ଯାଜପୁର ଅଫିସ,୭ା୪: ସାରା ରାଜ୍ୟରେ ଏବେ ଦୁର୍ଘଟଣା ଜନିତ ଶୂନ୍ୟ ମୃତ୍ୟୁ ସପ୍ତାହ ପାଳନ ଅଭିଯାନ ଚାଲିଛି। ଏହାବାଦ୍ ଫେବୃୟାରୀ ପ୍ରଥମ ସପ୍ତାହରୁ ପ୍ରତି ମଙ୍ଗଳବାର ଟ୍ରାଫିକ ନିୟମ ଉଲ୍ଲଂଘନକାରୀଙ୍କ ବିରୋଧରେ ଜିରୋ ଟଲୋରେନ୍ସ ଡେ ଭାବେ ପାଳନ କରିବାକୁ ନିଷ୍ପତ୍ତି ହୋଇଛି। ହେଲେ ଚଳିତ ସପ୍ତାହରେ ଯାଜପୁର ଜିଲା ଦେଇ ଯାଇଥିବା ୧୬ନଂ. ଜାତୀୟ ରାଜପଥରେ ୩ଟି ପୃଥକ ଦୁର୍ଘଟଣାରେ ୨ଜଣଙ୍କ ମୃତ୍ୟୁ ହୋଇଥିବାବେଳେ ଫେବୃୟାରୀ ୨୫ ଦୁର୍ଘଟଣାରେ ୭ ଜଣଙ୍କ ଜୀବନ ଯାଇଛି। ଅନ୍ୟପକ୍ଷେ ଫେବୃୟାରୀ ପ୍ରଥମ ସପ୍ତାହରେ ୩ ଦୁର୍ଘଟଣାରେ ଜଣେ ପୂର୍ବତନ ବିଧାୟକଙ୍କ ସମେତ ୨ ଜଣଙ୍କ ମୃତ୍ୟୁ ହୋଇଥିଲା। ଅର୍ଥାତ ଜିଲାରେ ୨ ମାସରେ ୧୧ ଜଣଙ୍କ ମୃତ୍ୟୁ ହୋଇଛି। ରାଜ୍ୟ ସରକାରଙ୍କ ବାଣିଜ୍ୟ ଏବଂ ପରିବହନ ବିଭାଗ ପକ୍ଷରୁ ଏକାଧିକ ଯୋଜନା ପ୍ରଣୟନ ହେଉଥିଲେ ହେଁ ସମ୍ପୃକ୍ତ ବିଭାଗୀୟ ଅଧିକାରୀଙ୍କ କେବଳ ସରକାରୀ ଚାକିରି ନିଶା ଏବଂ ଆନ୍ତରିକତାର ଅଭାବ ଯୋଗୁ ଦୁର୍ଘଟଣା ମୃତ୍ୟୁ ହ୍ରାସ ଲକ୍ଷ୍ୟ ସାଧିତ ହୋଇ ପାରୁ ନ ଥିବା ମତପ୍ରକାଶ ପାଇଛି।
ସିଆଇଡି ଏବଂ କ୍ରାଇମବ୍ରାଞ୍ଚ ରିପୋର୍ଟ ଅନୁଯାୟୀ, ୨୦୨୨ ଜାନୁୟାରୀରୁ ନଭେମ୍ବର ମଧ୍ୟରେ ଯାଜପୁର ଜିଲାରେ ୫୨୮ଟି ଦୁର୍ଘଟଣା ଘଟିଛି। ଏଥିରେ ୨୦୦ ଲୋକଙ୍କ ଜୀବନ ଯାଇଥିବାବେଳେ ୩୧୫ ଜଣ ଆହତ ହୋଇଛନ୍ତି। ଅନ୍ୟପକ୍ଷେ ଫେବୃୟାରୀ ପ୍ରଥମ ସପ୍ତାହରେ ୩ ଦୁର୍ଘଟଣାରେ ଜଣେ ପୂର୍ବତନ ବିଧାୟକଙ୍କ ସମେତ ୨ ଜଣଙ୍କ ମୃତ୍ୟୁ ହୋଇଥିବାବେଳେ ୭ ଜଣ ଗୁରୁତର ହୋଇଛନ୍ତି। ସମ୍ପ୍ରତି