କ୍ୱିଭ୍, ୫।୪ : ରୁଷିଆ ଏବଂ ୟୁକ୍ରେନ ମଧ୍ୟରେ ଗତ ୪୧ ଦିନ ଧରି ଯୁଦ୍ଧ ଜାରି ରହିଛି। ଅପରପକ୍ଷରେ, କ୍ୱିଭ୍ର ବୁଚାଠାରେ ହୋଇଥିବା ହତ୍ୟାକାଣ୍ଡର ଫଟୋ ଏବେ ସୋସିଆଲ ମିଡ଼ିଆରେ ହଇଚଇ ସୃଷ୍ଟି କରିଛି। ବୁଚାରେ ୪୦୦ରୁ ଅଧିକ ମୃତଦେହ ମିଳିଛି ଏବଂ ଏପର୍ଯ୍ୟନ୍ତ ମୃତଦେହ ଉଦ୍ଧାର କରାଯାଉଛି। ଏହାର ଜବାବରେ ରାଷ୍ଟ୍ରପତି ଭୋଲଡମିୟର ଜେଲେନସ୍କି ରୁଷିଆର ସୈନିକମାନଙ୍କୁ ହତ୍ୟାକାରୀ ଏବଂ ବଳାତ୍କାରୀ ବୋଲି କହିଛନ୍ତି। ବୁଚା ପରେ ଏବେ ସୁମି ସହରର ନରସଂହାରର ଫଟୋ ବେଶ୍ ଭାଇରାଲ ହେବାରେ ଲାଗିଛି।
ୟୁକ୍ରେନର ସୁମିରେ ସାଧାରଣ ଲୋକଙ୍କ ମୃତଦେହ ଖୋଜିବା ପ୍ରକ୍ରିୟା ମଧ୍ୟ ଆରମ୍ଭ ହୋଇଛି। ଏଠାରେ ରାଜ୍ୟପାଳ କହିଛନ୍ତି ଯେ ସୁମିର କୋନୋଟୋପରେ ୟୁକ୍ରେନ ବହୁ ନାଗରିକଙ୍କ ମୃତଦେହ ମିଳିଛି। ବୁଚା ଭଳି ଏଠାରେ ମଧ୍ୟ ସାଧାରଣ ଲୋକଙ୍କୁ ହତ୍ୟା କରାଯିବା ପୂର୍ବରୁ ନିର୍ଯାତନା ଦିଆଯାଇଥିବା ସେ କହିଛନ୍ତି।
ୟୁକ୍ରେନର ବାୟୁସେନା କହିଛି ଯେ ପଶ୍ଚିମ ୟୁକ୍ରେୁନ୍ରେ ତିନୋଟି ରୁଷୀୟ କ୍ଷେପଣାସ୍ତ୍ର ଦ୍ୱାରା ଆକ୍ରମଣ କରାଯାଇଥିଲା। ଏଥିସହିତ ଚତୁର୍ଥ କ୍ଷେପଣାସ୍ତ୍ରକୁ ଲକ୍ଷ୍ୟସ୍ଥଳରେ ପହଞ୍ଚିବା ପୂର୍ବରୁ ଅଟକାଇ ଦିଆଯାଇଥିଲା। ଏହି କ୍ଷେପଣାସ୍ତ୍ରଗୁଡିକ ବେଲାରୁଷର ଏସ୍ୟୁ-୩୫ ଜେଟରୁ ଉତକ୍ଷେପଣ କରାଯାଇଥିଲା।
ରୁଷିଆର ଆକ୍ରମଣ ପରେ ୟୁକ୍ରେନୀୟମାନେ ଅନ୍ୟ ଦେଶରେ ଆଶ୍ରୟ ନେଉଛନ୍ତି। ପୋଲାଣ୍ଡର ଅଧିକାରୀ କହିଛନ୍ତି ଯେ ବର୍ତ୍ତମାନ ସୁଦ୍ଧା ପୋଲାଣ୍ଡରେ ୨.୫ ନିୟୁତ ୟୁକ୍ରେନ ଶରଣାର୍ଥୀ ପହଞ୍ଚିଛନ୍ତି।
