ଲକ୍ଷ୍ନୌ,୨୨।୯: ଉତ୍ତରପ୍ରଦେଶର ଆଜମଗଡ଼ ଜିଲାରେ ନିର୍ମାଣ ହୋଇଥିବା ହାଇଟେକ୍ ଜେଲରେ କୋର୍ଟଙ୍କ ନିର୍ଦ୍ଦେଶରେ କଏଦୀମାନଙ୍କର ଏଚ୍ଆଇଭି ପରୀକ୍ଷା କରାଯାଇଛି। ଜେଲରେ କେତେଜଣ କଏଦୀ ଏଚ୍ଆଇଭି ସଂକ୍ରମିତ ଅଛନ୍ତି ସେନେଇ ଜାଣିବା ପାଇଁ ଏହି ପରୀକ୍ଷା କରାଯାଇଥିଲା। ତେବେ ସଦ୍ୟ ରିପୋର୍ଟ ଅନୁଯାୟୀ ଜେଲରେ ୧୦ଜଣ କଏଦୀଙ୍କ ରିପୋର୍ଟ ପଜିଟିଭ୍ ଆସିଛି। ଅନ୍ୟପଟେ ଅନେକ କଏଦୀ ଏହି ପରୀକ୍ଷା କରାଇବାରୁ ନିଜକୁ ଦୂରେଇ ରଖୁଥିବା ଜଣାପଡ଼ିଛି। ସୂଚନାଯୋଗ୍ୟ, ଜେଲ୍ରେ ମୋଟ ୨୫୦୦ ମହିଳା ଓ ପୁରୁଷ ବନ୍ଦୀ ଅଛନ୍ତି। ଏପର୍ଯ୍ୟନ୍ତ ୧,୩୨୨ଜଣ କଏଦୀଙ୍କ ପରୀକ୍ଷା କରାଯାଇଥିବା ବେଳେ ୧୦ଜଣ ପଜିଟିଭ୍ ଚିହ୍ନଟ ହୋଇଛନ୍ତି। ତେବେ ଏଥିରେ କୌଣସି ମହିଳା ନ ଥିବା ଜଣାପଡ଼ିଛି। ସଂକ୍ରମିତ କଏଦୀଙ୍କୁ ସବୁ କଏଦୀଙ୍କ ସହିତ ରଖାଯାଇଛି। ବର୍ତ୍ତମାନ ସେମାନଙ୍କୁ ଔଷଧ ଦିଆଯାଉଥିବା ବେଳେ ଯଦି କାହାର ସ୍ବାସ୍ଥ୍ୟବସ୍ଥା ସମସ୍ୟା ଦେଖାଯାଏ ତେବେ ସେମାନଙ୍କର ଚିକିତ୍ସା ଆରମ୍ଭ କରାଯିବ ବୋଲି ସିଏମ୍ଓ ପକ୍ଷରୁ କୁହାଯାଇଛି। ଅନ୍ୟପଟେ ଏମାନେ କିଭଳି ସଂକ୍ରମିତ ହେଲେ ସେନେଇ ଯାଞ୍ଚ କରାଯାଉଛି।
