ଜଗନ୍ନାଥପ୍ରସାଦ,୧୬ା୧୨(ଡି.ଏନ.ଏ.): ବିଶାଖାପାଟଣା ପୋର୍ଟରେ ଚାକିରି ଦେବା ନାଁରେ ୨୭ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗରେ ମଙ୍ଗଳବାର ଗଞ୍ଜାମ ଜିଲା ଜଗନ୍ନାଥପ୍ରସାଦ ଥାନା ପୋଲିସ ଜଣଙ୍କୁ କୋର୍ଟ ଚାଲାଣ କରିଛି। ସେ ହେଲେ ଏହି ଥାନା ଅନ୍ତର୍ଗତ ସରକୁମ୍ପା ଗ୍ରାମର ବଂଶୀଧର ପଟ୍ଟନାୟକ। ବଂଶୀଧର ୨୦୧୮ ଡିସେମ୍ବରରେ ବିଶାଖାପାଟଣା ଅନ୍ତର୍ଗତ ପୋର୍ଟ ଅଞ୍ଚଳରେ ରହୁଥିଲେ। ନିଜକୁ ଗୋପାଳପୁର ପୋର୍ଟର ସୁପରଭାଇଜର ପରିଚୟ ଦେଇ ପୋର୍ଟରେ ବ୍ଲାକ୍ ଡାଇମଣ୍ଡ, ରେଡ୍ରୋଜ ନାମକ ଦୁଇଟି ଜାହାଜ ଥିବା ସେଠାରେ କେତେଜଣ ଶ୍ରମିକଙ୍କୁ କହିଥିଲେ। ବିଶାଖାପାଟଣା ପୋର୍ଟରେ କାମ କରୁଥିବା ଅସ୍ଥାୟୀ କର୍ମଚାରୀ କର୍ମଚାରୀ ଏମ୍. ନାନୀ ବାବୁଙ୍କ ସହ ବଂଶୀଧର ବନ୍ଧୁତା କରିଥିଲେ। ଗୋପାଳପୁର ପୋର୍ଟରେ ଚାକିରି କରାଇ ଦେବାର ମିଥ୍ୟା ପ୍ରତିଶ୍ରୁତି ଦେଇ ପ୍ରାୟ ୯୦ ଜଣଙ୍କଠାରୁ ୩୦ ହଜାର ଟଙ୍କା ଲେଖାଏ ମୋଟ ୨୭ ଲକ୍ଷ ଟଙ୍କା ନେଇଥିଲେ। ୨୦୨୦ ଅଗଷ୍ଟ ମଧ୍ୟରେ ସମସ୍ତଙ୍କୁ ଚାକିରିରେ ଯୋଗ ଦେବାକୁ ମିଥ୍ୟା ନିଯୁକ୍ତିପତ୍ର ପ୍ରଦାନ କରିଥିଲେ। ହେଲେ ଗତ ଅଗଷ୍ଟ ପରଠାରୁ ଟଙ୍କା ଦେଇଥିବା ବ୍ୟକ୍ତି ଓ ଲେବର ୟୁନିୟନର ନାନୀ ବାବୁ ବାରମ୍ବାର ଫୋନ କରିଥିଲେ ମଧ୍ୟ ବଂଶୀଧର ଉଠାଇ ନ ଥିଲେ। ନାନୀ ବାବୁ ବହୁ ଖୋଜାଖୋଜି ପରେ ଜଗନ୍ନାଥପ୍ରସାଦ ବଜାରରେ ବଂଶୀଧରଙ୍କୁ ଦେଖି ତାଙ୍କର ଗାଡ଼ି ନମ୍ବର ଚିହ୍ନି ସ୍ଥାନୀୟ ଥାନାରେ ଅଭିଯୋଗ କରିଥିଲେ। ପୋଲିସ ତଦନ୍ତ କରି ବଂଶୀଧରଙ୍କୁ ତାଙ୍କ ଘରୁ ଧରିବା ସହ ନ କଲି କାଗଜପତ୍ର ଓ ୪୮ ହଜାର ଟଙ୍କା ଜବତ କରିଥିଲା। ପଚରାଉଚରା ବେଳେ ବଂଶୀଧର ଠକେଇ କରିଥିବା ସ୍ବୀକାର କରିଥିଲେ। ବିଶାଖାପାଟଣାରୁ ଆସିଥିବା ଏମ୍. ନାନୀଙ୍କ ଏତଲା କ୍ରମେ ପୋଲିସ ନଂ.୨୯୮/୨୦ ମାମଲା ରୁଜୁ କରି ଠକେଇ ଅର୍ଥରେ କିଣିଥିବା ସ୍କୁଟିକୁ ଜବତ କରିଛି।
