ରାୟଗଡ଼ା ଅଫିସ,୨୮ା୨: ରାୟଗଡ଼ା ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଜନ୍ମରୁ ୫ବର୍ଷର ଶିଶୁଙ୍କ ପାଇଁ ପୋଲିଓ ବୁନ୍ଦା ପ୍ରଦାନ କାର୍ଯ୍ୟକ୍ରମ ରବିବାର ଶୁଭାରମ୍ଭ ହୋଇଛି। ଏଥିରେ ରାୟଗଡ଼ା ଜିଲାର ୧ଲକ୍ଷ ୧୭ହଜାର ୩୨୪ ଜଣ ଶିଶୁଙ୍କୁ ପୋଲିଓ ବୁନ୍ଦା ଦିଆଯିବା ପାଇଁ ଲକ୍ଷ୍ୟ ରହିଛି। ଏଥିପାଇଁ ଜିଲାରେ ୧୦୩୨ଟି ପୋଲିଓ ବୁଥ୍ କରାଯାଇଛି। ସେହିପରି ବସଷ୍ଟାଣ୍ଡ,ରେଲ୍ଓ୍ବେ ଷ୍ଟେଶନ ଆଦି ସ୍ଥାନରେ ବାହାରୁ ଆସୁଥିବା ଶିଶୁମାନଙ୍କୁ ମଧ୍ୟ ପୋଲିଓ ଦେବା ପାଇଁ ୩୪ ଟ୍ରାନ୍ଜିଟ୍ ଟିମ୍ ନିୟୋଜିତ କରାଯାଇଛି। ଏଥିପାଇଁ ୨୩ ମୋବାଇଲ ଟିମ୍ ଗଠନ କରାଯାଇଛି। ଶିଶୁଙ୍କୁ ପୋଲିଓ ବୁନ୍ଦା ଦେବାରେ ଆଶା, ଏଏନ୍ଏମ୍, ଜିଏନ୍ଏମ୍ ଆଦି ସ୍ବାସ୍ଥ୍ୟକର୍ମୀ ଓ ଅଙ୍ଗନଓ୍ବାଡି କର୍ମୀଙ୍କ ସମେତ ମୋଟ ୨୦୬୪ ଜଣ ନିୟୋଜିତ ହୋଇଛନ୍ତି। ଫେବୃଆରୀ ୨୯ ତାରିଖ ପର୍ଯ୍ୟନ୍ତ ଏହି କାର୍ଯ୍ୟକ୍ରମ ଚାଲିବ। ପ୍ରଥମ ଦିନରେ ବୁଥ୍ରେ ଶିଶୁଙ୍କୁ ପୋଲିଓ ବୁନ୍ଦା ଦିଆଯାଇଥିବାବେଳେ ସୋମବାର ଓ ମଙ୍ଗଳବାର ଘର ଘର ଯାଇ ପୋଲିଓ ବୁନ୍ଦା ଦେବେ ବୋଲି ସୂଚନା ମିଳିଛି। ଜିଲାପାଳ ସରୋଜ କୁମାର ମିଶ୍ର ଶିଶୁଙ୍କୁ ପୋଲିଓ ବୁନ୍ଦା ଖୁଆଇ ଜିଲାସ୍ତରୀୟ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ସିଡିଏମ୍ଓଙ୍କ ସମେତ ସ୍ବାସ୍ଥ୍ୟ ବିଭାଗର ଅନ୍ୟ ଅଧିକାରୀ ଓ କର୍ମଚାରୀମାନେ ଉପସ୍ଥିତ ଥିଲେ। ରାୟଗଡ଼ା ଜିଲାରେ ପୋଲିଓ ରୋଗୀଙ୍କ ସଂଖ୍ୟା ଶୂନ ରହିଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।