ସମ୍ପ୍ରସାରଣ ଚାଲିଥିବା ଚଣ୍ଡିଖୋଲ-ଡୁବୁରୀ ୫୩ ନଂ. ଜାତୀୟ ରାଜପଥ ମରଣଯନ୍ତା ପାଲଟିଛି ା ଏହାବାଦ୍ ୧୬ ନଂ. ଜାତୀୟ ରାଜପଥରେ ବେଆଇନ ପାର୍କିଂ ଦୁର୍ଘଟଣାର ଅନ୍ୟତମ ପ୍ରମୁଖ କାରଣ ହୋଇଛି। ରାସ୍ତା କଡରେ ପଡି ରହିଥିବା ଦୁର୍ଘଟଣାଗ୍ରସ୍ତ ଗାଡିଗୁଡିକୁ ତୁରନ୍ତ ହଟାଇବା ଏବଂ ବେଆଇନ ପାର୍କିଂ ଗାଡିରୁ ଜରିମାନା ଆଦାୟ କରିବାକୁ ନିକଟରେ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ନିର୍ଦ୍ଦେଶ ହୋଇଛି। ଗତ ୨୫ା୨ା୨୦୨୩ରେ ୧୬ନଂ. ଜାତୀୟ ରାଜପଥର ଯାଜପୁର ଜିଲା ନେଉଳପୁର ନିକଟରେ ଛିଡା ହୋଇଥିବା ଏକ ଦୁର୍ଘଟଣାଗ୍ରସ୍ତ ଟ୍ରକକୁ ପଶ୍ଚିମବଙ୍ଗରୁ କଟକ ଅଭିମୁଖେ ଯାଉଥିବା ଏକ ଆଇଚର ଗାଡ଼ି ଧକ୍କା ଦେବାରୁ ୭ ଜଣଙ୍କ ମୃତ୍ୟୁ ହୋଇଥିଲା। ଏହି ଦୁର୍ଘଟଣା ସଂକ୍ରାନ୍ତରେ ଷ୍ଟେଟ ଟ୍ରାନ୍ସପୋର୍ଟ ଅଥରିଟି(ଏସଟିଏ) ପକ୍ଷରୁ ତଦନ୍ତ କରାଯାଇଥିଲା। ତଦନ୍ତରେ ଜଣାପଡିଛି ଯେ, ଗତ ୨୨ା୨ା୨୦୨୩ରେ ସେହି ଟ୍ରକ (ନଂ. ଓଡି ୦୪ ୨୭୯୧) ଦୁର୍ଘଟଣାଗ୍ରସ୍ତ ହୋଇ ସେଠାରେ ବିନା କୌଣସି ସୂଚନାରେ ପଡି ରହିଥିଲା। ଯଦି ଉକ୍ତ ଦୁର୍ଘଟଣାଗ୍ରସ୍ତ ଟ୍ରକଟିକୁ ତୁରନ୍ତ ସେଠାରୁ ହଟାଯାଇଥାନ୍ତା ତେବେ ଆଇଚର ଗାଡି ଦୁର୍ଘଟଣା ନ ହୋଇ ୭ ଜଣଙ୍କ ଜୀବନ ବଞ୍ଚି ପାରିଥାନ୍ତା। ତେଣୁ ତୁରନ୍ତ ଦୁର୍ଘଟଣାଗ୍ରସ୍ତ ଗାଡିଗୁଡିକୁ ହଟାଇବାକୁ ପରିବହନ ବିଭାଗ ପକ୍ଷରୁ ଗୁରୁତ୍ୱାରୋପ କରାଯାଇଥିଲା। ଯାଜପୁର ଜିଲାର ୧୬ନଂ., ୫୩ନଂ. ଏବଂ ୨୦ନଂ. ଜାତୀୟ ରାଜପଥ କଡରେ ରାତି ଏବଂ ଦିନରେ ଶତାଧିକ ଗାଡି ରାସ୍ତାକଡରେ ପାର୍କିଂ ହେଉଥିବା