ଚାଟୋଗ୍ରାମ, ୭ା୨- ପଦାର୍ପଣକାରୀ ଓ୍ବେଷ୍ଟଇଣ୍ଡିଜ ବ୍ୟାଟ୍ସମ୍ୟାନ କାଇଲ୍ ମାୟର୍ସ ଅପରାଜିତ ୨୧୦ ରନ୍ର ଇନିଂସ ଅବସରରେ ବହୁ ରେକର୍ଡର ଅଧିକାରୀ ହୋଇଛନ୍ତି। ୩୧୦ ବଲର ସମ୍ମୁଖୀନ ହୋଇଥିବା ମାୟର୍ସଙ୍କ ଇନିଂସରେ ସାମିଲ ଥିଲା ୨୦ ଚୌକା ଓ ୭ ଛକା। ବିଶ୍ୱ କ୍ରିକେଟରେ ୧୮ ବର୍ଷ ପରେ ପ୍ରଥମ ବ୍ୟାଟ୍ସମ୍ୟାନ ଭାବେ ପଦାର୍ପଣ ଟେଷ୍ଟରେ ଦ୍ୱିଶତକ ହାସଲ କରିବାରେ ମାୟର୍ସ ପ୍ରଥମ କ୍ରିକେଟର। ଏହି ସଫଳତା ହାତେଇବାରେ ସେ ମୋଟ ଉପରେ ବିଶ୍ୱର ୬ଷ୍ଠ ବ୍ୟାଟ୍ସମ୍ୟାନ। ଅନ୍ତିମ ଥର ୨୦୦୩ରେ ଦକ୍ଷିଣ ଆଫ୍ରିକାର ଜ୍ୟାକ୍ସ ରୁଡଲଫ (୨୦୦୩) ସମାନ ଦଳ ବିପକ୍ଷରେ ସମାନ ଭେନ୍ୟୁରେ ପଦାର୍ପଣ ଟେଷ୍ଟରେ ହାସଲ କରିଥିଲେ ଦ୍ୱିଶତକ।
ଆଉ ୨୮ ବର୍ଷୀୟ ବାମହାତୀ ବ୍ୟାଟ୍ସମ୍ୟାନ ମାୟର୍ସ ପଦାର୍ପଣ ଟେଷ୍ଟର ଚତୁର୍ଥ ଇନିଂସରେ ସର୍ବାଧିକ ବ୍ୟକ୍ତିଗତ ରନ୍ କରିବାର ରେକର୍ଡ ମଧ୍ୟ ନିଜ ନାମରେ କରିଛନ୍ତି। ତାଙ୍କର ଦ୍ୱିଶତକୀୟ ପାଳି ଯୋଗୁ ଓ୍ବେଷ୍ଟଇଣ୍ଡିଜ ଟେଷ୍ଟ କ୍ରିକେଟ ଇତିହାସର ୫ମ ସର୍ବାଧିକ ଟାର୍ଗେଟ(୩୯୫)ର ପିଛା କରି ବିଜୟ ହାସଲ କରିଛି।
