ଲକ୍ଷ୍ନୌ/ନୂଆଦିଲ୍ଲୀ,୧୫ା୫: ଭାଜପା ଶାସିତ ଉତ୍ତରପ୍ରଦେଶରେ ପ୍ରବାହିତ ଗଙ୍ଗାନଦୀ କୂଳର ୧୧୪୦ କି.ମି. ଅଞ୍ଚଳରେ ୨ ହଜାରରୁ ଊର୍ଦ୍ଧ୍ୱ କୋଭିଡ୍ ରୋଗୀଙ୍କ ମୃତଦେହ ଠାବ କରାଯାଇଛି। ପ୍ରଥମେ ଉଭୟ କେନ୍ଦ୍ର ଓ ୟୁପି ସରକାର ମୃତକଙ୍କ ସଂଖ୍ୟା ଲୁଚାଉଥିଲେ। ମୃତଦେହଗୁଡ଼ିକ ଭାସି ଭାସି ବିହାରରେ ପହଞ୍ଚିବା ପରେ ଏ ନେଇ ଉଦ୍ବେଗ ପ୍ରକାଶ ପାଇଥିଲା। କେତେକ ଜାତୀୟ ଗଣମାଧ୍ୟମ ସଂସ୍ଥାରେ ଖବରଦାତାମାନେ ଗଙ୍ଗାକୂଳ ସଂଲଗ୍ନ ୨୭ ଜିଲାରୁ ଗ୍ରାଉଣ୍ଡ ରିପୋର୍ଟ ସଂଗ୍ରହ କରିଥିଲେ। ରିପୋର୍ଟ ଅନୁସାରେ କାନପୁର, କନୌଜ, ଉନ୍ନାଓ, ଗାଜିପୁର ଓ ବଲିଆରେ ସ୍ଥିତି ଅତି ସଙ୍ଗୀନ ରହିଛି। କେବଳ କନୌଜରେ ଗଙ୍ଗାକୂଳରୁ ୩୫୦ରୁ ଊର୍ଦ୍ଧ୍ୱ ମୃତଦେହ ଠାବ ହୋଇଛି। କାନପୁରରେ କୁଢ଼କୁଢ଼ ମୃତଦେହ ଭାସୁଥିବା ଦେଖିବାକୁ ମିଳିଛି। କେତେକ ସ୍ଥାନରେ ମୃତଦେହଗୁଡ଼ିକୁ କୁକୁର ଓ ଶାଗୁଣା ଖାଉଥିବାର ହୃଦୟ ବିଦାରକ ଦୃଶ୍ୟ ସମସ୍ତଙ୍କୁ ବ୍ୟଥିତ କରିଛି। ପୋଲିସ ଏବେ ଗଙ୍ଗାରେ ଓହ୍ଲାଇ ନୌକାରେ ମାଇକ୍ ଯୋଗେ ଘୋଷଣା କରୁଛି, ମୃତଦେହ ପାଣିରେ ନ ଭସାଇ ସଂସ୍କାର କର। ଯୋଗୀ ଆଦିତ୍ୟନାଥ ସରକାର ଏହି ମୃତଦେହଗୁଡ଼ିକୁ ଗଙ୍ଗାତଟ ବାଲିରେ ପୋତି ଦେଇଥିଲେ। ବର୍ଷା ହେବା ପରେ ମୃତଦେହଗୁଡ଼ିକ ଉପରୁ ବାଲି ଖସି ସତ ପଦାକୁ ଆସିଥିଲା। ଏହାକୁ ନେଇ ଭାଜପା ସରକାରକୁ ବିରୋଧୀ ଟାର୍ଗେଟ କରିଛନ୍ତି। ଆର୍ଜେଡି ନେତା ଲାଲୁ ପ୍ରସାଦ ଯାଦବ ଟୁଇଟ୍ କରିଛନ୍ତି, ୨ ହଜାରରୁ ଅଧିକ ମୃତଦେହ ଗଙ୍ଗାରେ! ଦାରିଦ୍ର୍ୟ ଏତେ ଯେ, ମୃତକଙ୍କ ପରିଜନ ଦାହ ପାଇଁ କାଠ କିଣିପାରୁନାହାନ୍ତି। ସିପିଆଇଏମ୍ ସାଧାରଣ ସମ୍ପାଦକ ସୀତାରାମ ୟେଚୁରୀଙ୍କ ମତରେ ଏହି ମୃତ୍ୟୁ ଓ ମୃତକ ଆତ୍ମୀୟସ୍ବଜନଙ୍କ ଅସହାୟତା ପାଇଁ କେନ୍ଦ୍ର ଓ ରାଜ୍ୟରେ କ୍ଷମତାସୀନ ଭାଜପା ସରକାର ଦାୟୀ। ଗତ ବର୍ଷେ ସମୟ କେବଳ ନିଜ ପିଠି ଥାପୁଡ଼ାଇ ବେକାର କରିଦେଇଛନ୍ତି ସେମାନେ। ଏହା ତାହାର ଭୟଙ୍କର ପରିଣାମ। ସେହିପରି ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଡିଆ କହିଛନ୍ତି, ଇମେଜ୍ ମ୍ୟାନେଜମେଣ୍ଟ ପାଇଁ ହଜାର ହଜାର ଲୋକଙ୍କୁ ଗଙ୍ଗା ବାଲି ତଳେ ପୋତି ଦିଆଗଲା। ଏହା କେବଳ ଗୋଟିଏ ଗାଁର କାହାଣୀ ନୁହେଁ, ୧୧୪୦ କି.ମି.ରେ ବିସ୍ତୃତ ୟୁପିର ବଡ଼ ଅଞ୍ଚଳର ସତ ଯେଉଁଠି ସବୁକିଛି ଭଲ ଭାବେ ମ୍ୟାନେଜ କରାଯାଉଛି।
