ନାଉଗଁା,୭ା୧୨(ସ୍ବ.ପ୍ର): ନାଉଗଁା ବ୍ଲକରେ ୧୧୯ ଅଙ୍ଗନଓ୍ବାଡି କେନ୍ଦ୍ର ମଧ୍ୟରୁ ୭୯ଟି କେନ୍ଦ୍ର ୧୫ ଦିନରୁ ଊର୍ଦ୍ଧ୍ୱ ହେବ ବନ୍ଦ ରହିଛି। ଓଡ଼ିଶା ଅଙ୍ଗନଓ୍ବାଡି ସଂଘର ଆହ୍ବାନକ୍ରମେ ଏସବୁ କେନ୍ଦ୍ରର କର୍ମୀ ଓ ସହାୟିକାମାନେ ୮ ଦଫା ଦାବି ନେଇ ବିଧାନସଭା ନିକଟରେ ପ୍ରତିବାଦ କରୁଛନ୍ତି। ସେମାନଙ୍କ ଦାବି ମଧ୍ୟରେ ୬ ବହିଷ୍କୃତ ଅଙ୍ଗନଓ୍ବାଡି କର୍ମୀଙ୍କ ପୁନଃ ନିଯୁକ୍ତି, ଅଙ୍ଗନଓ୍ବାଡି କର୍ମୀ ଏବଂ ସହାୟିକାଙ୍କ ଦରମା ବୃଦ୍ଧି, ସେମାନଙ୍କୁ ସରକାରୀ ମାନ୍ୟତା ପ୍ରଦାନ ଓ ଖାଲିଥିବା ସମସ୍ତ ସୁପରଭାଇଜର ପଦବୀ ପୂରଣ ଆଦି ଅନ୍ତର୍ଭୁକ୍ତ। ଦାବି ପୁରଣ ନ ହେବା ପର୍ଯ୍ୟନ୍ତ କେନ୍ଦ୍ର ଖୋଲା ହେବା ନାହିଁ ବୋଲି ଓଡ଼ିଶା ଅଙ୍ଗନଓ୍ବାଡି ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି। ଏଥିଯୋଗୁ ପ୍ରତି ଗ୍ରାମରେ ଗର୍ଭବତୀ, ପ୍ରସୂତି , ୦-୩ ବର୍ଷ ପର୍ଯ୍ୟନ୍ତ ଶିଶୁ , ପ୍ରାକ୍ ବିଦ୍ୟାଳୟ ପ୍ରଭାବିତ ହୋଇଛନ୍ତି। ଗର୍ଭବତୀ, ପ୍ରସୂତି ମା’ ଓ ଶିଶୁମାନେ ଛତୁଆ ଓ ଅଣ୍ଡା ପାଇପାରୁ ନ ଥିବା ବେଳେ ପ୍ରାକ ବିଦ୍ୟାଳୟରେ ମଧ୍ୟାହ୍ନ ଭୋଜନ ଏକ ପ୍ରକାର ଠପ୍ ହୋଇ ଯାଇଛି। ବନ୍ଦ ରହିଥିବା ଅଙ୍ଗନଓ୍ବାଡ଼ି କେନ୍ଦ୍ରରେ ଗର୍ଭବତୀ,ପ୍ରସୂତି ଓ ଶିଶୁଙ୍କୁ କିପରି ସୁଷମ ଖାଦ୍ୟ ଦିଆଯାଇପାରିବ ସେନେଇ ପ୍ରୟାସ ଜାରି ରହିଛି ବୋଲି ସିଡିପିଓ ବାସନ୍ତୀ ମାଇନ କହିଛନ୍ତି। ସିଡିପିଓଙ୍କ କାର୍ଯ୍ୟାଳୟ ପକ୍ଷରୁ ସ୍ବୟଂ ସହାୟିକା ଗୋଷ୍ଠୀ ଓ ନିଜସ୍ବ ଉଦ୍ୟମରେ ଖାଦ୍ୟ ବଣ୍ଟନ କରାଯାଉଛି ବୋଲି ସେ କହିଛନ୍ତି। ମାତ୍ର ଅନେକ ସ୍ଥାନରେ ହିତାଧିକାରୀମାନେ ଖାଦ୍ୟ ଗ୍ରହଣ କରୁ ନ ଥିବା ନେଇ ଅଙ୍ଗନଓ୍ବାଡ଼ି କର୍ମୀମାନେ ପ୍ରକାଶ କରିଛନ୍ତି।
