ସୁନ୍ଦରଗଡ଼, ୨୩।୯(ଡି.ଏନ୍.ଏ.): ସୁନ୍ଦରଗଡ଼ ଜିଲାରେ ଚିନ୍ତା ବଢାଇଛି ଡେଙ୍ଗୁ। ଜିଲାରେ ଗତ ୨୧ତାରିଖ ମଧ୍ୟରେ ମୋଟ ୧୧୪ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ଚିହ୍ନଟ ହୋଇଥିବା ଡେଙ୍ଗୁରୋଗୀଙ୍କ ମଧ୍ୟରୁ ସର୍ବାଧିକ ୯୯ଜଣ ହେଉଛନ୍ତି ରାଉରକେଲା ସହରାଞ୍ଚଳର ବୋଲି ସ୍ବାସ୍ଥ୍ୟ ବିଭାଗ ରିପୋର୍ଟରୁ ଜଣାପଡିଛି। ରାଉରକେଲା ଆଇଜିଏଚ୍ରେ ୯୩ଜଣ, ଆରଜିଏଚ୍ରେ ୧୨ଜଣ ଓ ରାଜ୍ୟର ଜଣେ ରୋଗୀ ଚିହ୍ନଟ ହୋଇଛନ୍ତି। ସେହିପରି ସୁନ୍ଦରଗଡ଼ ପୌରାଞ୍ଚଳରେ ୨ଜଣ, ବୀରକେରା, ବିଶ୍ରା, ଗୁରୁଣ୍ଡିଆ, ବଣାଇଁରେ ଜଣେ ଲେଖାଏଁ ଓ ମଝାପଡାରେ ୨ଜଣ ଡେଙ୍ଗୁରୋଗୀ ଚିହ୍ନଟ ହୋଇଛନ୍ତି। ତନ୍ମଧ୍ୟରୁ ପଡୋଶୀ କେଉଁଝର ଜିଲାର ୨ଜଣ ଓ ଝାଡଖଣ୍ଡ ରାଜ୍ୟର ଜଣେ ରୋଗୀ ଚିହ୍ନଟ ହୋଇ ଏଠାରେ ଚିକିତ୍ସିତ ହେଉଛନ୍ତି। ଡେଙ୍ଗୁର ମୁକାବିଲା ପାଇଁ ଜିଲା ସ୍ବାସ୍ଥ୍ୟ ବିଭାଗ ଓ ଆର୍ଏସ୍ପି ପକ୍ଷରୁ ମିଳିତ ଭାବେ ତ୍ୱରିତ ପଦକ୍ଷେପ ଆରମ୍ଭ ହୋଇଛି। ଜିଲା ମୁଖ୍ୟ ଚିକିତ୍ସାଧିକାରୀ ଡା. ସରୋଜ କୁମାର ମିଶ୍ରଙ୍କ ସୂଚନା ଅନୁଯାୟୀ ଗତ କିଛିଦିନ ଲଗାଣ ବର୍ଷା ଯୋଗୁ ରାଉରକେଲା ସହରରେ କିଛି ଅଞ୍ଚଳରେ ବର୍ଷାପାଣି ଜମି ରହି ଡେଙ୍ଗୁ ମଶା ବୃଦ୍ଧି ହୋଇ ବର୍ତ୍ତମାନ ଏଭଳି ସ୍ଥିତି ସୃଷ୍ଟି ହୋଇଛି। ଗତବର୍ଷ ୧୭୪୨ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଥିବା ବେଳେ ସେହି ତୁଳନାରେ କମ୍ ରହିଛି। ସୁନ୍ଦରଗଡ଼ ଜିଲା ଡେଙ୍ଗୁ ପାଇଁ ଏକ ସମ୍ବେଦନଶୀଳ ଜିଲା। ରାଜ୍ୟ ମଧ୍ୟରେ ଓ ରାଜ୍ୟ ବାହାରର ଡେଙ୍ଗୁ ପ୍ରବଣ ଅଞ୍ଚଳରୁ ଆସୁଥିବା ବ୍ୟକ୍ତିମାନଙ୍କ ଏଠାରେ ଥିବା ଶିଳ୍ପାଞ୍ଚଳ, ଜମିରହୁଥିବା ପାଣିରେ ଡେଙ୍ଗୁ ଭୂତାଣୁ ବଢାଉଛି। ୧୧୪ଜଣ ରୋଗୀଙ୍କ ମଧ୍ୟରୁ ୩ଜଣ କେଊଁଝର, ଝାଡଖଣ୍ଡ ରାଜ୍ୟର ହୋଇଥିବା ବେଳେ ଅନ୍ୟ ୩୭ଜଣ ରାଜ୍ୟର ଅନ୍ୟ ଡେଙ୍ଗୁ ପ୍ରଭାବିତ ଅଞ୍ଚଳରୁ ଆସିଥିବା ଜଣାଯାଇଛି। ରାଉରକେଲା ସହର ବାସନ୍ତୀ କଲୋନୀ, ସେକ୍ଟର ୧, ୧୩ ଓ ୧୭ ଅଞ୍ଚଳରେ ମଶାଧୁଆଁ ଦିଆଯିବା ଆରମ୍ଭ ହୋଇଥିବା ବେଳେ ୨୦ଜଣ ଡେଙ୍ଗୁ ସ୍ବେଚ୍ଛାସେବୀଙ୍କୁ ନିଯୁକ୍ତ କରାଯାଇ ସ୍ବଚ୍ଛତା ଅଭିଯାନ ଜାରିରହିଛି। ଆର୍ଜିଏଚ୍ରେ ସ୍ବତନ୍ତ୍ର ଡେଙ୍ଗୁ ଓ୍ବାର୍ଡ ରହିଥିବା ବେଳେ ସୁନ୍ଦରଗଡ ଜିଲା ମୁଖ୍ୟ ଡାକ୍ତରଖାନାରେ ଗୁରୁବାରଠାରୁ ଡେଙ୍ଗୁରୋଗୀଙ୍କ ପାଇଁ ୬ଶଯ୍ୟା ବିଶିଷ୍ଟ ସ୍ବତନ୍ତ୍ର ଓ୍ବାର୍ଡ ଖୋଲାଯାଇଛି। ହେଲେ ବର୍ତ୍ତମାନ ସ୍ଥିତି ନିୟନ୍ତ୍ରଣ ଥିବା ଜିଲା ମୁଖ୍ୟ ଚିକିତ୍ସାଧିକାରୀ ମିଶ୍ର ପ୍ରକାଶ କରିଛନ୍ତି।
