ ୩୦ହଜାର ଟଙ୍କା ଶ୍ରମିକମାନଙ୍କ ନାମରେ ଆସୁଥିବା ଟଙ୍କାକୁ ହଡ଼ପ କରୁଛନ୍ତି। ତେଣୁ ଶ୍ରମିକମାନେ ଟ୍ରକପ୍ରତି ୧୫୦୦ ଟଙ୍କା ଦେବା ପାଇଁ ଅନୁରୋଧ କରିଥିବାବେଳେ ସେମାନେ ଧମକଚମକ ଦେବା ସହ ସ୍ବର ଉତ୍ତୋଳନ କରୁଥିବା ଶ୍ରମିକମାନଙ୍କୁ ନିଯୁକ୍ତିରୁ ଛଟେଇ କରିଛନ୍ତି। ଏ ସଂକ୍ରାନ୍ତରେ ଆସିଷ୍ଟାଣ୍ଟ ଲେବର କମିଶନର(ସେଣ୍ଟ୍ରାଲ) କାର୍ଯ୍ୟାଳୟର ଅଧିକାରୀ ଅଜିତ କୁମାର ସାହୁଙ୍କୁ ପଚାରିବାରେ ସେ କହିଛନ୍ତି, ସେତେବେଳେ ସେ ଏଠାରେ ନଥିଲେ। ଶ୍ରମିକମାନେ ଲିଖିତ ଆକାରରେ ଅଭିଯୋଗ କଲେ ଆବଶ୍ୟକ ତଦନ୍ତ କରି ପଦକ୍ଷେପ ଗ୍ରହଣ କରାଯିବ ବୋଲି ସାହୁ କହିଛନ୍ତି।
