କେନ୍ଦୁଝର,୩୧ା୩(ସ୍ବ.ପ୍ର.): କେନ୍ଦୁଝର ଜିଲାର ଶତକଡ଼ା ୯୫ ଭାଗ ସଡ଼କ ଦୁର୍ଘଟଣା ଜାତୀୟ ରାଜପଥମାନଙ୍କରେ ହେଉଛି। ଅଧିକ ଦୁର୍ଘଟଣାର କାରଣ ଦୁଇ ଚକିଆ ଯାନ ସାଜିଛି। ବିିଶେଷ କରି ମଦ ପିଇ, ବେପରୁଆ ଗାଡ଼ି ଚାଳନା, ଓଭରଟେକ, ବେଆଇନ ପାର୍କିଂ ଯୋଗୁ ଅଧିକ ଦୁର୍ଘଟଣା ହେଉଛି। ଜାତୀୟ ରାଜପଥ ୨୦ ଓ ୫୨୦ ( ପାଣିକୋଇଲିରୁ ରିମୁଳି ଓ ରିମୁଳିଠାରୁ ରାଜାମୁଣ୍ଡା) ର ତ୍ରୁଟିପୂର୍ଣ୍ଣ ଏବଂ ଅସମ୍ପୂର୍ଣ୍ଣ ରାସ୍ତା ଯୋଗୁ ଦୁର୍ଘଟଣା ଘଟୁଛି। ଏଭଳି କେନ୍ଦୁଝର ଜିଲାରେ ବିଭିନ୍ନ ସ୍ଥାନରେ ୧୭ଟି ବ୍ଲାକ୍ ସ୍ପଟ୍ (ଦୁର୍ଘଟଣା ପ୍ରବଣ ସ୍ଥାନ) ରହିଥିବା ଚିହ୍ନଟ ହୋଇଛି। ସେଥରୁ ଦୁଇଟିକୁ ବନ୍ଦ କରାଯାଇଛି।
ସ୍ପଟ୍ ଗୁଡ଼ିକ ହେଲା ବଡବିଲ ଥାନା ଅନ୍ତର୍ଗତ ଭଦ୍ରାସାହି ଛକ, ଚମ୍ପୁଆ ଥାନା ଅନ୍ତର୍ଗତ ନାରଦପୁର ଛକ, ଜାମୁଦଲକ ଆଙ୍ଗୁଳିଆ ଛକ, ଘଟଗାଁ ଥାନା ବାଲି ଯୋଡ଼ି ଛକ, ଢେଙ୍କିକୋଟ ଓଭରବ୍ରିଜ, ପିପିଳିଆ, ହରିଚନ୍ଦନପୁର ଥାନା ଆଳୁଘାଟି, ହରିଚନ୍ଦନପୁର ଓ ପଣ୍ଡାପଡ଼ା ଥାନା ଅଧୀନସ୍ଥ କୁଆଁଝରଣ ଘାଟି, କାଞ୍ଜିପାଣି ଥାନାର କୁସୁମ ଘାଟି, କାଞ୍ଜିପାଣି ଘାଟି, ସଦର ଥାନା ଅନ୍ତର୍ଗତ ବଡ଼ପଶି, ଗୋପାଳପୁର ପଦ୍ମପୁର ଛକ, ରାଇସୁଆଁ ଓଭରବ୍ରିଜ, ପଳାଶପଙ୍ଗା ଛକ, ଘଷିପୁରା ଥାନା ଅନ୍ତର୍ଗତ ଦରଖୋଳା ବୋଲି ଜଣାପଡ଼ିଛି। ସରକାରୀ ରିପୋର୍ଟ ଅନୁଯାୟୀ, ୨୦୨୨ ଜାନୁୟାରୀରୁ ନଭେମ୍ବର ପର୍ଯ୍ୟନ୍ତ ୬୬୯ଟି ସଡ଼କ ଦୁର୍ଘଟଣା ଘଟି ୩୪୯ଜଣ ବ୍ୟକ୍ତି ପ୍ରାଣ ହରାଇଥିଲେ। ୪୬୦ଜଣ ଦିବ୍ୟାଙ୍ଗ ହୋଇଥିଲେ। ୨୦୨୧ରେ ୬୨୧ଟି ସଡ଼କ ଦୁର୍ଘଟଣା ଘଟିଥିବା ବେଳେ ୩୧୬ ଜଣ ପ୍ରାଣ ହରାଇଥିଲେ। ୪୯୫ଜଣ ଦିବ୍ୟାଙ୍ଗ ହୋଇଥିଲେ। ଆଞ୍ଚଳିକ ପରିବହନ ଅଧିକାରୀ ଇଂ ଗୋପାଳ କୃଷ୍ଣ ଦାସ କହିଛନ୍ତି, ଦୁର୍ଘଟଣା ରୋକିବା ପାଇଁ ଧରପଗଡ଼ କରି କାଯର୍ର୍ୟାନୁଷ୍ଠାନ ଗ୍ରହଣ କରାଯାଉଛି। ଆବଶ୍ୟକ ପଡ଼ିଲେ ଲାଇସେନ୍ସ, ପରମିଟ ରଦ୍ଦ କରିବା ଭଳି ପଦକ୍ଷେପ ଗ୍ରହଣ କରୁଛୁ। ଲୋକେ ସଚେତନ ହୋଇ ନିଜର ସୁରକ୍ଷା ପାଇଁ ଟ୍ରାଫିକ ନିୟମ ପାଳନ କରିବା ସହ ବିଭାଗକୁ ସହଯୋଗ କରିବାକୁ ନିବେଦନ କରିଥିଲେ।
