ମାଲକାନଗିରି,୨୧ା୪(ଡି.ଏନ୍.ଏ.): ମାଲକାନଗିରି ଜିଲା ପଡ଼ିଆ ବ୍ଲକ କାଲିମେଳା ଥାନା ଅଧୀନ ଉଣ୍ଡୁରୁକୋଣ୍ଡା ପଞ୍ଚାୟତ ରୋଡ଼ଗୁଡ଼ା ଗ୍ରାମରେ ଶୁକ୍ରବାର ଏକ ଅଘଟଣ ଘଟିଛି। ଚଢ଼େଇ ଛୁଆ ଧରିବାକୁ ଯାଇ ବିଦ୍ୟୁତ୍ ତାର ଲାଗି ୨ଜଣ ଛାତ୍ରଙ୍କ ମୃତ୍ୟୁ ଘଟିଛି। ଏହି ଘଟଣା ଅଞ୍ଚଳରେ ଆଲୋଡନ ଖେଳାଇ ଦେଇଛି।
ମିଳିଥିବା ସୂଚନା ମୁତାବକ, ରୋଡଗୁଡ଼ା ଗ୍ରାମର ଦୁଲା ପଡିଆମିଙ୍କ ପୁଅ ଚନ୍ଦନ (୮) ଓ ଲାସା ମାଡିଙ୍କ ପୁଅ ମାନା(୧୨) ନିକଟସ୍ଥ ଉଣ୍ଡୁରୁକୋଣ୍ଡା ସାପ୍ତାହିକ ହାଟ ନିକଟସ୍ଥ ଜଙ୍ଗଲକୁ କେତେଜଣ ସାଙ୍ଗଙ୍କ ସହ ଚଢ଼େଇ ଧରିବାକୁ ଯାଇଥିଲେ। ଉଭୟେ ଏକ କୁସୁମ ଗଛରେ ଚଢ଼ି ଚଢେଇ ଛୁଆଙ୍କୁ ଆଣିବାକୁ ଉଦ୍ୟମ କରୁଥିଲେ। ସେତିକିବେଳେ ଗଛକୁ ଲାଗି ଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ଉଭୟେ ତଳେ ଛିଟିକି ପଡିଥିଲେ। ଏହି ସମୟରେ ଗଛ ତଳେ ଥିବା ଏକ ପଥରରେ ଉଭୟେ ପଡିବାରୁ ସେମାନଙ୍କ ମୁଣ୍ଡ ଏବଂ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିଲା।
ତାଙ୍କ ସହ ଯାଇଥିବା ସାଙ୍ଗଙ୍କଠାରୁ ଘଟଣା ସମ୍ପର୍କରେ ଖବର ଜାଣି ପରିବାର ଲୋକେ ଓ ଗ୍ରାମବାସୀ ଜଙ୍ଗଲରେ ପହଞ୍ଚି ଉଭୟଙ୍କୁ ଉଦ୍ଦାର କରି କାଲିମେଳା ଡାକ୍ତରଖାନା ଆଣିଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ। କାଲିମେଳା ପୋଲିସ ଡାକ୍ତରଖାନାରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ପୋଲିସ ଏକ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଛି। ସୂଚନାଯୋଗ୍ୟ, ମାନା ଉଣ୍ଡୁରୁକୋଣ୍ଡା ସ୍କୁଲରେ ତୃତୀୟ ଶ୍ରେଣୀରେ ପଢୁଥିବା ବେଳେ ଚନ୍ଦନ ସପ୍ତମ ଶ୍ରେଣୀରେ ପଢୁଥିଲେ। ଏବେ ସ୍କୁଲ ଛୁଟି ଥିବାରୁ ଉଭୟେ ସାଙ୍ଗସାଥୀଙ୍କ ସହ ଜଙ୍ଗଲକୁ ଚଢ଼େଇ ଧରିବାକୁ ଯାଇଥିଲେ।