ଦେଖିବାକୁ ମିଳିଥାଏ। ଏପରି କି କଳିଙ୍ଗନଗର ଶିଳ୍ପାଞ୍ଚଳର ଯାଜପୁର ରୋଡଠାରୁ ଡୁବୁରୀ ପର୍ଯ୍ୟନ୍ତ ପରିବହନ ଗାଡିଗୁଡିକ ରାସ୍ତା କଡ଼ରେ ଠିଆ ହୋଇଥାଏ। ଜିଲା ପରିବହନ ବିଭାଗ ଏବଂ ପୋଲିସ ପ୍ରାୟ ପାଟ୍ରୋଲିଂ କରୁଥିଲେ ହେଁ ଏହି ବେଆଇନ ପାର୍କିଂ ଉପରେ ନଜର ପଡି ନ ଥାଏ। ଫଳରେ ଜିଲାରେ ଦୁର୍ଘଟଣା କମିବା ପରିବର୍ତ୍ତେ ବୃଦ୍ଧି ପାଉଥିବା ମତପ୍ରକାଶ ପାଇଛି। ଏହି କ୍ରମରେ ଧର୍ମଶାଳା ବ୍ଲକ ଭାଲୁଖାଇ ନିକଟରେ ମଙ୍ଗଳବାର ଭୋର ସମୟରେ ଦୁଇ ଟ୍ରକ ମଧ୍ୟରେ ଏକ ଦୁର୍ଘଟଣା ଘଟିଥିଲା । ଦୁର୍ଘଟଣାଟି ଏତେ ଜୋର ଥିଲା ଯେ ଟ୍ରକ ସହ ଡ୍ରାଇଭର ମଧ୍ୟ ଘଟଣା ସ୍ଥଳରେ ଜଳି ଯାଇଥିଲେ । ଅନ୍ୟ ଟ୍ରକ ଡ୍ରାଇଭର ଚକା ତଳେ ଚାପି ହୋଇ ବଞ୍ଚିବା ପାଇଁ ଚିତ୍କାର କରୁଥିଲେ ବି କେହି ବଞ୍ଚାଇ ପାରି ନ ଥିଲେ। ସେହିପରି ଜାରକା ବଜାରଠାରେ ବୁଧବାର ରାତି ୯ଟା ସମୟରେ ଆଉ ଏକ ଦୁର୍ଘଟଣା ଦେଖିବାକୁ ମିଳିଥିଲା। ଘଟଣା କ୍ରମେ ପୂର୍ବରୁ ଛିଡା ହୋଇଥିବା ଏକ ଟ୍ରକ ପଛରେ ଗୋଟିଏ ମାଲବାହୀ ଟ୍ରକ ଧକ୍କା ଦେଇଥିଲା। ଘଟଣା ସ୍ଥଳରେ ପୋଲିସ ପହଞ୍ଚି ଡ୍ରାଇଭରଙ୍କୁ ଗୁରୁତର ଅବସ୍ଥାରେ କଟକ ବଡ ମେଡିକାଲକୁ ସ୍ଥାନାନ୍ତର କରିଥିଲା। ଏହାର କିଛି ସମୟ ପରେ ଜାରକା ରିଲିଆନ୍ସ ପେଟ୍ରୋଲ ପମ୍ପ ଆର ପଟରେ ଆଉ ଏକ ଦୁର୍ଘଟଣା ଦେଖିବାକୁ ମିଳିଥିଲା। କେବଳ ବେଆଇନ ପାର୍କିଂ, ବ୍ରେକ ଡାଉନ ହେଉଥିବା ଗାଡି ଗୁଡିକ ଅସୁରକ୍ଷିତ ଅବସ୍ଥାରେ ଛିଡା କରିବା, ଭୁଲ ରାସ୍ତାରେ ଗାଡି ଚାଳନା, କ୍ଷୀପ୍ର ଗତି ଆଦି ଏହାର କାରଣ ବୋଲି ମତପ୍ରକାଶ ପାଇଛି।
