ନ୍ୟୁୟର୍କ,୨ା୪ : ଆମେରିକାରେ ଭୟଙ୍କର ସ୍ଥିତି ସୃଷ୍ଟିକରିଛି କରୋନା ଭାଇରସ୍। ଗୋଟାଏ ପରେ ଗୋଟାଏ ମୁଣ୍ଡ ଗଡ଼ିଚାଲିଛି। ବୁଧବାର ସୁଦ୍ଧା ୪,୦୫୫ ଜୀବନ ନେଲାଣି ଏହି ପ୍ରାଣଘାତୀ ଭୂତାଣୁ। ଏଥିସହ ସଂକ୍ରମିତଙ୍କ ସଂଖ୍ୟା ବଢ଼ି ୧,୮୮,୫୭୮ରେ ପହଞ୍ଚିଛି। ଆଗକୁ କେତେଯେ ମୁଣ୍ଡ ନେବ ଏହି ମହାମାରୀ କହିବା ମୁସ୍କିଲ। ୯/୧୧ ଆତଙ୍କବାଦୀ ବିସ୍ଫୋରଣରେ ଆମେରିକାରେ ୨,୯୭୭ ଜୀବନ ଯାଇଥିଲା। ସେତେବେଳେ ରକ୍ତମୁଖା ହୋଇପଡ଼ିଥିଲା ଏହି ବିତ୍ତଶାଳୀ ଦେଶ। ଆତଙ୍କବାଦ ଦମନ ଲାଗି ଅଣ୍ଟା ଭିଡ଼ିବା ସହ କଠୋର ପଦକ୍ଷେପମାନ ଗ୍ରହଣ କରିଥିଲା। କିନ୍ତୁ ଏବେ ଅସହାୟ ପ୍ରାୟ। କରୋନାକୁ ରୋକିବା ଲାଗି ଜୁ ନାହିଁ ଏହି ମହାଶକ୍ତିର। ଘାତକ କୋଭିଡ୍-୧୯ ଆଗରେ ଆମେରିକା ଏବେ ଅସହାୟ ପାଲଟିଛି। ଲକ୍ଷାଧିକ ଲୋକଙ୍କୁ ଏହି ଭୂତାଣୁ ଆମେରିକାରେ ଶିକାର କରିବ ବୋଲି ଆଶଙ୍କା କରାଯାଉଛି। ପରିସ୍ଥିତି ଅତି ଭୟଙ୍କର ଓ କଷ୍ଟଦାୟକ ହେବାରେ ଲାଗିଛି ବୋଲି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସ୍ବୀକାର କରିଛନ୍ତି। ବିଭିନ୍ନ କ୍ଷେତ୍ରରେ ଅନ୍ୟ ଦେଶଗୁଡ଼ିକୁ ପରାମର୍ଶ ଦେଉଥିବା ଟ୍ରମ୍ପ କରୋନା ଭୂତାଣୁ ସଂକ୍ରମିତ, ମୃତକଙ୍କୁ ଦେଖି ନିରୁପାୟ ହୋଇପଡ଼ିଛନ୍ତି।
କେବଳ ନ୍ୟୁୟର୍କ ସହରରେ ଏବେ ୧,୦୯୬ ବ୍ୟକ୍ତି ପ୍ରାଣ ହରାଇଥିବା ଜଣାପଡ଼ିଛି। ସ୍ବାସ୍ଥ୍ୟକର୍ମୀଙ୍କ ଲାଗି ପ୍ରୋଟେକ୍ଟିଭ୍ ମାସ୍କ, ଟେଷ୍ଟ କିଟ୍ସ୍, ଭେଣ୍ଟିଲେଟର, ହସ୍ପିଟାଲ, ସଂକ୍ରମିତଙ୍କ ଚିକିତ୍ସାକୁ ନେଇ ଚିନ୍ତା