ଗୁଣପୁର,୩ା୨(ଡି.ଏନ୍.ଏ.) ବହୁ ଦାବି ପରେ ୨୦୧୭-୧୮ ସାଧାରଣ ବଜେଟରେ ଗୁଣପୁର-ଥେରୁବାଲି ରେଳପଥ ସ୍ଥାନ ପାଇଥିଲା। ଦୀର୍ଘ ୪୭ ବର୍ଷ ପରେ ଏହି ଦାବି ପୂରଣ ହୋଇଥିବାରୁୁ ଗୁଣପୁର ଅଞ୍ଚଳରେ ଖୁସିର ଲହରି ଖେଳିଯାଇଥିଲା। କିନ୍ତୁ ମଙ୍ଗଳବାର ଉପସ୍ଥାପିତ ରେଳ ବଜେଟରେ ନୌପଡ଼ା-ଗୁଣପୁର-ଥେରୁବାଲି ରେଳପଥର ସମ୍ପ୍ରସାରଣ ପାଇଁ ମାତ୍ର ୧୦ କୋଟି ଟଙ୍କା ମଞ୍ଜୁର କରାଯାଇଛି। ଏହାକୁ ନେଇ ଗୁଣପୁର ସମେତ ସମଗ୍ର ରାୟଗଡ଼ା ଜିଲାରେ ତିବ୍ର ପ୍ରତିକ୍ରିୟା ପ୍ରକାଶ ପାଇଛି।
ଓଡ଼ିଶାରୁ ଅଶ୍ୱିନି ବୈଷ୍ଣବ ରେଳମନ୍ତ୍ରୀ ହେବା ପରେ ଲୋକଙ୍କ ମଧ୍ୟରେ ଏହି ରେଳପଥକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅନେକ ଆଶା ସଞ୍ଚାର ହୋଇଥିଲା। ମନ୍ତ୍ରୀଙ୍କ ରାୟଗଡ଼ା ଗସ୍ତ ସମୟରେ ରେଳ ବିକାଶ ମଞ୍ଚ ପକ୍ଷରୁ ସାଇକେଲ ଯାତ୍ରା କରି ସ୍ମାରକ ପତ୍ର ଦେଇଥିଲେ। ଏପରିକି ମନ୍ତ୍ରୀ ରେଳରେ ଯାତ୍ରା କରବା ସମୟରେ ଗୁଣପୁରଠାରୁ ଥେରୁବାଲିକୁ ରେଳ ସଂଯୋଗ ନେଇ କାର୍ଯ୍ୟ ତ୍ବରାନ୍ବିତ କରିବାକୁ ମଧ୍ୟ ଅଞ୍ଚଳବାସୀ ଅନୁରୋଧ କରିଥିଲେ। ତଥାପି ରେଳ ବଜେଟରେ ୧୦ କୋଟି ଟଙ୍କା ଅନୁଦାନ ପ୍ରଦାନ ଘୋଷଣା ହେବା ପରେ ଅଞ୍ଚଳବାସୀ ପୁଣି ନିରାଶ ହୋଇଛନ୍ତି। ଏହି ପ୍ରକଳ୍ପ ଏବେ ପୁଣି ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି।
ଗୁଣପୁର-ଥେରୁବାଲି ଦୀର୍ଘ ୭୯.୧୫ କି.ମି. ରେଳପଥ ପାଇଁ ସବୁଜ ସଙ୍କେତ ମିଳିବା ସହ ଏହାର ନିର୍ମାଣ ପାଇଁ ୯୩୫.୭୨ କୋଟି ବ୍ୟୟ ଅଟକଳ ରଖାଯାଇଥିଲା। ପରବର୍ତ୍ତି ମୂହୁର୍ତ୍ତରେ ରେଳପଥର ବ୍ୟୟ ଅଟକଳ ବୃଦ୍ଧି ପାଇଥିଲା। ଡିପିଆର୍(ଡିଟେଲ ପ୍ରୋଜେକ୍ଟ ରିପୋର୍ଟ) ପରେ ଏହାର ଖର୍ଚ୍ଚ ବଢ଼ି ୧୩୯୮ କୋଟି ଟଙ୍କାରେ ପହଞ୍ଚିଛି। ହେଲେ ରେଳ ବିଭାଗ ଏହି ରେଳପଥ ଲାଭ ଦାୟକ ନୁହେଁ ବୋଲି କହିବା ସହ ରାଜ୍ୟ ସରକାରଙ୍କୁ ମଗଣା ଜମି ଏବଂ ୫୦ ପ୍ରତିଶତ ଅର୍ଥ ବିନିଯୋଗ କରିବାକୁ କହିଥିଲେ। ରାଜ୍ୟ ସରକାର ମଗାଣା ଜମି ଦେବାକୁ ସମ୍ମତି ଜଣାଇଥିଲେ ମଧ୍ୟ ପ୍ରକଳ୍ପର ଅଧା ଖର୍ଚ୍ଚ ନେଇ ବର୍ତ୍ତମାନ ସୁଧା ନିରବ ରହିଛନ୍ତି। ଏହି ରେଳପଥ ପାଇଁ ପ୍ରଥମ ପର୍ଯ୍ୟାୟରେ ୧କୋଟି ଟଙ୍କା ମଞ୍ଜୁର ହୋଇଥିଲା। ଗୁଣପୁର-ଥେରୁବାଲି ରେଳପଥ ପାଇଁ ଅଗଷ୍ଟ ୨୦୧୬ରେ ସର୍ଭେ ହୋଇ ୨୩୨.୩୭ କୋଟି ଟଙ୍କା ବ୍ୟୟ ଅଟକଳ ରଖାଯାଇଥିଲା। ଦୀର୍ଘ ୧୧ ବର୍ଷ କାଳ ପ୍ରକଳ୍ପ ନାଲି ଫିତା ତଳେ ପଡ଼ିରହିବା ଯୋଗୁ ଏହାର ଅଟକଳ ମୂଲ୍ୟ ବୃଦ୍ଧି ପାଇଥିଲା। ପ୍ରକଳ୍ପ କାର୍ଯ୍ୟ ୬ ବର୍ଷ ତଥା ୨୦୨୩ ସୁଦ୍ଧା ସରିବା ଲକ୍ଷ୍ୟ ରଖାଯାଇଥିଲା। ଶତାୟୁ ଏହି ରେଳପଥର ବିକାଶ ଦିଗରେ ତ୍ବରିତ ପଦକ୍ଷେପ ନେବାକୁ ଦାବି ଜଣାଇବା ସହ ରାଜ୍ୟ ସରକର ପ୍ରକଳ୍ପର ଅଧା ଖର୍ଚ୍ଚ ବହନ ନେଇ ମୁହଁ ଖୋଲନ୍ତୁ ବୋଲି ଗୁଣପୁରର ସାମାଜିକ କର୍ମୀ ଅକ୍ଷୟ ଦାସ ନିବେଦନ କରିଛନ୍ତି।
