ଚେନ୍ନାଇ, ୧୫।୬(ଆଇଏଏନ୍ଏସ୍): ପୂର୍ବତନ ସାଧାରଣ ସମ୍ପାଦକ ଭି.କେ. ଶଶିକଳାଙ୍କ ସହ ସମ୍ପର୍କ ରଖିଥିବା ଏଆଇଏଡିଏମ୍କେର ମୁଖପାତ୍ର ଭି. ପୁଗାଝେନ୍ଦିଙ୍କ ସମେତ ୧୭ ଜଣ ନେତାଙ୍କୁ ସୋମବାର ଦଳରୁ ବହିଷ୍କାର କରାଯାଇଛି। ଦଳ ମୁଖ୍ୟାଳୟରେ ଏଆଇଏଡିଏମ୍କେର ବୈଠକ ବସି ଏଭଳି ନିଷ୍ପତ୍ତି ନିଆଯାଇଛି। ବହିଷ୍କୃତ ଅନ୍ୟମାନଙ୍କ ମଧ୍ୟରେ ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଏମ୍. ଆନନ୍ଦନ ଏବଂ ପୂର୍ବତନ ଏମ୍ପି ଚିନ୍ନାସ୍ବାମୀ ଅଛନ୍ତି। ବୈଠକରେ ଶଶିକଳାଙ୍କ ବିରୋଧରେ ଏକ ପ୍ରସ୍ତାବ ଗୃହୀତ ହୋଇଛି। ଦଳୀୟ ନେତାମାନଙ୍କ ସହ ସମ୍ପର୍କ ରଖୁଥିବାରୁ ତାଙ୍କୁ ନିନ୍ଦା କରାଯାଇଛି। ସେ ଦଳକୁ କବ୍ଜା କରିବା ପାଇଁ ଉଦ୍ୟମ କରୁଥିବା ଏବଂ କେତେଜଣ ନେତାଙ୍କ ସହ କଥା ହୋଇ ପରେ କଥାବାର୍ତ୍ତାର କିଛି ଅଂଶକୁ ପ୍ରଘଟ କରାଇବାର ଡ୍ରାମା କରୁଥିବା ଅଭିଯୋଗ ହୋଇଛି।
ସୂଚନାଯୋଗ୍ୟ, ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ବାଙ୍ଗାଲୋର ସେଣ୍ଟ୍ରାଲ ଜେଲ୍ରେ ୪ ବର୍ଷ ରହି ଫେରିବା ପରେ ଶଶିକଳା ତାମିଲନାଡୁ ରାଜନୀତିରେ ପ୍ରବେଶ ପାଇଁ ଉଦ୍ୟମ କରିଥିଲେ। ଏହାର କିଛି ଦିନ ପରେ ସେ ସକ୍ରିୟ ରାଜନୀତିରୁ ଓହରିଯିବା ନେଇ ଘୋଷଣା କରି ରାଜନୈତିକ ସମୀକ୍ଷକ ଏବଂ ଦଳପ୍ରେମୀଙ୍କୁ ଆଶ୍ଚର୍ଯ୍ୟ କରିଦେଇଥିଲେ। ଗତ ନିର୍ବାଚନରେ ଏଆଇଏଡିଏମ୍କେ ପରାଜିତ ହେବା ପରେ ଶଶିକଳା ପୁଣିଥରେ ରାଜନୀତିରେ ପ୍ରବେଶ ଲାଗି ଉଦ୍ୟମ ଚଳାଇଥିବା କୁହାଯାଉଛି।
