ଭୁବନେଶ୍ୱର,୨।୧୧(ସତ୍ୟଜିତ୍ ରାଉତ) ୨ହଜାର ଟଙ୍କିଆ ନୋଟ୍ ବଦଳାଇବାକୁ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ)ର ଭୁବନେଶ୍ୱରସ୍ଥିତ ଆଞ୍ଚଳିକ କାର୍ଯ୍ୟାଳୟରେ ସାଧାରଣ ଲୋକଙ୍କ ଲମ୍ବା ଧାଡ଼ି ଲାଗିବା ପ୍ରସଙ୍ଗ ଚାରିଆଡ଼େ ଚର୍ଚ୍ଚା ସୃଷ୍ଟି କରିଛି। ସାଧାରଣ ଲୋକଙ୍କୁ ଢାଲ କରି କେତେଜଣ ବ୍ୟକ୍ତି ବେଆଇନ ଭାବେ ଗଚ୍ଛିତ ନୋଟ୍ ବଦଳାଉଥିବା ଜଣାପଡ଼ିବା ପରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଓ କେନ୍ଦ୍ରୀୟ ତଦନ୍ତକାରୀ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳାୟ (ଇଡି) ଟିମ୍ ବୁଧବାର ତଦନ୍ତ ଆରମ୍ଭ କରିଥିଲା।
ତେବେ ଇଓଡବ୍ଲ୍ୟୁ ଓ ଇଡିର ତନାଘନା ପରେ ବି ଆର୍ବିଆଇ ସାମ୍ନାରେ ନୋଟ ବଦଳାଇବାକୁ ସାଧାରଣ ଲୋକଙ୍କ ଭିଡ଼ ଲାଗି ରହିଛି। ଗୁରୁବାର ମଧ୍ୟ ଶହଶହ ଲୋକ ଖରାରେ ଲମ୍ବା ଧାଡ଼ିରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା। ସକାଳ ପ୍ରାୟ ୭ଟାରୁ ଅପରାହ୍ନ ପ୍ରାୟ ୨ ପର୍ଯ୍ୟନ୍ତ ଏହି ଭିଡ଼ ଲାଗି ରହିଥିଲା। କେତେଜଣ ଲୋକ ଭିଡ଼ ପାଇଁ ଟଙ୍କା ନ ବଦଳାଇପାରି ଫେରିଯାଇଥିଲେ। ଏଥିରେ ଏକାଧିକ ର଼୍ୟାକେଟ କାର୍ଯ୍ୟ କରୁଥିବାବେଳେ ଦଲାଲମାନେ କମିଶନି ଦେଇ ଲୋକଙ୍କୁ ଏହି କାର୍ଯ୍ୟରେ ଲଗାଉଥିବା ଚର୍ଚ୍ଚା ହୋଇଥିଲା। ତେଣୁ ଇଡି ଓ ଇଓଡବ୍ଲ୍ୟୁ ପ୍ରାଥମିକ ତଦନ୍ତ ଆରମ୍ଭ କରିଥିଲେ ମଧ୍ୟ ସେଭଳି କିଛି ଫରକ ପଡ଼ି ନ ଥିବା ଭିଡ଼ରୁ ବାରି ହୋଇପଡୁଛି। ଏଜେଣ୍ଟମାନେ ଏହି କାରବାରରେ ସକ୍ରିୟ ଥିବା କୁହାଯାଉଛି।
ସୂଚନାଯୋଗ୍ୟ, ବୁଧବାର ଇଓଡବ୍ଲ୍ୟୁର ଦୁଇ ଜଣିଆ ଟିମ୍ ଓ ମଧ୍ୟାହ୍ନରେ ଇଡିର ଦୁଇ ଜଣିଆ ଟିମ୍ ପର୍ଯ୍ୟାୟକ୍ରମେ ଆର୍ବିଆଇରେ ପହଞ୍ଚତ୍ ଲୋକଙ୍କୁ ପଚରାଉଚରା କରିବା ସହ ତନାଘନା ଆରମ୍ଭ କରିଥିଲେ। ତେବେ ତଦନ୍ତର ଅଗ୍ରଗତି ନେଇ ଇଡି ଓ ଇଓଡବ୍ଲ୍ୟୁ ପକ୍ଷରୁ କୌଣସି ସୂଚନା ଦିଆଯାଇନାହିଁ।