ବଢ଼ିବାରେ ଲାଗିଛି। ରାଷ୍ଟ୍ରପତି ଟ୍ରମ୍ପ ଏଭଳି ସମସ୍ୟା ଲାଗି ପୂର୍ବ ପ୍ରସ୍ତୁତି କରି ନ ଥିବା ଡେମୋକ୍ରାଟିକ୍ ସ୍ପିକର ନାନ୍ସି ପେଲୋସି ଅଭିଯୋଗ ଆଣି ସମାଲୋଚନା କରିଛନ୍ତି। ପ୍ରାରମ୍ଭରୁ ଟ୍ରମ୍ପ ନିଜ କ୍ଷମତା ବଳରେ ବିଭିନ୍ନ କମ୍ପାନୀ ସହଯୋଗରେ ପୂର୍ବ ପ୍ରସ୍ତୁତି କରିପାରିଥାନ୍ତେ ବୋଲି ପେଲୋସି କହିଛନ୍ତି। ନ୍ୟୁୟର୍କରେ ୩୦ ହଜାର ଭେଣ୍ଟିଲେଟରର ଆବଶ୍ୟକତା ରହିଥିବା ବେଳେ ଏବେ ମାତ୍ର ୪ ହଜାର ଉପଲବ୍ଧ ଥିବା ଗଭର୍ନର ଆଣ୍ଡ୍ର୍ୟୁ କୁଓମୋ ପ୍ରକାଶ କରିଛନ୍ତି। ଆଗାମୀ ୨ ସପ୍ତାହ ଆମେରିକା ଲାଗି ଘଡ଼ିସନ୍ଦି ମୁହୂର୍ତ୍ତ ପାଲଟିଛି। ଭୂତାଣୁ ନିୟନ୍ତ୍ରଣରେ ବିଫଳ ହେଲେ ସ୍ଥିତି ସମ୍ପୂର୍ଣ୍ଣ ବିଗିଡ଼ିଯିବାର ଆଶଙ୍କା ଦେଖାଦେଇଛି। ଏବେ ୩୩ ପ୍ରଦେଶରେ ଲକ୍ଡାଉନ୍ ପାଳନ କରାଯାଉଥିଲେ ହେଁ ଏହା ଯଥେଷ୍ଟ ନୁହେଁ ବୋଲି ଅଭିଯୋଗ ଉଠିଛି। ସାମାଜିକ ଦୂରତ୍ୱ ରକ୍ଷା ଓ ମାନବୀୟ ସଚେତନତା ଉପରେ ଗୁରୁତ୍ୱ ଦେବାକୁ ଟ୍ରମ୍ପ ପ୍ରଶାସନ କହିଛି।
ସେପଟେ ଆଗାମୀ ୨ ସପ୍ତାହ ସ୍ଥିତି ଜଟିଳ ହେବ ବୋଲି ଟ୍ରମ୍ପ ସତର୍କ କରାଇବା ପରେ ଷ୍ଟକ୍ମାର୍କେଟ ବୁଧବାର ନିମ୍ନଗାମୀ ହୋଇଛି। ୟୁରୋପୀୟ ଅଂଶଧନ ଏକଦମ୍ ତଳକୁ ଖସିଯାଇଛି। ଲଣ୍ଡନରେ ଏହା ୩.୫% ତଳକୁ ଖସିଥିବା ବେଳେ ଟୋକିଓରେ ୪.୫% କମିଯାଇଛି। ଯଦି ଏଭଳି ସ୍ଥିତି ଆଗକୁ ଦେଖାଯାଏ, ତେବେ ଆର୍ଥତ୍କ ମାନ୍ଦାବସ୍ଥା ଗୁରୁତର ହେବାର ଆଶଙ୍କା ରହିଛି। ଫଳରେ ସାରାବିଶ୍ୱ ଏହା ଦ୍ୱାରା ସଙ୍କଟ ମଧ୍ୟକୁ ଠେଲିହୋଇ ଯିବାର ଆଶଙ୍କା ପ୍ରକାଶ ପାଇଛି।
