ବେଜିଂ,୨୧।୩ : ବିଶ୍ୱବ୍ୟାପୀ ନିଜର ଉପସ୍ଥିତି ଜାହିର କରିବା ପାଇଁ ଚାଇନା ଏକ ନୂତନ ରଣନୀତି ଆପଣେଇଛି। ସେପ୍ଟେମ୍ବର ୨୦୨୨ ରେ, ସ୍ପେନର ନାଗରିକ ଅଧିକାର ଗୋଷ୍ଠୀର ଏକ ରିପୋର୍ଟରୁ ଜଣାପଡିଛି ଯେ ଚାଇନ ବିଭିନ୍ନ ଦେଶରେ ଚାଇନିଜ ଓଭରସିଜ ପୋଲିସ ଷ୍ଟେଶନ (ସିଓପିଏସ) ପ୍ରତିଷ୍ଠା କରିଛି। ଏକ ଗୁପ୍ତ ରିପୋର୍ଟରୁ ଜଣାପଡିଛି ଯେ ଏପର୍ଯ୍ୟନ୍ତ ଚାଇନା ୫୩ ଟି ଦେଶରେ ୧୦୨ଟି ପୋଲିସ ଷ୍ଟେଶନ ଖୋଲିଛି।
ଏକ ରିପୋର୍ଟ ଅନୁଯାୟୀ, ୨୦୧୬ ରେ ଚାଇନ ଭିତ୍ତିକ ଜନ ସୁରକ୍ଷା ବ୍ୟୁରୋ (ପିଏସବି) ଦ୍ୱାରା ସିଓପିଏସର ନେଟୱାର୍କ ପ୍ରତିଷ୍ଠା କରାଯାଇଛି। ବିଭିନ୍ନ ଦେଶରେ ଅବସ୍ଥିତ ଏହି ପୋଲିସ ଷ୍ଟେସନର କାର୍ଯ୍ୟ ହେଉଛି ଚାଇନା ବିରୋଧରେ ସ୍ବର ଉତ୍ତୋଳନ କରୁଥିବା ଲୋକଙ୍କ ଉପରେ ନଜର ରଖିବା। ଏହା ବ୍ୟତୀତ ଚାଇନାରୁ ଅନ୍ୟ ଦେଶକୁ ପଳାୟନ କରିଥିବା ନାଗରିକମାନଙ୍କୁ ଦେଶକୁ ପଠାଇବା ଲାଗି ଚାପ ପ୍ରୟୋଗ ଏସବୁ ଷ୍ଟେଶନ ଦ୍ୱାରା କରାଯାଇଥାଏ। ରାଜନୈତିକ ବିରୋଧୀଙ୍କୁ ଦୁର୍ବଳ କରିବା ଏବଂ ତିବ୍ବତୀୟ, ଉଇଗୁରୁ ସମସ୍ୟା ତଥା ଚାଇନା ବିରୋଧୀ ସ୍ବର ଭଳି କାର୍ଯ୍ୟ ଉପରେ ଏହା ମାଧ୍ୟମରେ ନଜର ରଖା ଯାଇଥାଏ। ରିପୋର୍ଟ ଅନୁଯାୟୀ, ସିଓପିଏସ ଚାଇନାର ପୂର୍ବତନ ପୋଲିସ ଅଧିକାରୀ ଏବଂ ପୁରୁଣା ଦୂତାବାସର ଅଧିକାରୀଙ୍କୁ ନେଇ ଗଠିତ। ସେମାନେ ଚାଇନାର ଦୂତାବାସଠାରୁ ଅଲଗା କାମ କରନ୍ତି। ସେମାନଙ୍କର କୌଣସି କାର୍ଯ୍ୟାଳୟ ନାହିଁ। ରିପୋର୍ଟ ଅନୁଯାୟୀ, ସେମାନେ ସ୍ଥାନୀୟ ଦୋକାନ, ରେଷ୍ଟୁରାଣ୍ଟ, ମଲ କିମ୍ବା ଆପାର୍ଟମେଣ୍ଟ ସହିତ ଅନୌପଚାରିକ ସ୍ଥାନ ମାଧ୍ୟମରେ କାର୍ଯ୍ୟ କରନ୍ତି। ଚାଇନା ଏହାକୁ ସେବା ଷ୍ଟେଶନ ଏବଂ ସମ୍ପର୍କ ପୋଷ୍ଟ ନାମରେ ନାମିତ କରିଛି। ଏସବୁ ବିଦେଶରେ ଚାଇନାର ସମ୍ପ୍ରଦାୟର ଜଣେ ନେତାଙ୍କ ଦ୍ୱାରା ପରିଚାଳିତ, ଯେଉଁମାନେ ଚାଇନା କମ୍ୟୁନିଷ୍ଟ ପାର୍ଟି ପ୍ରତି ବିଶ୍ୱସ୍ତ ଅଟନ୍ତି।
ଖବର ଅନୁଯାୟୀ, ଦକ୍ଷିଣ ଆମେରିକା, ମ୍ୟାନମାର, କାମ୍ବୋଡିଆ, ଦକ୍ଷିଣ ଆଫ୍ରିକା, ତାଞ୍ଜାନିଆ, ମୋଜାମ୍ବିକ, ଜାମ୍ବିଆ, ସର୍ବିଆ, କ୍ରୋଏସିଆ, ରୋମାନିଆ ଏବଂ ଇଟାଲୀ ଭଳି ଅନେକ ଦେଶରେ ଚାଇନ ନିଜର ପୋଲିସ ଷ୍ଟେଶନ ପ୍ରତିଷ୍ଠା କରିଛି। ଆମେରିକା କଂଗ୍ରେସ କାର୍ଯ୍ୟନିର୍ବାହୀ ଆୟୋଗ ଅଭିଯୋଗ କରିଛନ୍ତି ଯେ ଏସବୁ ମାଧ୍ୟମରେ ବିଭିନ୍ନ ଦେଶରେ ଚାଇନା ଗୁପ୍ତଚର କାର୍ଯ୍ୟ କରୁଛି। ଏହି ସବୁ ଦେଶର ସୁରକ୍ଷା ପାଇଁ ବିପଜ୍ଜନକ ଅଟେ।
କୁହାଯାଉଛି ଯେ ଆମେରିକା, କାନାଡା, ୟୁରୋପ, ଜାପାନ ଏବଂ ଦକ୍ଷିଣ କୋରିଆ ଭଳି ଦେଶରେ ଚାଇନା ମଧ୍ୟ ଏଭଳି ଷ୍ଟେଶନ ସ୍ଥାପନ କରିଥିଲା ପରେ, ଯେତେବେଳେ ସରକାର ଏହାକୁ ବିରୋଧ କରିଥିଲେ, ଚାଇନାକୁ ଏସବୁକୁ ବନ୍ଦ କରିବାକୁ ପଡିଥିଲା। ତେବେ ବ୍ରାଜିଲ, ଆର୍ଜେଣ୍ଟିନା, ଇକ୍ୟୁଏଡର୍, ହଙ୍ଗେରୀ ଏବଂ ନାଇଜେରିଆ ଭଳି କେତେକ ବିକାଶଶୀଳ ଦେଶ ଏପର୍ଯ୍ୟନ୍ତ ଏହି ପ୍ରସଙ୍ଗରେ ନୀରବ ରହିବାକୁ ପସନ୍ଦ କରୁଛନ୍ତି।
