ବାଲେଶ୍ୱର ଅଫିସ, ୭।୧: ବାଲେଶ୍ୱର ଜିଲା ପ୍ରଶାସନ ଓ ଓରମାସ୍ ପକ୍ଷରୁ ଚଳିତମାସ ୧୩ତରିଖରୁ ଜିଲା ମହୋତ୍ସବ ଓ ପଲ୍ଲିଶ୍ରୀ ମେଳା ତଥା କୋଶମ୍ବ-୨୦୨୩ ସହରସ୍ଥିତ ସରକାରୀ ଆଇଟିଆଇ ପଡିଆରେ ଆୟୋଜିତ ହେବ। ଏନେଇ ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ଶୁକ୍ରବାର ଅପରାହ୍ନରେ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
୨୫୦ଟି ଅସ୍ଥାୟୀ ଷ୍ଟଲ ଖୋଲାଯିବ। ରାଜ୍ୟ ତଥା ରାଜ୍ୟ ବାହାରୁ ଆସିବାକୁ ଥିବା ମୋଟ ୩୦୦ଟି ଏସ୍ଏଚ୍ଜିର ୬୦୦ ମହିଳା ସେମାନଙ୍କର ଦ୍ରବ୍ୟ ବିକ୍ରି କରିବାକୁ ସୁଯୋଗ ପାଇବେ। ଏଥିସହିତ ପ୍ରତ୍ୟେକ ସନ୍ଧ୍ୟାରେ ଜିଲା ତଥା ଓଡିଶାର ଅନ୍ୟାନ୍ୟ ଜିଲା ଗଞ୍ଜାମର ଯୋଡି ଶଙ୍ଖ ଓ ପାଇକ ଆଖଡା, ଭଦ୍ରକର ମୋଗଲ ତାମସା, କଟକର ଘୋଡ଼ାନାଚ, ଖୋର୍ଦ୍ଧାର ପାଇକ ଆଖଡା, ମୟୂରଭଞ୍ଜର ଛଉନାଚ, ଯାଜପୁରର ଲଉଡି ଓ ବୌଦ୍ଧର ଆଦିବାସୀ ନୃତ୍ୟ କଳାକାରମାନଙ୍କ ଦ୍ୱାରା ପରିବେଷଣ କରିବାର କାର୍ଯ୍ୟକ୍ରମ ରହିଛି। ଏଥିସହିତ ଓଡିଆ ଓ ହିନ୍ଦୀ ସଙ୍ଗୀତ ତଥା ସିନେମା ଜଗତର ନାମୀ କଳାକାରମାନଙ୍କ ଦ୍ୱାରା ପ୍ରିନ୍ସଡ୍ୟାନ୍ସ ଗ୍ରୁପ, ସମ୍ବଲପୁରୀ ନାଚ, ଓଡିଶୀ ନାଚ, ଦୀପ୍ତିରେଖା ପାଢୀ, ଆଶୁତୋଷ ମହାନ୍ତି, ହୁମାନ ସାଗର, ଶଶାଙ୍କ ଶେଖର, ହେମନ୍ତ ବ୍ରିଜବାସୀ ଓ ଜାଭେଦ ଅଲି ଏହି କାର୍ଯ୍ୟକ୍ରମରେ ନିଜର କଳା ପ୍ରଦର୍ଶନ କରିବେ । ହକି ବିଶ୍ୱକପର ସିଧା ପ୍ରସାରଣର କରିବାର ମଧ୍ୟ ଆୟୋଜନ କରାଯାଇଛି। ପ୍ରତ୍ୟହ ପୂର୍ବାହ୍ନରେ ବିଭିନ୍ନ ବିଭାଗ ତରଫରୁ ଆଲୋଚନାଚକ୍ର ଆୟୋଜନ କରାଯାଇଛି ।
ଏହି ଅବସରରେ ରାଜ୍ୟ ସରକାରଙ୍କର କୃଷି ବିଭାଗ ତରଫରୁ କୃଷିମେଳାର ଆୟୋଜନ କରାଯାଇଛି। ଖବରଦାତା ସମ୍ମିଳନୀରେ ଅତିରିକ୍ତ ଜିଲାପାଳ ନୀଲୁ ମହାପାତ୍ର ଓ ଜିଲା ପ୍ରକଳ୍ପ ଅଧିକାରୀ ରବୀନ୍ଦ୍ର ସାହୁ ଉପସ୍ଥିତ ଥିଲେ।
