ବେତନଟୀ, ୨୧।୯ (ସ୍ବ.ପ୍ର.): ହାତୀପ୍ରବଣ ଅଞ୍ଚଳରେ କାମ କରିବେ ଗଜସାଥୀ। ଏଥିପାଇଁ ମୟୂରଭଞ୍ଜ ଜିଲା ବେତନଟୀ ରେଞ୍ଜ କାର୍ଯ୍ୟାଳୟରେ ଗଜସାଥୀମାନଙ୍କୁ ବୁଧବାର ତାଲିମ ପ୍ରଦାନ କରାଯାଇଛି। ରେଞ୍ଜର ଘନଶ୍ୟାମ ସିଂଙ୍କ ସଂଯୋଜନାରେ ଆୟୋଜିତ ଶିବିରରେ ସହକାରୀ ବନ ସଂରକ୍ଷକ ରବିନାରାୟଣ ମହାନ୍ତି ପ୍ରଶିକ୍ଷଣ ଦେଇଛନ୍ତି।
ସୂଚନା ଅନୁଯାୟୀ, ରେଞ୍ଜ ଅଧୀନରେ ୧୯ଟି ବନ ସୁରକ୍ଷା ସମିତି କାର୍ଯ୍ୟ କରୁଛି। ଯେଉଁ ଅଞ୍ଚଳଗୁଡ଼ିକ ହାତୀପ୍ରବଣ ସେହି ବନ ସୁରକ୍ଷା ସମିତି ଅଧୀନ ବିଭିନ୍ନ ଗାଁକୁ ନେଇ ଗୋଟିଏ କ୍ଲଷ୍ଟର ଗଠନ ସହ ପ୍ରତ୍ୟେକ କ୍ଲଷ୍ଟରରୁ ୫ଜଣ ଲେଖାଏ ଗଜସାଥୀଙ୍କୁ ଚୟନ କରାଯାଇଛି। ରେଞ୍ଜରେ ମୋଟ ୩୫ କ୍ଲଷ୍ଟର ଗଠନ କରାଯାଇଥିବା ବେଳେ ପ୍ରାଥମିକ ପର୍ଯ୍ୟାୟରେ ୧୭୫ଜଣ ଗଜସାଥୀ ମନୋନୀତ ହୋଇଛନ୍ତି। ରେଞ୍ଜ ଅଧୀନ ବେତନଟୀ, କୃଷ୍ଣଚନ୍ଦ୍ରପୁର, ବଡାମପୁର ଆଦି ପ୍ରତ୍ୟେକ ସେକ୍ସନ ପାଇଁ ୧୦ଟି ଲେଖାଏ କ୍ଲଷ୍ଟର ଗଠନ କରାଯାଇଥିବା ବେଳେ ବୈଶିଙ୍ଗା ସେକ୍ସନ ଲାଗି ୫ଟି ଗଠିତ ହୋଇଛି। ପ୍ରତି କ୍ଲଷ୍ଟରରୁ ଚୟନ ହୋଇଥିବା ଗଜସାଥୀମାନେ ଅବୈତନିକ ଏବଂ ସ୍ବେଚ୍ଛାସେବୀ ଭାବେ ବନ ବିଭାଗ ତତ୍ତ୍ୱାବଧାନରେ କାମ କରିବେ। ସେମାନଙ୍କୁ ବନ ବିଭାଗ ପକ୍ଷରୁ ହାତୀ ଘଉଡ଼ାଇବା ପାଇଁ ଆବଶ୍ୟକ ଟର୍ଚ୍ଚଲାଇଟ, ୟୁନିଫର୍ମ ସହ ଅନ୍ୟାନ୍ୟ ସରଞ୍ଜାମ ଯୋଗାଇ ଦିଆଯିବ। ସେମାନେ ମୁଖ୍ୟତଃ ଜନସାଧାରଣଙ୍କୁ ହାତୀମାନଙ୍କ ଚଳପ୍ରଚଳ ଉପରେ ସଚେତନ କରାଇବା ସହ ଗାଁକୁ ହାତୀ ପଶି ଆସିଲେ କ’ଣ ପଦକ୍ଷେପ ଗ୍ରହଣ କରିବାକୁ ହେବ ଏବଂ କିଭଳି ଗ୍ରାମବାସୀ ବଣୁଆ ହାତୀ ନିକଟତର ହେବେ ନାହିଁ ସେନେଇ କାମ କରିବେ। ପ୍ରଥମ ପର୍ଯ୍ୟାୟରେ କୃଷ୍ଣଚନ୍ଦ୍ରପୁର ସେକ୍ସନର ୧୦ କ୍ଲଷ୍ଟର ଏବଂ ବେତନଟୀ ସେକ୍ସନର ୮ ମୋଟ ୧୮ କ୍ଲଷ୍ଟରର ୯୦ ଗଜସାଥୀଙ୍କୁ ଏକଦିବସୀୟ ତାଲିମ ଦିଆଯାଇଛି। ବନପାଳ ପ୍ରଶାନ୍ତ ସିଂ ସାମନ୍ତ, ଅଭିନନ୍ଦନ ସାହୁଙ୍କ ସମେତ ଅନ୍ୟ କର୍ମଚାରୀମାନେ ଏଥିରେ ସାମିଲ ଥିଲେ।
