ସୋର, ୧୧।୯(ଡି.ଏନ.ଏ.)-ଭୋକ ପାଇଁ ଡହଳବିକଳ ହେଉଛନ୍ତି ୧୦ଜଣ ଦୃଷ୍ଟିହୀନ ଯୁବତୀଯୁବକ। କୋଭିଡ୍ କଟକଣା ଯୋଗୁ ସେମାନେ ନାହଁି ନ ଥିବା ସମସ୍ୟାରେ ଘାଣ୍ଟି ହେଉଛନ୍ତି। ଓଡ଼ିଶାର ବିଭିନ୍ନ ସ୍ଥାନରୁ ୧୦ରୁ ଅଧିକ ଦୃଷ୍ଟିହୀନ ଯୁବତୀଯୁବକ ସୋର ମ୍ୟୁନିସିପାଲିଟିର ଇଟୁଆ ଗ୍ରାମରେ ଏକ ଭଡ଼ାଘରେ ରହିଆସୁଛନ୍ତି। ବିଭିନ୍ନ ଛକ, ସାଂସ୍କୃତିକ ଅନୁଷ୍ଠାନ ଓ ପୂଜା ପର୍ବରେ ମେଲୋଡ଼ି କରି ପେଟ ପୋଷିଥାନ୍ତି। ସେମାନେ ଓଁକାର ଭଜନ ଅମୃତ ସମର୍ପଣ ଦୃଷ୍ଟିହୀନ ନାମରେ ଏକ ମେଲୋଡ଼ି ଅନୁଷ୍ଠାନ କରିଛନ୍ତି। ଏହାର ଦାୟିତ୍ୱ ନେଇଛନ୍ତି ସୋର ବ୍ଲକ ମାଣିପୁର ପଞ୍ଚାୟତ ଛତରା ଗ୍ରାମର ଦୃଷ୍ଟିହୀନ ଯୁବକ ସଞ୍ଜୟ ଶଙ୍ଖୁଆ। ସେ ୯୦ଭାଗ ଦୃଷ୍ଟିହୀନ ହୋଇଥିବା ବେଳେ ତାଙ୍କୁ ହଁି ସାହାରା କରିଛନ୍ତି ଓଡ଼ିଶାର ବିଭିନ୍ନ ସ୍ଥାନରୁ ଆସି ରହିଥିବା ଦୃଷ୍ଟିହୀନମାନେ। କୋଭିଡ କଟକଣା ଯୋଗୁ ସେ ମେଲୋଡ଼ି କାର୍ଯ୍ୟକ୍ରମ କରିପାରୁନାହାନ୍ତି। ଫଳରେ ଅଧିକାଂଶ ସମୟ ସେମାନଙ୍କ ଓପାସରେ ଦିନ କାଟୁଛନ୍ତି। କାଁ ଭାଁ ବଦାନ୍ୟ ବ୍ୟକ୍ତିଙ୍କ ସହଯୋଗରେ ପରସ୍ପର ରୋଷେଇ କରି ଖାଇଥାନ୍ତି। ଭଡ଼ାରେ ବାଦ୍ୟଯନ୍ତ୍ର ଆଣି ମେଲୋଡ଼ି ଭଜନ କାର୍ଯ୍ୟକ୍ରମ କରିଥାନ୍ତି। କୋଭିଡ୍ ପରିସ୍ଥିତି ସମୟରେ ସେମାନଙ୍କୁ କୌଣସି ସରକାରୀ ସାହାଯ୍ୟ ମିଳିନାହଁି। ଅନେକ ଭିନ୍ନକ୍ଷମ ଭତ୍ତା ଓ ହ୍ବାଇଟ୍ ଷ୍ଟିକ୍ (ଆଶାବାଡ଼ି) ପାଇପାରି ନାହାନ୍ତି। ସଞ୍ଜୟ ଏଭଳି ପରିସ୍ଥିତିରେ ଜଣେ ଶିକ୍ଷିତ ଦୃଷ୍ଟିହୀନ ଯୁବତୀ ଭବାନୀପାଟଣା ଅଞ୍ଚଳର କରିସ୍ମା ନାୟକଙ୍କୁ ବିବାହ କରିଛନ୍ତି। ଅନ୍ୟମାନଙ୍କ ମଧ୍ୟରେ ବଲାଙ୍ଗୀରରୁ ଭୀମ ମହାନନ୍ଦ, ବାଲିଆପାଳରୁ ନରେନ୍ଦ୍ର ଗିରି, ତପନ ମାହାନ୍ନା, ଗୋପାଳପୁରରୁ ସୁରେନ୍ଦ୍ର ବେହେରା, କୁଜଙ୍ଗରୁ ପ୍ରଦୀପ ସ୍ବାଇଁ, ରୂପ୍ସାରୁ ମନୋଜ ଜେନା, ଔପଦାରୁ ପ୍ରଶାନ୍ତ ନାୟକ, ବାଙ୍ଗିରିପୋଷିରୁ ଚନ୍ଦ୍ରମୋହନ ଟୁଡୁ, ଖୋର୍ଦ୍ଧାରୁ ସୁନୀଲ ସେନାପତି ପେଟ ପାଇଁ ଏଠି ପଡ଼ିରହିଛନ୍ତି। ତେବେ ଏମାନଙ୍କୁ ସରକାରୀ ସାହାଯ୍ୟ ଯୋଗାଇବା ସହିତ ସମସ୍ତଙ୍କୁ ବାଦ୍ୟଯନ୍ତ୍ର ଯୋଗାଇବାକୁ ସାଧାରଣରେ ଦାବି ହୋଇଛି।
