ରାୟଗଡ଼ା ଅଫିସ,୧୨ା୧୨: ରାୟଗଡ଼ା ସହର ୩୨୬ ନମ୍ବର ଜାତୀୟ ରାଜପଥରେ ରବିବାର ଏକ ବାଇକ୍ ଏବଂ ସ୍କୁଟି ମଧ୍ୟରେ ଦୁର୍ଘଟଣା ଘଟି ୨ ଜଣଙ୍କ ମୃତ୍ୟୁ ଘଟିଛି। ଅନ୍ୟ ଜଣେ ଗୁରୁତର ହୋଇଛନ୍ତି। ଦୁଇ ମୃତକ ହେଲେ ବାଇକ୍ ଚାଳକ ଜି. ଭରତ କୁମାର(୨୩) ଏବଂ ସ୍କୁଟି ଚାଳକ ସୁବ୍ରତ କୁମାର ପଣ୍ଡା। ଜି. ଭରତଙ୍କ ନିଜ ଘର ଆନ୍ଧ୍ର ପ୍ରଦେଶରେ। ସେ ରାୟଗଡ଼ା ଗାନ୍ଧୀନଗରସ୍ଥିତ ମାଉସୀ ଘରେ ରହି ସ୍ଥାନୀୟ ଆଦିତ୍ୟ ହୋଣ୍ଡା ଶୋ’ ରୁମ୍ରେ ମେକାନିକ୍ ତାଲିମ୍ ନେଉଥିଲେ। ସ୍କୁଟି ଚାଳକ ସୁବ୍ରତଙ୍କ ନିଜ ଘର ବ୍ରହ୍ମପୁର। ସେ ରାୟଗଡ଼ା ଜିଲା ଥେରୁବାଲିରେ ରହୁଥିଲେ।
ଘଟଣାରୁ ପ୍ରକାଶ, ସୁବ୍ରତ ଅପରାହ୍ନରେ ପୁଅ ଆୟୁଷ୍ମାନ(୧୦)ଙ୍କୁ ସାଙ୍ଗରେ ନେଇ ରାୟଗଡ଼ା ସହରରୁ ସ୍କୁଟି (ଓଡି ୧୮ବି ୦୦୯୬) ଯୋଗେ ଥେରୁବାଲି ଫେରୁଥିଲେ। ସେହିପରି ଭରତ ଶୋ’ ରୁମ୍ରୁ ଖାଇବା ପାଇଁ ଘରକୁ ଯାଇଥିବାବେଳେ ଅପରାହ୍ନରେ ପୁଣି ନିଜ କାମକୁ ଫେରୁଥିଲେ। ଏହି ସମୟରେ ରାୟଗଡ଼ା ସହରରସ୍ଥିତ ଗଙ୍ଗା ଗ୍ୟାରେଜ୍ ଛକଠାରେ ଦୁଇ ଗାଡ଼ି ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ବାଇକ୍ ଚାଳକ ଭରତଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ସୁବ୍ରତ ଏବଂ ପୁଅ ଆୟୁଷ୍ମାନ ଗୁରୁତର ହୋଇଥିଲେ। ସମସ୍ତଙ୍କୁ ଆମ୍ବୁଲାନ୍ସ ଯୋଗେ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ସୁବ୍ରତଙ୍କ ମଧ୍ୟ ମୃତ୍ୟୁ ଘଟିଥିଲା। ଆୟୁଷ୍ମାନଙ୍କୁ ସଙ୍କଟାପନ୍ନ ଅବସ୍ଥାରେ ବିଶାଖାପାଟଣା ସ୍ଥାନାନ୍ତର କରାଯାଇଛି। ରାୟଗଡ଼ା ଟାଉନ ଥାନା ପୋଲିସ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି।
